¹ Təm a silang, nəbbə gram bə tung jɨniyəm tən nəbbə gram ba nəbbəm ka bʊ bwi təggorə nyəngkə ba ju Yesʊ gərəng. ² Ka bʊwa hangʊwʊng, ka tungtəna nigra tau təmmi Bilatus. ³ A bukkə Yahuda, wa mii hangʊwi a chu kən mwetən duutətta jurangngi a Yesʊwiyəng, ka fau yunotanngəng, kə bo kaubwi rə chəmmərhən betə furtə bwanbi a gwa nəbbə gram bə tung jɨniyəm na bagi nəbbə gram ba nəbbəm. ⁴ Ka sʊwe go "Kən nəngnga jɨni bwirai a gwa miitangnga ni merə bwiranni." Mənni kə hanjim a sʊwe go, "Wʊlla dabən?" Nwi rə dʊr da mʊn! ⁵ Ka maisəre kweyəlga kəlbari a təma mʊra kanda rʊwani nyiniyən, ka dʊ hanjiməng, a diya kwai dʊr da gənəng. ⁶ Kə nigra nəbbə tung jɨniya chəriyəm a dəb kwetəyəlgaihəyəng a sʊwe go "Me nyagʊ nyəngkə soriya Mʊsai a sʊwe gəreng nən kabi rəga bɨni, bəra ki dʊwong ka dʊgəməng. ⁷ Ka bugo bwita jiyʊwʊng, chəmmərhən bo hanjim ka sʊta tariya nəbbə mʊra gʊti go na bən dɨga fʊbə wi. ⁸ Jiya dəg ki bərə gai mo "Tariya dʊgʊmi" bəra fʊlla waiwe. ⁹ Kə jɨn sʊwewa nyi a ni yʊwe yəmi Irimiya ri bwiyəng, sʊwerə go "Ka dəb kwetəyəlgai furtə bwanbi ye, dʊwong kə nəbba Isra'ilam a mwe dʊr da gənəm. ¹⁰ Ka nəbbən bəra sʊtangnga tariya ni mʊra gʊtti, nyəngkə Nigra swimən gərəng." ¹¹ Kən Yesʊ a siya kak ka nigra tau təmiyəng, kə nigra hi a gʊl hangʊ go "Mən Nidʊ wa Yahudawai ga?" Yesʊ ka ngatənna hangʊwi go, "Nyəngkə sʊwe rə gəng." ¹² Mənni nəbbə gram bə tung jɨniyəm tən bagi nəbbə gram bə kəratən nyatta hangʊwiyəm, hangʊwa sʊwe bə gʊji. ¹³ Kən Bilatus a sotənna hangʊwi go, "Me mən nwirə ji sʊrra mwiyʊ ga?" ¹⁴ Mənni a ngatən bə dagi bwan, kə ni grahi a nəngnga mənatangka bʊniyəng rə kwaniyəng. ¹⁵ A fʊlla bwiləmriyʊ, yobi a nigra tautəmi a jəg kwanna mʊra bən bʊwa na nəbba samənnəm. ¹⁶ A jii hi ka gʊ ni yəm rə yariyʊ wʊ ka jarəmi bərə mo Barabbasi. ¹⁷ Mənni hanjim a kʊra bwiyəng, Bilatus ka sotəna hanjimi go "Wʊnə gʊ tə farə to jagəmənnei? Barabbas ga, Yesʊ wʊn bərə mo Kristiyʊ ga?" ¹⁸ Bəra ki hangʊ ka yəm go hanjim a be rige bəra nungʊn. ¹⁹ Hangʊ ka chichi ya dəntələn da dʊʊtənəng, nyʊiyang gʊ ka təmtəne go "Jɨrməna jʊwi ya nihiyʊ, merə bwiran. Bəra ki kən no kʊnang kʊ rə kʊm we bəra nən hangʊ a mʊra dʊgam. ²⁰ A fʊlla hi nəbbə gram bə tung jɨniyəm tən bagi nəbbə gram ka wʊ furna nəbbi, go sʊwe go jəg giməne Barabbas, na ju Yesʊ. ²¹ Kə Nigra tau təmmi a gʊl hanjimi go "Wʊnə gʊ tə farə to jagəmənne kangngi? Kə hanjim ka sʊwe go, "Barabbas." ²² Bilatus