¹ A yai kotə yere Yohana ni nengngaten batisma nebbi ka be warrə yəmbə ləmmangəm a sei ya Yahudiyai sʊwerə go, ² "Tə bukang, bəraki dʊʊtətta jiyʊ ka diye rə do." ³ Waiwʊn gʊ ni-yʊweri Ishaya a sʊwe yəm a jiyʊ, go, "Jiir da gʊwʊn bərə buwʊng a sei sʊwerə go, ''Tə sartən jʊwi ya Nigrai, tə yəngna jʊwi yan gʊ a si sap.''' ⁴ Yohana dʊ dʊtəta yir da kʊrmongngəni, mənni a bu fer da gən nən biyang. Jɨni jaura gʊ lənggate tə hiya yʊta seiyʊ. ⁵ Kə nəbba Urshalimam, na ba Yahudiyam warigʊ, na ba kawʊr Lah Urdʊniyəm warigʊ, yɨgira gwan giyʊ. ⁶ Ka nəngngatən batisma a Lah Urdʊni, a bukka sʊwe jɨni bwirai yan jiyʊwʊng. ⁷ Mənni a chu Farisawa tən Sadʊkiya mwam jɨrerə gona nəngngai gimən batismang, ka sotən go, ''Jɨn beta sote rə sam bə bwiranəm, wʊna sʊgəmən go tə mwaməna jwagər də berən? ⁸ Tə bu betə ba dautəna butang ka kangngəng. ⁹ Kari bətə dəbba furnan jɨnu to, "Ibrahim gən te nənnu bəraki kəmən sʊgəmənne. Niyajiyʊ karə kʊmni a gʊgtən bəttəbbi a Ibrahimi a mʊra wetətte. ¹⁰ A kʊ nyəngke kən titən yʊwar a swir da riyangən. Bəra rə nyang riyang ka tʊ bə betə nyaiyəng, bən kamən maitənna kərang. ¹¹ Mən nəngngamən batisma nən hi yɨgira butangnga kang. Mənni wʊ bera bukka miyən ngi, ka lii rə grate, wʊ me bən səng dəb ləbbərtangʊwi gə ba nəngngagəmən nən We Yʊlgoi bo rə kərang. ¹² Kasi bʊsi yan gʊ wa kang ka gəng, ba yʊmən fʊritangʊ, ki ka kʊra kwai ba gəm a kwiya bənni, mənni ba tung sʊtihi rə kərang kə me bə dʊmorəng.'' ¹³ Kən Yesʊ a diye wa Galiliyəng, ka be Lah Urdʊnnəng a gwa Yohanai na nəngngagəmən batismang. ¹⁴ Mənni Yohana farrə nyəngkə ba kwila rəgəng, sʊwerə go, ''Me mən farrə mo nəngngai mən batisma, mənni mən be ra gwa miyʊ ga?'' ¹⁵ Yesʊ a ngatən go, ''Masi a yullʊ nyang kʊ, nan rii ji nya warigʊ.'' Kən Yohana ngatənnəng. ¹⁶ A bukkən nəngngatən batismang, Yesʊ ka jɨrməne wa hi, rə kwa rə kwang, kə korən a wʊmtən bwiyəng. Ka chu We Niyajiyʊwi suwere nyəra mʊglo, ka chitən nan giyəng. ¹⁷ A nyangəng, dagi jiir ka jəre wa korən sʊwerə go, ''Yəlla dai ya miyʊ, wʊn dɨgga furri deniyʊ.''