¹ Kə We sitən kag a Yesʊwi a di rəga mʊra seiyəng. ² A so hi kotə furtə gwar, rə kʊm rə ko, a bukka gəngngəng, jʊn ka bwa. ³ Kə Ni bɨngori a betəneng sotənnə go, ''Kəmən Yəlla Niyajiyʊwi ki sotənna wetətta yʊllo mwan də fʊmfʊmən.'' ⁴ Kən Yesʊ a jautən go, ''Ka mʊla-mʊlai bwi mo, me bərarə mwan də fʊm-fʊmən gən kwan gədə ni ba nəngnga yuum gərən, mənni mən nəngnga yuum rə yəmbə jərera nyʊiya Niyajiyʊwiyəm.''' ⁵ Kən Chetan a di rəga bɨrdə Yʊlgoiyən a gwi rəga jiya kaita jiyʊ tən rʊwa nyʊini wi, ⁶ Ka sotən go, ''Kəmən bwe Niyajiyʊwi ki, mʊwe wa təm bəraki wa mʊlamʊlai bwi mo ba sottənna weni təmri yan gʊ, ba ton na mənni a chərən rə kaniyan jiyʊ, na ba kari bən bau na a wer.''' ⁷ Yesʊ a sotən go, ''Bo ka mʊlamʊlai bwi, 'Kari bən bɨngo Nigra Niyajiyʊ wa mʊ.''' ⁸ Bo, kən Chetan a di rəga kagi bang ka sʊm dəniyəng, ka nʊng dʊʊtətta gʊssəti warigʊ, rə nyʊiyar da gən. ⁹ Ka sotən go, "Ru na ni gratə ki bən nən jɨni yaiye warigʊ." ¹⁰ Kən Yesʊ a sotən go, ''Dimən na mi, Chetan! Bəraki ka mʊlamʊlai bwi, 'Bən ne gratə Nigra Niyajiyʊ, bən nəngngatən kewetan gi gən kwan.''' ¹¹ Kən Chetan a diməna giyəng, mənni bo kə weni təmriya be nəngngatən swiyerəng. ¹² A jii Yesʊ a nwi mo kən tau Yohanai, ka gʊna diya təm ba Galiliyəm. ¹³ Ka dʊ Nazared a kabi rə chəyəm a Kafarnahʊməng, a nyʊiya wimang ka Galiliyəng, a jiya yəkka təm ba Zabalun tən Naftaliyəm. ¹⁴ A nəngnga bwi nyang na ba rii sʊtang ka ni yʊweri Ishayang, ¹⁵ "Təm ba Zabalunəm, na rə təm ba Naftaliyəm, a nyʊiya wimangngi, na yawʊr da Lah Urdʊni, Galili ya nəbba kʊməmmi! ¹⁶ Nəbba chiya kʊməm ka chu kwetərei, mənni bə ka chiya kɨnglang ka bwiyatəng, kwetərei ka yəntənne wa hanjimi.'' ¹⁷ A dəbbe wa wai fʊlla, Yesʊ ka sʊ warrə yəm, sʊwerə go, ''Tə bukang, bəraki dʊʊtətta jiyʊ ka diye rə do.'' ¹⁸ Yɨgi yom a nyʊiya wimang ka Galiliyəngngəng, ka chu bagi chəttə bəsʊ, Saminu wʊn bərə mo Bitrusi, tən chi Andarawʊs, kwi garta wimang, bəraki nəbbə tʊwa laatəm. ¹⁹ Yesʊ a sotənna hanjimi go, ''Tə be, tə fʊngngiye, bən dəggən tə chi tə tʊwa wʊ nəb.'' ²⁰ Rə kwa rə kwang ka dʊ gartan jiyʊ, ka fʊng hangʊwʊng. ²¹ N'Yesʊ a jaukak rə yoməng, ka chu bagi nəb bəsʊ, ni tən chi, Yakʊbu yəllang Zabadiyʊ, tən chi Yohana, a mʊra bontəlong ka hiyəng tən te jiyʊ Zabadi, yəngna garttan jiyʊ. Ka bu hanjiməng, ²² Rə kwang ka dʊ ten jiyʊ rə bontəlonghəng, ka fʊngngəng. ²³ Yesʊ ka yogo a mʊra təm ba Galiliyəm warigʊ, nəngnga məssarang a kantə ta rʊwaninyʊiyʊ, warrə yəmbə ləmmangngəm ba dʊʊtəm, mənni kwara rə bwatə dəndang, rə bunai ya bwiləmmangngi a mʊra nəbbe. ²⁴ Yəm ba gəm ka tʊwe wa təm ba Suriyam warigʊ, mənni nəb betənne rə ba bwarabwarayəm, bə dəggatən kani rə bwatə dəndangngəm, rə bə no kʊnnʊngngəm, rə bərə weni bwiraiyəm, rə bərə dəlatəkwiyəm, rə bə bwita bʊbʊriyəm. Yesʊ ka kwara nən hanjim. ²⁵ Kʊltə mwam ka fʊngnge hangʊ a Galili, rə Dikafolis, rə Urshalima, na təm ba Yahudiyam, na bo rə yawʊr da Urdʊn nən.