ka sotənna hanjimi go "Wʊlai ji bən nəngnga nən Yesʊwi wʊ bərə mo Krisitiyu?" Kə waringəm ba jiyəm a nga go yʊwa riyang yʊwarang." ²³ Ka sʊwe go, "Bərə wʊlai, a nəngnga bwiran da nyənnən?" Ka mau wʊri rə kʊmni sʊwerə go yʊwa hangʊ a riyang yʊwarang." ²⁴ Mənni Bilatus a chu me ba dəmən a nəngnga gʊjiyəng, bəraki furna nəbbi ka gʊn, ka ma hiya a yəramən kanagʊ a kak ka nəbbəng, ka sʊwe go "Me mənə bwiran a dʊgʊm ba ni wʊ merə bwirani, "Tə nəngnga ji tə chu rə sərri" ²⁵ Nəbhəm warigʊ ka sʊwe go "Dʊ dʊgʊm ba gəm a chiya dʊtətta nənnʊ na bətəm ba nənnəm." ²⁶ Kən hangʊwa jamənne kangnga Barabbasəng, mənni ka nəngngatən səmbiya Yesʊwiyəng ka ne hanjim go yʊwa riyang yʊwarang. ²⁷ Kə nəbbə barə kərangəm ba nigra tau təmi a dəb Yesʊ a yɨgi gəra gʊ kʊnta nigra tau təmiyʊ ka kʊra nəbbə barə kərangngəm mwaməng. ²⁸ Kə hanjima jigamən dʊtta bwiyəng, ka maitən dʊgkə kwiyʊwʊngəng. ²⁹ Ka butən gʊrmong ka tʊttəng a dʊrrəng, kə bo ne jwal a kang kə nyang ka gəng. Ka rʊwa kak ka gəngngəng nəngngatən nʊr sʊwere go, kota mʊm a lang "Nidʊ a Yahudawai." ³⁰ Ka sugotən sugəməməng, ka yəmən jwalhənəng, kə barə damər a dʊr a jiya jiyəng. ³¹ A bukka nəngngatən nʊrəng, ka jəgmən dʊk ka dʊʊbəngəng, ka dʊttən dʊtəttang gʊwʊng, ka di nən hangʊ a gʊ bən yʊwa hangʊwiyəng. ³² Hanjim a jɨrowa tariyəng, ka nya gʊ ni Kʊrame dʊn da gən mo Saminu, wʊ hanjim a dəg kwak go tə diya kin na dəb riyang yʊwarangəngi. ³³ Ka lauwe gʊka bərə mo Golgottai, wʊ sʊwere mo "Gwa kʊsiyʊ" ³⁴ Ka ne hiya beta ritiyʊ wʊ mʊrga rə yagi jɨni teretəi. Mənni a məbrang, ka kwila notangngəng. ³⁵ A bukka yʊwang hangʊ a riyang yʊwarangngəng, hanjim a gʊn nəngnga ligori a jiya dʊkgənəng. ³⁶ Ka chiro chiroi jiga hangʊwʊng. ³⁷ A jitta dʊr da gəni, kən mʊlatən bwiran da gən mo, "Waiwe nən Yesʊ, Nidʊwa Yahudawai. ³⁸ Yʊwa hangʊ tən kʊbe bəsʊ, kwan a kang kə nyang, kwan a kang kə gwilang. ³⁹ Be surəm ki kəbareng hangʊ, məga dʊtəttan jiyʊ, ⁴⁰ mənni sʊwerə go, "Mwe sʊwe mo bən nyəng kanda rʊwaninyiniyən, mo bən mʊ a kote tə bwanbiyeng, jəg dʊr da mʊn! Kəmən Yəlla Niyajiyʊwi ki, sʊwe wa riyang yʊwarang." ⁴¹ Nən nyang bo nəbbə gram bə tung jɨniyəm ka nʊ nʊr, tən nəb mʊlarəm na nəbbə graməm, sʊwerə go." ⁴² Ka jəg bagi, mənni a dəmən ba jəg dʊr da gən. Gən Nidʊ wa Israilai. Go, sʊwe wa riyang yʊwarang, ki bənən nga nən mwə. ⁴³ Hangʊ ka nga rə Niyajiyʊwʊng, masi Niyajiyʊwʊ a jəg hangʊ, kə Niyajiyʊ ka fau ki, a