¹ A jii Yesʊ a mwarmən sutangnga bwantəttai tə warigʊwʊng, ka sotənna bwiranəm ba gəm. ² "Kətə yəm to a bukka kote təsʊ wrag kibwiləmriya yaurangngi ka bere, mənni bo bən nəbbən Yəlliya Niyu yuwa riyang yuwarang. ³ Mənni kə nəbbə gram bə tung jɨni a chəriya Niyajiyʊwʊm tən bagi nəbbə gram ka kʊra bwi a kaita dʊʊtə ta nigra nəbbə tung jɨni a chəriya Niyajiyʊwʊm, wʊ bərə mo Kayafai. ⁴ Ka bu bwitan jiyʊ nyəngkə ba tau Yesʊ a kəlukəlu bwi na tə juwʊng. ⁵ Mənni kə sugarə go "Mənni me a jii ya bwləmriyʊ bɨri furna nəbbi ba gʊn. ⁶ A bukkə Yesʊ ka Baita'anyang a kaita Saminu wʊrə bugabwiri. ⁷ A jii hangʊwa təssu-tussəsi bwi a ganang kən jarə jɨni jauriwʊng, kə gʊ nyʊi a diggiye rə nʊng kərə dʊwonəng deniyəng a gʊtto, ka kwitəna Yesʊ a dʊrəng. ⁸ Mənni bwiranəm ba gəm a chu nyangəng, ka nwi jwaggər a sʊwe go, wʊlai jiya dəg ki nəngnga wai yariyəng? ⁹ Mənna mii a chəmmər mwam na wʊtugotənna bə meri gəm". ¹⁰ Na Yesʊ ka yəm jɨnin yaiyəng, ka sotənna hanjimi go, wʊla ma ki tə da nyʊiwʊng? Ka nəngnga ji nya bɨra nən me. ¹¹ Tə ka tən nəbbə rə bunənnəm jutəkwang, mənni me me bənən chi kin jʊtəkwang. ¹² A fʊlla kwi nʊng kangke a bwiyaiyuwʊng, a nəngnga nyang bɨra dəgtang kə bən dəgiyəng. ¹³ Bə nyam kə mən sʊgəmənne, gʊ bən wau yəm bə ləmmangəmma gʊsəti warigʊwi, ji nyʊiwa nəngngai kən chi sʊwere bɨri kəmmatang nə hangʊ. ¹⁴ Kə kwan a mʊra bə kwʊ a jiir bəsʊwʊm wʊ dʊnda gən mo Yahuda Iskariyotiyu, ka diya nəbbə gram bə tung jɨni a chəriya Niyajiyʊwʊm, ¹⁵ ka sʊwe go "Wʊlai ji tə farə to bətə niyu na yak gəmən hangʊwi?" Ka bɨngottən chəmmər beetə furtə bwanbiyəng. ¹⁶ A dəb a wai jii hi hangʊ ka chi farə fʊlla wʊ ba nya sər ki ba nəbbən hangʊwi a gwa hanjimi. ¹⁷ A korə jigʊ wa mwantəttə fʊm-fʊmi tə merə bariyʊ, bwiranəm ba gəm ka betənewa Yesʊwi a sotən go "Mən fau mo nən yingnanən gʊ bən jau jɨni jauriya bwiləmriya yautangngi a le?" ¹⁸ Hangʊ ka sotən go, "Tə dɨgiya bɨr a gwa gʊ nyʊiyu tə sotən to, Ni Məsari a sʊwe go fʊlla miyʊ ka lauwe rə do. Bən jau jɨni jauriya bwiləmriya yautangngi a kai ta mʊ, nən bwiranəm ba miyəm. ¹⁹ Kə bwiranəm həm a nəngnga nyəngkə Yesʊ a a sotən rəgəng, ka yəngna jɨni jauriya bwiləmriya yautangngyəng. ²⁰ Yuwa mang, ka chichi go na tə jau tən bwiranəm ba gəm bə kwʊ a jiir bəsʊwʊm. ²¹ A jiwʊn hanjim ka jarəng, ka sotən go, "Bə nyam kəmən sʊgəməne kwan a mʊra jɨnnu ba mii." ²² Hanjim ka nwi furdə yiluwʊn deni, nən wʊna jiyʊ ka su gʊllen hangʊw, kwan, kwan, "yəmbə nyam me nən me ga Nigra?" ²³ Ka ngatən go, "Wʊ nən dəg kang kwang a kasiyʊ gʊ ba miiyʊ. ²⁴ Yəlla Niyʊ ba di nyəngkə mʊla gra dʊr da gənəng. Mənni ji ya kʊnangngi rə nihi wa mii Yəlla Niyʊ. Ba li nyagʊ a nihi kən bəbə nihiyəng." ²⁵ Yahuda wʊ ba nəbbən hangʊwi ka sʊwe go "Ni Məssari nən məga?" Kən sʊwerə bwi mo." ²⁶ Ji hanjim ka jautangngi kən Yesʊ a dəb mwan də fʊm-fʊmən a dəgtən kangngəng, ka kətəlang. Ka ne məssarbəng, ka sʊwe go "Tə yʊ tə jau. Waiwe bwiya miyʊ." ²⁷ Ka dəb chʊlləng a nəngngatən wʊnanəng, ka ne hanjiməng, ka sʊwe go, Tə no waringəm ba jɨnəm." ²⁸ Bambə dʊgʊm ba miyəm ba yəm bʊrəməm bən kwi bərarə yunotang ka jɨni bwiraiya nəb mwamiyəng. ²⁹ Mənni kən sʊgəmən, me bən kaubwi