¹ Dʊʊtətta jiyʊ a chi nyəra ni rə kʊwi, wa jiir rə nee moriyʊ farə nəb ba swiyerəm a kʊwan gʊ. ² A bukka nwigo tən nəbhəm a dinari kwan a ko, ka təm hanjim a kʊhiyəng. ³ Hangʊ ka kaubwiya jir nyəra jii tə bwanbi ka chu bagi nəbba swiyerəm a sira rə kʊn a kɨng ka bandʊwang. ⁴ Ka sotənna hanjimi go, jɨn rə kɨngniyəng tə ya a mʊri a kʊ, jiya dautənwi warigʊ bə nəggən, ka diya nəngnga swiyerəng. ⁵ Ka kaubwi bo a jiwən nukʊnni, na jii wʊrwini, ka nəngnga ji kwaniyəng. ⁶ Ka yɨgtənna kaubwi a jii jɨr kwani, ka nya bagi a sira bə me nəngnga gʊjiyəm. Ka sotənna hanjimi go, wʊla ma ki tə me tə nəngnga gʊjiyəng? ⁷ Kə hanjim a sotənna hangʊwi go, jiya nəngnga bwiyʊ bəraki me rə wa dəbbənna swiyeri. Ka sotənna hanjimi go, jɨn rə kɨngniyəng tə diya mʊra kʊ'. ⁸ Yʊwa mang, kə ni rə kʊwi a sotənna ni jəgatən kʊwi go, “Buwowe nəbba swiyerəm na mər rəgiya jiyʊ, si kak rə ba wʊram, na wʊra rə ba siye kakgəm. ⁹ A bukkə ba sʊ swiyerə yʊwʊm a bəng, wʊna jiyʊ dinari. ¹⁰ Ba si kak a sʊ swiyer rə moriyəm a beng, bə kəmma go bətə yʊ a li ba be a bukgəm, mənni nee wʊna jiyʊ dinari kwan. ¹¹ A jii hanjim a yʊ rəgiyan jiyʊwʊng, ka kʊgla yəm a dʊra ni rə kʊwi. ¹² Hanjim ka sʊwe go, ba be bukgəm be a nəngnga swiyer a jii kwan bwigi, mənni kən dəg hanjim a swigo nən nən, nən bə swiyera rigamən na nənniyəm. ¹³ Mənni kə nirə kʊwi a sotənna kwana jiyʊ go, 'Chimi, nəngnga gəmən bə bwiragʊ. Nən nigo ba dinari kwan ga? ¹⁴ Tə yʊ ji a chi wʊngniyʊ, na tə diya. Chutang ka sərəng ka miyəng, ne ba be a bukka jɨnəm a swigo tən jɨn. ¹⁵ Mə menə sər nəngnga jiya daimən ni ga? Tə ma nugʊn a ji nəngngai ga? ¹⁶ Nən nyang ba bukgəm ba chi ba kakgəm, ba kakgəm bo ba chi ba bukgəm. ¹⁷ Yesʊ dira Urshalimang, ka dəb bə kwʊ a jɨr bəsʊwʊm rə kɨng, mənni ka jiya yoməng, ka sotənna hanjimi go, ¹⁸ "Chu, tənən yɨgiya Urshalima, bən nəbbən Yəlla Niyʊ a gwa nəbbə gram ba nəbbə tung jɨni a chəriya Niyajiyʊwʊm na nəb mʊlarəm. Ba mwetən duutətta jurangngi. ¹⁹ Ba nəbbən bo a kang ka nəbbə me Israilawam na nəngngatən nʊr, ba nəngngatən baurang, ki ka yʊwa a riyang yʊwarang. Mənni a ko bwanbiyʊ, bən gʊg" ²⁰ Kə nee bətəm ba Zabadiyəm a be a gwa Yesʊwi tən bətəm ba gəm. Ka rʊwa kak ka gəng chəlla gʊji a gwa giyʊwʊng. ²¹ Yesʊ ka sotənna hangʊwi go "Wʊlai ji mən fari?" Ka sotən go, mən fau mo nettən da bətəm ba miyəm a chi, kwan a kang kə nyang, na kwan a kang kə gwilang ka mʊng a dʊʊtətta mʊ. ²² Mənni Yesʊ a nga sotən go, "Tə yəm bə ji tə fari. Bətə dəmən tə no a mʊriya chʊlle bən no a kakgi me rə langtangngi ga? Ka sotən go,"Bə nən dəmən." ²³ Ka sotənna hanjimi go, chʊlle miyʊ bən noi, bətə no, mənni chiyim a kang kə nyang tən kə gwilang me məbən nəbbən, mənni bərarə bə Te miyʊ a yəngnatən wʊm." ²⁴ A bukkə bagi məssarbə kwʊwʊm a nwi nyangngəng, ka nwi fur də yəlluwʊn rə chitəttai tə bəsʊwi ²⁵ Kən Yesʊ a buwowe hanjim a be gwan giyʊ ka sotən go "Kə tə yəm to, dʊʊbə ba nəbba kʊməm bə nung kumni hanjim, nəbbə gram ba mʊrtəm bə nung kumni hanjim bo. ²⁶ Me ba chi nyang a sittənni ta jɨnnu. A nyangngi, wʊ farə go gə chi wʊ gra a səttənni ta jɨnʊwi, a chi kwak kewen jɨnʊ. ²⁷ Wʊ bo ka farə go gə chi wʊrə jigʊwi a mʊra jɨniyʊ, a chi kwak a chi kewen jɨnʊ. ²⁸ Nyəngkə Yəllla Niyʊ a be bə go na nəngnga gəmən kewetəng, mənni go na gə nəngnga kewete, na gə nəbbən yuum ba gəm bəra yiyarang a mwam. ²⁹ A jɨrmənewa Jerikong, grajiya kʊləni ka fʊng hangʊ. ³⁰ Ka duube bəsʊ a chiro nyiya jʊwiyʊ. A nwi go Yesʊ gə surəng, ka mʊwa wʊrte, "Nigra, Yəllan Daudai, nwi kʊnang ka nənnəng tʊgabən." ³¹ Kʊlən ka milatən yəm, sotənna hanjimi go, tə masi, mənni ka yɨggtən jiir a li kərə jigʊwʊng, "Nigra, Yəllan Daudai, nwi kʊnang ka nənnəng." ³² Kən Yesʊ a sisi sauwʊng, ka buwe hanjiməng, ka sotən go, "Wʊlai ji tə farə to nəngnga gəmənni? ³³ Ka sotənna hangʊwi go, Nigra, nən fau no kəmta nənnʊ wa wʊmən bwi." ³⁴ Kən Yesʊ a nwi bʊmta jiyʊwʊng, ka məbra kəmta jiyʊwʊng. Rə kwa rə kwang hanjim ka nya chuting, ka fʊng hangʊwʊng.