¹ A jii Yesʊ tən məssarbə ba gəm lauwerə Urshalimang ka be Betafaji, a gwa bang ka Zaitunəng, kən Yesʊ a təm məssarbə ba gəm bəsʊwʊng. ² sotənnna hanjimi go " Tə dɨgiya mʊri kətəle a kakgi, bətə nya lungsong kwaiya gai, tən bengʊ. Tə kʊwe tə bemən gəre. ³ Kə gʊ ba sʊgəmən yem a ji ki, tə sotən to, 'Nigra gə fare; rə kwa ni hi ba təm gənne gəre. ⁴ Nəngnga nyang na ba ri ji ni yʊwerə a suwai. A sʊwe go, ⁵ "Tə sotənnan yuwiya Sihiyonai, tə chu, Nidʊwa jɨnnu be gəməni, ni rə səgtangnga dʊri a lungsonga ji, bera a ji a be lungsongngi." ⁶ Kə məssarbə ba gəm a diya a nəngnga nyəngkə Yesʊ a sotən gərəng. ⁷ Ka be rə lungsonghəng tən bengʊ, ka kwitən dʊttetta jiyʊ, kən Yesʊ a chi ya dʊttəhiyəng. ⁸ Mwami a kʊlənni ka miratən dʊttətta jiyʊ a jʊwi, bagi bo kʊwe wʊre hagta riti mitənna jʊwi. ⁹ Mənni kʊlən mwamən da sitən kak ga Yesʊwiyəm na bə fʊng nyera a buk gəm ka sum wʊrte sʊwerə go, Hossana Yəlla Daudai! Wʊ dəgtən kangngi wʊ bera mʊra dʊnda Nigrani! Hossana wa li grati." ¹⁰ A ji wʊ Yesʊ a dɨgiya Urshalimai, bɨr ka məga bwi rə yəm, sʊwerə go, "Nən wʊnə waiwe?" ¹¹ Kə kʊlən a nga go, "Nən Yesʊ ni yʊweri a mʊra Nazarat a Galilyu. ¹² Kən Yesʊ a dɨgiya kanda rʊwaninyʊiniyəng. Ka ka bə mirore na suta jɨni a mʊra kanda rʊwaninyʊiniyənəng, ka wʊssəlamən ganangte tən kʊlgəntətta bə fulgo chəmtəm, na ta bə miro mʊglotəm. ¹³ Ka sotənna hanjimi go, mʊla-mʊla, mo kaitamiyʊ bən bu mo kaita nyʊini rʊwaniyu, mənni kətə dəg a chi həroniya kʊbi." ¹⁴ Kə dʊbe tən kʊrte a be nya hangʊwa kanda rʊwaninyʊiyənəng, ka kwarar nəng hanjiməng. ¹⁵ Mənni nəbbə gram bə tung jɨni a chəriya Niyajiyʊwʊm tən nəbbə mʊlarəm ba wanna Mʊsaiyəm a chu jɨniya mənnatangnga bʊniyu ya nəngngai, na bo nwi bətəbi gʊg jiir a kanda rʊwani nyiniyən, sʊwere go, Hossana Yəlla Daudai", Ka nwi jwaggər. ¹⁶ Ka sotənna hangʊwi go, kəmən nwire jɨni nəb bam be sʊweri ga? Yesʊ ka sotənna hanjimi go O! Mənni tə ke mən bu wʊ ga, a nyʊiya fʊfʊlti rə bətəm bə kətəl-kətələm kə ri rə wertang ga? ¹⁷ Kən Yesʊ a dʊ hanjim a jiirmənna bɨrhənəng, ka diya Betaniya a da gaiyəng. ¹⁸ Rə mori kari bwi a bərəng, ka nwi jʊwʊnnəng. ¹⁹ Churə riyang ka jaurangngəng a kɨng ka jʊwiyəng, ka diya gaiyəng mənni a nyabə gʊji we a dimənna wani. Ka sotən go "Kari bən yɨgtən tʊ bete kʊrəkwang," rə kwang riyang ka jaurangəng ka kʊse. ²⁰ Məssarba chu nyangngəng, ka məna bʊni a sʊwe go "Nyənne kə riyang ka jaurangngəng a kʊse rə kwang? ²¹ Yesʊ a nga sotənna hanjimi go, "Bə nyam kəmən sʊgəmənne kə katənnə yəm bə nyam tə nəngnga bə jʊgər ki, men jɨni nəngngna tənna jaurangngi gən kwan bətə nəngnga, bətə sotənna dəbi we "Jɨrmən a gai na yar a far, ki ba nəngnga bwi. ²² Wʊnə ji tə chəlla mʊra nyini rʊwaniyʊ, na tə nəbbən yəm bə nyammi, bətə nya." ²³ A fʊlla Yesʊ a be kanda rʊwaninyiyənəng, ka nəbbə gram bə tung jɨni a chəriya Niyajiyʊwiyəm tən nəbbə gram ba nəbbəm a be nya hangʊwʊng a jii nəngnga məssarangngi ka sʊwe go, "Mənni wʊnə ga nən tai kʊmni te?" ²⁴ Yesʊ ka nga a sotənna hanjimi go, "Mərə ki nəng mən nəngnga gəmən gʊlən din. Tə ngaimən ki bən sʊgəmən ki mən nəngnga yai jɨni