¹ Yesʊ a sʊwe wa banghəngngəng, kʊlən mwam ka fʊngnge. ² Kə gʊ wʊrə bʊgabwiyəri a be gwan giyʊ a ne gratəng sʊwerə go,''Nigra, kən nga ki, bən dəmən dəgi nəngnga yʊlgo.'' ³ Kən Yesʊ a titən kangngəng, a sotən go, ''Kən nga, yullo Yʊlgoi.'' Rə kwa-rə kwang kən tʊmən a bʊgabwir da gənəng. ⁴ Yesʊ ka sotənna hangʊwi go, "Yəm mo sotən bə gʊji a gʊni. Mənni di, na nʊng dʊr da mʊn ni tung jɨna chəriya Niyajiyʊwi, na nəbbən nətəttən Mʊsa sʊwei bəra yəmtang a gwan jiyʊ. ⁵ Yesʊ a dɨgga Kafarnahʊməng, kə gʊ nigra nəbbə barə kərangngəm a be gwang giyʊ chəllarəng, ⁶ Kə go, "Nigra jiyʊ, bwira miyʊ ka dəddai a bʊbʊri a kai, no kʊnang dəni.'' ⁷ Kən Yesʊ a sotən go, ''Bən ya na kwara rəge." ⁸ Kə nigra hi go, ''Nigra jiyʊ, sitən bə sʊwe mo mwe gʊbən yɨga kaita miyʊwi, mənni sʊ yəm a gaiwe bwigi, bwira miyʊ ba kwara. ⁹ Bəraki mə rə kinang mʊ wa təm rə kʊmni ta gʊwi, mən kamənnə nəbbə bau kərangngəm a təm nən me rə kinang. Bən sotənna we mo, 'Di,' ki ka di, gʊ bo mo, 'Be,' ki ka be, bən sotəna bwira miyʊ mo, 'Nəngnga jiwe,' ki ka nəngnga.'' ¹⁰ Yesʊ a nwi nyangngəng ka məna bʊnte ka sʊ yəmməng, ka sotənna nəbbə fʊngrə bukka gəməng go, ''Yəm bə nyam, kəmən sʊgəmənne, a mʊra Isra'lla nyamən bə nəbəntangnga yəm bə nyam rə kʊmni a jɨrgo tən bambe. ¹¹ Kən sʊgəmən, mwam ba be rə jiyang na rə yʊ, ba chiro jau jɨni jauri tən Ibrahim na Ishakʊ tən Yakʊbu a mʊra dʊʊtətta jiyʊ. ¹² Mənni bətəm ba dʊʊtihiyəm bo bən mauwa mʊra gʊ yəlluwi rə kʊnangngi. Ba tiro wite rə kərsətangnga nungta gai." ¹³ Yesʊ a sotənna nigrai go, ''Dii! Masi a yullonən nyang a mʊra nəbbəntang ka yəm bə nyam bən nəngngam." A səntəgomən ba wai fʊlla bwirangʊ ka kwara. ¹⁴ N'Yesʊ a dɨgga kaitan Bitrusiyəng, ka chu nyəlle Bitrusi wʊ chʊwi a dəddai rə kəttərən. ¹⁵ Yesʊ ka məbra kang ka gəng, kə kəttərən a jamən kangngəng. Ka gʊnna sʊ nəngngatən swiyerrəng. ¹⁶ Yʊwa mang, kə nəbba betəne wa Yesʊwi rə bərə səmbatə bwiraiyəm mwamməng. A jəg səmbati bwirai nən bwan, bo ka kwara rə bə me bwitə ləmmangngəm warigʊ. ¹⁷ A nyangngi gʊn rii yəm ba ni yʊweri Ishaya sʊwerə go, "Gə rə bwigo ka dəbmən bʊnnai ya bwiləmmangngi ya nənnʊ, ka dəbmən bwatətta nənnʊ." ¹⁸ A jiwʊn Yesʊ a chu kʊlən mwam a kawʊrrəng, ka ne sori go tə kabiya dagi yawʊr da wimang ka Galiliyəng. ¹⁹ Kə gʊ ni mʊlari a be sotən go, ''Ni məssari, bən fʊngngən yɨgira gʊ bən di wi.'' ²⁰ Yesʊ a sotən go, "Jwatə nyʊwai karə bwartəttan jiyʊ, kəlleta jiyʊ bo karə kwilotan jiyʊ, mənni Yəlla-niyʊ, me rə gʊ ba da wi." ²¹ Gʊ a mʊra məssarbə ba gəm ka sotən go, ''Nigra dwi fu na yɨgi dəgge te miyʊ,'' ²² Mənni Yesʊ a sotən go, fʊngngiye ''Dʊ ba bəttərʊm a dəg ba bəttəro bəttəroiyəm ba jiyəm." ²³ N'Yesʊ a dɨgga bontəllong ka hiyəngəng, məssarbə ba gəm ka fʊng a mʊriyəng. ²⁴ Kə səmba a gʊnne wa wimangng rə kʊmniyəng, kʊrmong ka hiyəng ka sʊ mi bontəllong. Mənni Yesʊ wa dʊm. ²⁵ Kə məssarbə ba gəm a yɨga gʊggəng, ka sotən go, "Nigra, yiyabən; bənnən bətəro!" ²⁶ Kən Yesʊ a sotən go,''Wʊla ma kətə nwi tatə nyang nyəngkəng, jɨn bə nəbəntangnga yəmbə nyam a yarmənyariyəm?'' Ka gʊnnəng, ka mwetən yəmma səmba hi tən wimangngəng, kə gaiya masi sauwʊng. ²⁷ Nəbhəm ka mənna bʊnni, a sʊwe go, ''Wai ni we gən wʊne, wʊ səmba tən wimang nwitən yəmmi?" ²⁸ N'Yesʊ a be yawʊr da təm ba Karasinawaməng, nəb bərə weni bwiraiyəm bəsʊ ka jəro wa nya hangʊ. jərowʊra sʊtə mənni nən bweltən deni, me rə ni dəmmənə tʊra wai jʊwi yʊ. ²⁹ Kə hanjim a mau wʊri a sʊwe go, ''Wʊla daan nən nən, mwe Yəlliya Niyajiyʊwi? N'be mo na nəbbən kʊnnang fu, na dʊ fʊlla ri ga?" ³⁰ Mənni ka kʊlən da ngərtən mwam to yarəm, me pre nən ji. ³¹ Kə weni bwirai ya chəlla Yesʊ go, ''Jɨgbən ki, tʊngbən a mʊra kʊlən da ngərtən de." ³² Yesʊ a sotən go, ''Tə di!'' Kə weni bwiraihiya jɨrong, ka dɨgga mʊra ngərtihiyəng; kə kʊlənhən a fiyeng, ka dɨgga mʊra wimangngəng, ka bətəro a mʊra hiyəng. ³³ Nəbbə na nʊ to ngərtihiyəm ka kwi səngni, a dɨgga bɨr, sʊwerə jiya nəngnga bwiyʊ warigʊ, a ne kʊmni jiya nəngnga bwi rə nəbbə rə weni bwiraiyəm. ³⁴ Kə nəbba bɨrrəm warigʊ a jɨrrowa nya Yesʊwʊng.A chʊwʊng, ka chəlla go a dʊ təm ba jiyəm.