¹ Yesʊ a chu kʊlən da nəbbən nəng, ka gwiya bang a ji. A bukka chəchiyəng, mssarbə ba gəm ka betənne. ² Ka wʊm nyʊiyangʊ məsatənnəng, sotənə go, ³ "Dəgtang a kang ka chiya bə rə bʊnnən a mʊra wem, bəraki dʊʊtətta jiyʊ nən təgi. ⁴ Dəgtanga a kang ka chiya bə rʊwa bunənnəm, bəraki bən ne mitangka dang. ⁵ Dəgtang a kang ka chiya bərə yobi nyaiyəm, bəraki ba jau kʊla gʊsəti. ⁶ Dəgtang a kang ka chiya bə nwi jʊn tən hi kʊgriya swiyer də nyanəm, bəraki bən dəg a rira. ⁷ Dəgtang a kang ka chiya bə nəngnga yiyarangngəm, bəraki ba nya yiyatang. ⁸ Dəgtang ka kang chiya bərə furni yʊlgoiyəm, bəraki ba chu Niyajiyʊ. ⁹ Dəgtang a kang ka chiya bə be rə chim bə lammangngəm, bəraki bən bu hanjim mo bətəm ba Niyajiwʊm. ¹⁰ Dəgtang a kang ka chiya bən ne kʊnnang bəra rə swiyer də nyanəm, bəraki dʊʊtətta jiyʊ nən təggi. ¹¹ Dəgtang a kang ka chiya jɨni a fʊlla nəb kəbbagəni, a nəggən kʊnnang, mənni bo a sʊ yəm a jiyan jɨni rə nyattə dəndang bəra nəm mei. ¹² Tə nəngnga bwiləmri rə fur də kwauwʊn, bəraki janggəmmiyan jɨnnu kawʊ mwan a ji rə yəmbə nyam. Nəb a nəngngatən bwiragʊwi a nəb yʊwerəm ba lugənem nyang nyəngke. ¹³ Jɨn tən bʊmkanəm ba gʊsətəm, mənni bʊmkanəm a diməna chuluwi yan gʊ ki mən məbra bə nu nən nyəne? Me ba nəngnga fini a gʊji, bən kwisəre, ki nəb ka fiya rə nani. ¹⁴ Jɨn tən kwetərei a gʊsəti, bɨrda həlla jiyən me bə bəmənne. ¹⁵ Nəb me bə tung gʊnggor da kərangngən ki a hɨptən kələn, a nyangngi mən təgga jiya gʊ chiri yang gʊ, na ba yən kai tən nəb. ¹⁶ Masi kwetərei yan jɨnu a yən kakka nəbbəng nyəngkə ba chu swiyetətə nyai ta jɨnu na wer Ten jɨnu wa jiyʊ. ¹⁷ Kari bətə lʊngto be mo na nyəng duute na nəb yʊwerəm. Be bə mo na nyəngnge, mənni na rii. ¹⁸ Bəraki mən sʊgəmən yəmbə nyam, ji tən təm ba ji, mənni ji wʊn mʊla na sʊwei me ba jɨrmənna mʊra duute, jɨni warigʊ ba ri bwi. ¹⁹ Bərarə nyang wa yammənna wa li yarməntang a mʊra sori waiwi, na məssatənna bagi go a nəngnga nyangngi, gə ba li yarməntang a dʊʊtətta jiyʊ. Mənni wa təm sorihiyʊ na wa nəngnga məsarang həngngi, gə ba li grata a dʊʊtətta jiyʊ. ²⁰ Mənni mən sʊgəmən mo ki swiyer də nyan da jɨnən a sumən ba swiyer da nəb mʊlarəm tən Farisawan ki, me rə nyəngkə bəttə dɨgi rə ga dʊʊtətta jiyʊwʊng. ²¹ Kəttə nwi kən sotənna nəbbə chərəm, kari bən juu ni, mənni wa juu niyʊ bən nəngngatən duutte. ²² Mənni mən sʊgəmənen mo wa nəngnga jwagər rə chiyʊ bən nəngngatən duute. Bo, wa sotənna chi go, 'Mwe ni rə kʊnni!' ba siya kakka bə mwe duutəm, wa sotənna chʊgo go; 'Mwe mɨ!' wai ba dɨgiya kərang kə kʊrəkwangngəng. ²³ Bərarə nyang, bən nəbbən nətta chərri na kəma mo chum karə jwagərra mwi ki, ²⁴ dʊ nəttətta mʊ a kakka chərriyəng, na di yom ba mʊm.Tə nwigo tən chum hi fu ki ka dʊ yɨgi nəbbən nəttəta mʊ. ²⁵ Tə nwigo tən wa mau wʊriya mʊwi a jʊwi a fʊlla tə yɨgira gwa duutiyʊ, bəri ni a mau wʊra mʊwi ba dɨggənna kang ka ni nəngnga duuti, ki kən maiyənna jarəm. ²⁶ Mən sunən yəmbə nyam, mər bə jiwʊn fʊngngənni warigʊ ki me bən jɨrmənna gai. ²⁷ Kətə nwi sʊwe mo, 'Kari bən da rə nyʊi.' ²⁸ Mənni kəmən sʊgəmmənne, wa jəga nyʊi rə jəgatang ka jəllənəngngi, ka da rə ga furi yang gʊ. ²⁹ Ki nu wa kangkə nyangngi ba dəggən təl na ki, jɨngmən massəre. Bəraki ba linən ga kwan a bwiya mʊ wa ju, kə bən mai bwiya mʊ warigʊ a kərangngəng. ³⁰ Kə kang kə nyang ka mʊng ba dəggən təl na ki, mwemən a mwiya bwi na masəre. Beraki ba linən ga kwan a bwiya mʊ a ju, a kə bən mai bwiya mʊ warigʊ a kərangngəng. ³¹ Kən kabi sʊwe mo, 'Wa ka nyʊiyangʊ wi, ba ne wangka wʊlgatangngəng.' ³² Mənni mən sʊgəmən mo, wa jamən kang a nyʊiyangʊ wi, kə men bwiran da taltən ki, ka dəgga jʊta talti. Bo wa naah hangʊ a fʊlla jammənni, bə nəngənga taltə rəge. ³³ Kəttə kabi tə nwi sotənna bə chərem mo, 'Kari bətə bau bʊnni ta nyatti, mənni tə bau bʊnni tan jɨnu yɨgira Nigra jiyʊ.' ³⁴ Mənni mən sʊgəmən mo, kari bətə bau bʊnni warigʊ, rə ji bəraki gʊ chiri ya Niyajiyʊwi; ³⁵ Rə gʊsəte bəraki gʊ fau nani wi; rə Urshalima, bəraki bɨrdə da Nidʊ gran. ³⁶ Na bo sʊwe mo, kari bətə bau bʊnni rə dʊr dan jɨnən, bəraki me bətə dəmən tə wʊlga yɨr da dʊrən da jɨnən kə nən yullu ki kə nən kwau ki. ³⁷ Mənni masi yəmba jɨnəm a chi, 'O, ki O,' me nyangki 'O o, ki o’o.' Ji wa sumənna nyang nyəngki, a jɨre wa ni bwira. ³⁸ Kətə nwi sʊwe mo, 'Nu a nyʊi a nu, nungngən bo a nyʊi a nungngən.' ³⁹ Mənni mən sugəmmən mo, kari bəttə wʊga tən ni bwira. A jiya nyangngi, wa banna wʊliya kangkə nyangngi ki, wʊlgatən wʊ kwani. ⁴⁰ Ki gʊ ba di nən jɨn a gwa duuti bəraki ka yʊ dʊkkan jɨnəngngəng ki, tə ne wai ni ji tə məra bwi gəri. ⁴¹ Ni ba dəggən kwak a yom ba mel kwanəm, tə di rəga mel təsʊ. ⁴² Wa gʊlgənni ki tə ne, bo, wʊ farrə sʊniyʊ kari bəttə dang rə ge. ⁴³ Kətə nwi ji wʊn sʊwei, 'Yotən daa wa jwiyʊ wa mʊ, na kwila wʊ me bə fanni.' ⁴⁴ Mənni mən sʊgəmən mo, tə yotən daa a bə mə be fagənnən, na tə rʊwatən nyʊiniya bə nəggən kʊnnangngəm, tə dɨgtən kangnga bə sʊ ji bwira jɨna duttəm, tə nəngngatən ji nya a bə kwilagənnəm, ⁴⁵ na ba tə yullo bəttəm ba Te jɨnu wa mʊra jiywʊm. Bəraki bə dəg ko yəntənna bə bwiram tən nəbbə nyam, bo, bə təmme hiyajiyʊ yɨgira bə təm jɨni nyaiyəm tən bə təm ji bwiram. ⁴⁶ Bəraki tə sʊwe to tə yotən daa a bətə farrəm ki, jangəmmi ya wʊlaiyʊ bə tə nyai? Bə yʊ chəmmər da dʊrənnəm me bə nəngnga nyang ga? ⁴⁷ Tə sʊ chəttəan jɨnu dang nən ji ki, wʊllai tə nəngnagara li bammi? Ma da bə men Israilawam bə nəngnga nyang ga? ⁴⁸ Bəra rə nyang, a chin kwak tə yulo nəbba ririyəm, nyənkə Ten jɨna jiyʊ wa ri rəgəng.