yaiye nən kʊmni ta wʊni ki. ²⁵ Batisma Yohanai a jɨire wa le, a jɨrewa ji ga, a gwa niyʊ ga? Kən hanjim a bugo yəmmni a bwita jiyʊwʊng. Sʊwerə go, nən sʊwe no a diyewa ji ki, ba sʊbəmən go bəra rə wʊlai kə tə nəbbən bə yəmbə nyaməng?" ²⁶ Mənni nən sʊwe no a jɨrewa a gwa nəbbi ki, nən nwi tata kʊlənni bəraki nəb ka yəm Yohana ni yʊwe yəmi. ²⁷ Ka ngatənna Yesʊwi sʊwerə go "Nən yəmbe" Kən hangʊwa sotənna hanjimi go, "Me rə kinəng yəmbe, kərə tənnə kʊmni mən nəngnga jɨni yaiye gəri ki" ²⁸ Mənni kəmarang ka jɨnəng go nyənnə? Gʊ ni ka nʊ rə bətəbi bəsʊ. A yɨgiya a wʊrə jigʊwi ka sʊwe go, 'Yəlli di nəngnga swiyer kʊ a ku. ²⁹ Kə yəllihi ya ngatən go, me bən nəngnga, mənni a bukgəng ka wʊlga kəmmarangəng ka diyəng. ³⁰ Kə nihi ya yigi a yəlli sʊwi a sotən ji kwaniyəng. Hangʊ ka nga sotən go, bən di tai, mənni a yigi be. ³¹ Wʊnə a mʊriya bətəm bambe bəsʊwʊm be a nəngnga ji te sotənni?" ka sotən go, "Wʊrə jigʊwi." Yesʊ a a sotənna hanjimi go, kəmən sʊgəmənnə nəbbə yirə chəmmər da dʊrəm tən talbe ba luggən rə digitang a dʊʊtətta Niyajiyʊwi ki mənni jɨn bətə dəgi. ³² Yohana ka be gəmən na jʊwiya nəngngatanga ji nyai, mənni tə nəbbən bə yəmbə nyam a hangʊwi. Mənni nəbbə yirə chəmmər da dʊrən tən talbe ka nga nən hangʊ. Mənni jɨn, a bukkə tə chu ji ya nəngnga bwiyʊwʊng, tə bu bə kang, tə nəbbən bə yəmbə nyam nən ge. ³³ Tə kautən suwa gʊ wʊllo yəmmi. Kəna nu gʊ ni we, ni rə kʊwi. Ka dɨga kʊ, ka bʊ kʊlli a kawʊrə gəre, ka tur sung wʊ ba yam hiya inabiyʊwi, ka mʊ lɨbang torəng, ka ne kʊhi bagi nəb go jura dʊwong. Ka diya bagi təmməng. ³⁴ Fʊlla beta ritiyu a lauweng, ka təm bagi kewetangʊ go diya a be gəməne rə beta ritiya kʊwi. ³⁵ Mənni nəbbə ju swiyerəm ka tau bwiranəmhem, a bʊgte kwan, ka ju wʊ kwani, ka məngngo wʊ kwani rə wetəng. ³⁶ Bong, kə ni rə kʊwi a təm bagi bwiranəm ba gəm ba li bərə jigʊwʊm, mənni nəbbə ju swiyerəm ka nəngngatən nyang nyənkgə bərə jigʊwʊməm. ³⁷ A bukkə nyangngəng, ni rə kʊwi ka təm yəlliyang gʊ a gwan jiyʊ sʊwere go, ba ne gratə yəlla miyʊ. ³⁸ Mənni nəbbə ju swiyerəm a chu yəlliyəng, ka sʊga a bwitang jiyʊ go, waiwe gəba jau kʊla kʊhiyʊ. Tə be tənən ju hangʊ hi na tənən jau kʊla. ³⁹ Ka dəbəng a maiya tara kʊhiyʊwʊng ka juwʊng. ⁴⁰ Ni rə kʊhiyʊ a be ki wʊlai ba nəngngatəna nəbbə ju swiyerəm be? ⁴¹ Hanjim ka sotənna hangʊwi go "Ba juwo nəbbə bwiram bə ju swiyerəm a dəg hanjim a jʊwiya kʊnangngi deni, mənni bo ba nəbbən kʊhi a bagi nəbbə ju swiyərəm a jʊwiya dʊwongngi, bəba jəg di kwara a fʊlla sənangngəmi. ⁴² Yesʊ ka sotənna hanjimi go "Tə kəmən buwa a wang ga" Wer də nəbbə mʊrəm a kwilan ka yulo wer da jɨngngɨn. Waiwe wa gwa Nigrai, mənni bo jɨnna mənnatangnga bʊniyʊ a nuta nənnʊ ga? ⁴³ Bərarə nyang kən sʊgəməne, bən dəbmən dʊʊtətta Niyajiyʊwi ne bagi nəb, bəbba nəbbən fini tangʊwʊm. ⁴⁴ Wʊnə wa yar werhənni ba ketəlla bwi mənni wʊ werhən a yartənnna jiyʊ ba jəgsa. ⁴⁵ A fʊlla wʊ nəbbə gram bə tung jɨni a chəriya Niyajiyʊwiyəm tən Farisiwa nwi wʊllo yəmməng, ka yəm go sʊ yəm bambe a dʊr a ji. ⁴⁶ Farə go tə tuwʊng, ka nwi tate kʊlən, bəra ki nəbba dəb hangʊ ni yʊwe yəmmi.