¹ A bukkən bu Yesʊ a Baitalami ya bɨrda Yahudaiyəng a fʊlla Nidʊ Hiridʊsi, bagi nəbbə rə yəmtangngəm ka diye wa tʊr a be Urshalima, Sʊwerə go, ² ''Nidʊwa Yahudawai buwi gʊne? Nən chu beswangngi yangʊ a tʊr mənni nən be no na nən ne grate." ³ Nidʊ Hiridʊs a nwi nyangngəng, ka lʊktə furri, nyang bo rə nəbba Urshalimam warigʊ. ⁴ Hiridʊs ka kʊra nəbbə gram ba nəbbə tung jɨna chəriya Niyajiyʊwʊm, bə gram rə nəb mʊlarəm ba təmməm ka nəngngatən gʊllənəng, ''Bən bu Kristi a le?" ⁵ Ka sotən go, "A Baitalami a Yahudiyai, ''Bəraki ji ni yʊweri a mʊlai go, ⁶ 'Mənni mwe bo, Baitalami, a təmba Yahudiyami, me mʊmən yarmən a mʊra nəbbə gram ba Yahudiyam ga, bəraki a mʊri ya mʊ n'gʊ wʊrə dʊʊti ba jərewi wʊ ba yullʊ yari ya nəbba Isra'ilami."' ⁷ Kən Hiridʊs a bu nəb yəmrəmhəm a kɨlʊkɨlʊwi bwiyəng gʊllə fʊlla wʊ besongngi hi ya jɨrre rəgi. ⁸ Ka təm a Baitalami, go, "Tə ya tə sənnai mənne bwe hi deen. Tə nya ki, tə bemənne rə yəm, na bən yɨgi ne grate rə kinəng." ⁹ A bukka nwi yəmba nidʊwʊməng, ka di yomba jiyəmməng, mənni bo, besongngi ya chuwe wa tʊrri yɨgira kakkan jiyəng ka yɨga si sap a jiya gʊn bu bwe hi wiyəng. ¹⁰ A chu besongngi hiyəng, ka rii rə furdə kwauwʊn rə kwani. ¹¹ Kə hanjim a dɨga kaihiyəng, ka chu bwe hi tən ne Maryamʊ. Ka rʊwa kakka gəng ka ne gratəng. Kən hanjima kʊ jɨna jiyʊwʊng, ka yaktən nətəttanjiyʊ ta jɨni kəlchəkəlchi rə lubban na rə mʊr. ¹² Niyajiyʊ bo ka wʊtən suu a hanjimi a mʊra dʊgam go kari ba jɨggi a gwan Hiridʊsi, ka kabi a təm ba jiyəm a gʊ jʊwi dangngəng. ¹³ A bukka diyang, kə we təmri ya Nigrai a betənne wa Yʊsʊfuwi a mʊra dʊgamməng go, ''Gʊn, dəb bwe hi tən nengʊ, na mwa rəga təm ba Masarəm. Na chiya gai yɨgira fʊlla bən sʊnənni, beraki Hiridʊs bə kʊrabwi ya yəmtangnga bwehiyʊ go na gə ju." ¹⁴ A wai kʊm hi Yʊsʊfu ka gʊn a dəb bwe hi tən nengʊ a di rəga Masar. ¹⁵ Ka chiya gai yɨgira bwiyatan Hiridʊsi. Nyang nyəngki bo ka ri jiwʊ Nigra sʊwe wa nyʊiya ni yʊweriyʊ,"N'buwe yəlla miyʊ a Masar." ¹⁶ Hiridʊs, a chu nəb yəmrəm ka jɨrməna jʊtangʊwʊng, ka lʊktə furri deni. Ka təm juwo bətəm barəm bə ka Baitalamiyəm na gani kɨngri yangʊ warigʊ, jiya dəbba jɨttə təsʊwi bera təm, a dəbbe wa wai fʊlla wʊ hangʊ a nya yəm rəga nəb yəmrəmmi. ¹⁷ A fʊlla hi gʊn rii jiwʊ ni yʊweri Irmiya sʊwei, ¹⁸ "Kən nwi dagi jiir a Ramah, ti wi rə furdə yuluwʊn rə kwani, Rahila gə ti wi bərarə bətəm ba gəm, menni ka kwila mitangkadang, bəraki bəttəmhəm me we.'' ¹⁹ A fʊlla wʊn Hiridʊs a bwiyai, kə we təmri ya Nigrai a betənne wa Yʊsʊfuwi a dʊggam a Masar sotənə go, ²⁰ "Gʊn na dəb bwe hi tən nengʊ, na diya təm ba Isra'ilam, bəraki ba fau yuum ba bwe hiyəm ka bəttəro." ²¹ Yʊsʊfu ka gʊn, ka dəb bwe hi tən nengʊ, ka be rəga təm ba Isra'ilaməng. ²² Mənni hangʊ a nwi mo Arkilayʊs ka jau kʊla ten gʊ Hiridʊsi nəngnga dʊʊta Yahudiyang, ka nwi tata lautangnga gaiyʊ. A bukkə Niyajiyʊwa wʊtən suu a dʊgaməng, ka mʊl yɨgira təm ba Galiliyəmməng. ²³ Ka yɨga chiya dagi bɨr bərə mo Nazaredəng. Waiwa rii jiiwʊn sʊwe wa nyʊiya nəb yʊwerəmmi, mo, bən bu mo niya Nazaredi.