¹ Kari bətə nəngnga duutte bəra bən nəngngamən duute. ² Bəraki nyəngkə tə nəngnga duute rəgəng bən nəngnamən duute nyang, bəraki rə chʊlle tə bɨngo rəgi ngʊ bən bɨngo gəmən gəri. ³ Wʊllama ki mən jəga be salangngi a kəmiya chummi, mənni me mən kəmma rə dəllan da wʊmo kəmiyən? ⁴ Ba nəngnga go nyənnə ki sotənna chummi mo a masi na jəgtən salang a kəmiyan gʊ,' mənni mənə dəllan a mʊra kəmiya mʊ? ⁵ Mwe ni bwira! Su jəgmən dəllan da kəmiya mʊwʊn fu, kə mənni chu salangka kəmiya chiyamʊwʊng nyagʊ. ⁶ Kari bəttə ne ji Yʊlgoi jwate, bo, kari bəttə maitənna ngərte, jɨni rə finiyʊ a jɨnʊ. Mə nyangki ba fiya rə nani, ki ka kauwe bwi a kiragən. ⁷ Chəlla, bən nəggən, fau, bəttə nya, buro, ki bən wʊmgəmən. ⁸ Warigʊ wa chəllai, ba yʊ, bo wa fauwi ba nya, wa buroi bən wʊmtən. ⁹ Wʊnə ni a mʊran jɨnu wʊ yəlli ba chəlla mwan də fʊmfʊmən ki ba ne werri? ¹⁰ Bo ba chəlla laah ki ba ne soi? ¹¹ Bəra rə nyang, kən jɨn bətə nəbbə bwiramməm, kətə yəm nyəngkə tə nəngngatəng nətəttə nyai rəga bətəmba jɨnnəm ki, bətə bɨngo nyənkə Ten jɨnu wa jiyʊ ba nəggən jɨni nyai rəgəng nən wʊlai a bə chəllarəm? ¹² Bərarə nyang, jiwʊ tə farrə to nəbba nəngnga gəmmənni warigʊ, tə nəngngatənna hanjimi rə kɨngiyang, bəraki waiwe gən duutə warigʊ tən məssarang ka nəb yʊwerəmməng. ¹³ Tə dɨgiya jʊwi gʊttəlli, bəraki jʊwiya bwiyati nən bangsang, jʊwihi merə bwayər a fʊngtang, nəbbə tʊra gaiyəm ka mwam. ¹⁴ Bəraki fʊgang kə yɨgira gwa yuumiyəng nən bil, jʊwihi karə bwayərra tʊtang, nəbbə nyarəm bo nən banyʊi. ¹⁵ Tə nəngnga dən rə nəbbə tiya nyattəm, bə nəngnga ki begəməne a mura yobiya matiyəm, mənni a yəmbə nyam nəng bərsan ba wʊsəlagən. ¹⁶ Bətə yəm hamjim a gwa betan jiyʊwi. Nəbbə jəg inabi a tʊttang, mənni jauri a bwiya tʊttə tə rə nunggəmmi ga? ¹⁷ Nyang bo riyangkə nyang ka tʊrə ngagʊ, mənni riyang kə bwirang bə tʊ betə nən bwiragʊ. ¹⁸ Riyang kə nyang me ba tʊ betə bwirai, nyang bo riyang kə bwirang me ba tʊ betə nyai. ¹⁹ Riyang kə me bə turə betə nyaiyəng, bən kamən ki kən maiya kərang. ²⁰ Bəra rə nyang, mən yəmma mʊra bətan jiyʊ. ²¹ Men warigʊ bə birə go, 'Nigra jiyʊ, Nigra jiyʊwʊm,' gəbə ba dɨgiya dʊʊtətta jiyʊwʊm, mənni wa nəngnga ji nya a kakka Te miyʊ wʊ ka jiyʊwi gəba nya. ²² Awai kowe mwam ba swimən go, 'Nigra jiyʊ, Nigra jiyʊ, balli nən nəngnga bə jɨna mənnatangnga bʊniyʊ rə dʊndamʊn ga, nən jəg bə weni bwirai rə dʊndamʊn ga, mənni nən nəngnga bə swiyətəttə kʊntai mwam rə dʊndamʊm ga?' ²³ Ki bən sotən kwetere mo, 'Me yəmgəmən bəwe! Tə dimənna mi, jɨn bə təm jɨni bwiraiyəm!' ²⁴ Bəra rə nyang, wʊ nwi yəmba miyəmmi, na bo ka təmri, bən bɨngo tən ni rə bərsani, wa mʊ kaitangʊ a bangnga jiyʊ. ²⁵ Hiya yarəng, jənggali ka be, səmba ka be bau kaihi, mənni a yarbe, bərakən mʊ a jiya bangngəng. ²⁶ Mənni wa nwi yəmba miyəmmi, na təmbi, bən bɨngo tən mɨ niyʊ wa mʊ kaitan gʊ a gwa jʊsaiyʊ. ²⁷ Hi ka yarre, jəngali ka be, kə səmba gʊne a bau kaihiyəng. Ka yarrəng, ka kiya warigʊwʊng.'' ²⁸ A jiwʊn Yesʊ a mwarmən sutangnga yəm bambiyəng, kʊlən ka nəngnga mənnatangnga bʊi rə məssarang ka gəng. ²⁹ Bəraki bə məssatən nyəra nirə kʊmniyʊ, me nyəra nəb mʊlarəm.