jamən hangʊ. Bəra ki kasʊwe go "Mən Yəlla Niyajiyʊwi." ⁴⁴ A nyangngi kʊbe bən yʊwa kinəm ka kəba hangʊ. ⁴⁵ Rə jugər da kon nəng təm ka nəngnga yullu warigʊ yɨgira jii n'bwanbi rə yʊwi. ⁴⁶ A fʊlla bwanbiyʊ, Yesʊ ka tiwi rə jiir rə kʊmni go "Eli Eli lama sabachthani?" wʊ bə sʊwe go, Niyajiyʊ wa miyʊ, Niyajiyʊ wa miyʊ, wʊla ma kin ni yəliyəng?." ⁴⁷ Bə ka sira gaiyəm a nwi nyangngəng, ka sʊwe go, "Bə bʊng Iliya." ⁴⁸ Rə kwa-rə kwang, gʊwan jiyʊ ka mwa sək a dəb gʊsur, a dəgge wa hiya inabiyʊ wʊ mʊgrəmʊgi, ka bʊtənna jʊmang, nerəng hangʊ go na no. ⁴⁹ Kə bagi ba jiyim a sʊwe go "Tə dʊ hangʊ. Na tənnən chu kən Iliya ba be jəg hangʊ ki." ⁵⁰ Kən Yesʊ a gʊg jiir rə kʊmni deniyəng a tiwiyəng bo, ka jamən kangnga weng gʊwʊng. ⁵¹ Kə dʊgkə kwaiya kanda nyini rʊwaniyən a yərowa ji bera təməng. Təm ka məga bwi wete ka bʊsa, ⁵² Sute ka wʊmomən bwi bərə Yʊlgoiyəm bəna dara dʊmni mwaməm ka gʊno. ⁵³ Ka jɨrowa sute a buk ka gʊntan kagəng, ka dɨga bɨrdə Yʊlgoiyənəng, a jɨr təne wa nəb mwam. ⁵⁴ Nigra nəbbə barə kərangngəm ba chi jiga Yesʊwʊm a chu nyəngke təma məga bwi gərəng, na jɨna nəngnga bwiyʊwiyəng, ka nwi tate deniyəng ka sʊwe go "Bə nyam bwe we Yilla Niyajiyʊwi." ⁵⁵ Nyʊim mwam ka fʊngnge Yesʊ a Galili go na tə chu hangʊ ka sira pre jigarəng. ⁵⁶ A mʊra nyʊimhəm, ka Maryamʊ Magadaliya we, Maryamʊ ne Yakʊbʊ tən Yʊsʊfuwi, na ne bətəmba Zabadiyəmi. ⁵⁷ Rə yʊwʊng, ni rə jɨna kaniyʊ niya Armatiyai, wʊrə dʊn mo Yʊsʊfu, gərə kəgang bwira Yesʊwi. ⁵⁸ Ka yɨgiya a gwa Bilatussi go nəggəne bwiya Yesʊwi. Kən Bilatus a nəbbən sər go neng. ⁵⁹ Kən Yʊsʊfu a dəb bwihiyəng, ka məra rə dʊkə kawʊng kə Yʊlgoiyəng. ⁶⁰ Ka dɨga su figʊwiya gʊ wa sul a mʊra weti, ka wʊwe wer a məra nyiya suhiyʊ gərəng ka diyəng. ⁶¹ Maryamʊ Magadaliya tən Maryamʊ wʊ kwani, hanjim ka gai a chi jəggarə tən suhi. ⁶² Təm a silang, a buk ka yəngnatanga bwiyəng, kə nəbbə gram bə tung jɨniyəm tən Farisawa ka kʊra bwi a gwan Bilatussi. ⁶³ Ka sʊwe go "Bəksər, kənən kəma rə jiwʊ ni jʊlla nəbbi fʊla karə yuumi a sʊwei go, "A buk ka kotettə bwanbiyəng bən gʊn." ⁶⁴ Bərarə nyang nəbbən dəg nan to suhi kotəttə bwanbi, me nən nyangki məssarbə ba gəm ba be kʊ hangʊ ki ka sotəna nəb go "Ka gʊna bwiyate, 'Mənni jʊllai a mwatənti ba li wʊrə jigʊwi rə bwiragʊwi." ⁶⁵ Bilatus a sotən go "Tə dəb nəb torən. Tə to nyəng ka dautənwʊng." ⁶⁶ Ka diya yigi torə suhiyəng, ka bautən kʊran a ji ya wer, ka dəg nəb torəməng.