nən no hiya inabiyʊ, yɨgira ko bən nən no kin fiyʊgʊ a mʊra dʊʊtətta Te miyʊwi." ³⁰ A ma fiyangngəng, ka diya bang ka Zaitunəng. ³¹ Kən Yesʊ a sotənna hanjimi go, "Waringəm ba jɨnnu bətə kʊwo a kʊm waiwe bǝra nən me. Bəraki mʊla-mʊlang "Bən bau ni yari, mənni mata kʊlmorhəni bo ba kʊwo. ³² Mənni a bukkə gʊgiyəng, ba luggən rə yɨgitang a Galili." ³³ Mənni kə Bitrus a sotənna hangʊwi go "Kə na nʊ bagi warigʊ ba yərra bəra nən mʊwe ki, me mebən yar" ³⁴ Yesʊ ka sotənna hangʊwi go "Bə nyam kəmən sʊnənne, a kʊm waiwe bən jau bʊriya miyʊ kali tə bwanbi ki mənni kolong a dʊlga." ³⁵ Bitrus a sotənna hangʊwi go, ki na bənən bwiya kin ki, me bən jau bʊriya mʊ" Kə bagi məssarba sʊwe nyang rə kigiyəngəng." ³⁶ Kən Yesʊ a diya tən hanjim a gʊ bərə mo Getsaimani ka sotənna məssarbə ba gəm go "Tə chiya gwe, na kən kəra kak na rʊwanyini". Ka dəb Bitrus tən yəlləm ba Zabadiyəm, ³⁷ bəsʊ,ka sʊ nəngnga fur də yulluwʊnəng rə bʊmte. ³⁸ Ka sotənna hanjimi go, "Nər da miyən wa mʊriya kʊnnang deni, yɨgira bwiyate. "Tə chiya gwe tənə yamme kin." ³⁹ Ka kər bani, ka səg kak ka gəng, ka rʊwani nyiniyəng, ka sʊwe go, "Te miyʊ, ba nəngnga bwi ki, masi wai chʊlle wa sʊmən a mi. Mənni nyang, me kəmarang ka miyəng mənni kʊmʊng." ⁴⁰ Ka kauwe bwi a gwa məssarbə ba gəmi a nya hanjim wa mʊra dʊməng, ka sotənna Bitrus go, "Wʊllai, me bətə yam nən me a jii kwanni ga?" ⁴¹ Tə chi tə yam bo, tə rʊwa nyini na ba kari bətə dɨgiya bɨngorang. We ka nga mənni bwi merə kʊmni. ⁴² Ka kaubwi kən sʊwʊng, ka rʊwa nyini, ka sʊwe go "Te miyʊ, kə wai wʊ me ba su ki, na chi bwi no ki, dʊ kəmarang ka mʊng a ri bwi. ⁴³ Ka kauwe bwi bong, a nya hanjim wa dʊm, bərakə kəmta jiyʊ ka nəngnga nəggən. ⁴⁴ Ka dʊ hamjim bo a kaubwi, a di kalang kə bwanbiyəng rʊwanyʊini, sure bwantəttə kwani. ⁴⁵ Kən Yesʊ a kauwe bwi a gwa məssarbə ba gəm ka sotən go, lauweretən kʊ tʊwa dʊm tə gɨrmənnə ga? Chu fʊlla ka lauwe, mənni kən nəbbən Yəlla Niyʊ a kang ka nəb bərə jɨni bwiraiyəm. ⁴⁶ Tə gʊn, tənən diya. Tə jəga "Wʊ ba miyʊ ka lauwe rə do." ⁴⁷ Ka jiya yəməng, Yahuda, kwan a mʊra bə kwʊ a jiir bəsʊwʊm, ka be. A diye tən kʊlən də mwam, a gwa nəbbə gram bə tung jɨni a chəriya Niyajiyʊwiyəm tən bagi nəbbə gram ba nəbbəm. A bə nən dampote na gʊlgirte. ⁴⁸ Ni ba mii Yesʊwi ka nʊng ji ba nəngngai ki hanjim ba tauwi, sʊweri go "Wʊ bən kʊmi ki, nən ge. Tə tau. ⁴⁹ Rə kwak rə kwang ka lauwe a gwa Yesʊwi ka sʊwe go "Sʊrang no Ni Məssari, ka kʊməng. ⁵⁰ Kən Yesʊ a sotənna hangʊwi go, "Chimi nəngnga jiya be nən mwi" hanjim a lawəng, ka tiyatən kana Yesʊwi, a tauwʊng. ⁵¹ A gaiyəng, kwana mʊra bə ka tən Yesʊwʊm ka jige dampo a mwemən su a gʊ bwira Nigra tung jɨni yʊ. ⁵² Kən Yesʊ a sotənna hangʊwi go "Kaubwi rə dampo mʊ a mʊra kʊngiyang gʊ, bəra ki wa dəb dampoi, gə rə kəgang bən ju nən dampo. ⁵³ Mən kəmma mo me bən dəmən buwe Te miyʊ, a təme weni təmri ya li kʊltə kwʊ a jiir təsʊwi ga? ⁵⁴ Mənni bən nəngnga mo nyənnə ki, bən ri ji wang a sʊwei go chi kwak wai ji a nəngnga bwiyʊ?" ⁵⁵ A fʊlla hi Yesʊ ka sotənna kʊlənhən go, "Tə betəna mi rə damopote rə gʊlgərte natə tai nyəra gən da nikʊwʊn ga? Wʊnə ko mən ka chiya kanda nyini rʊwaniyən mən nəngnga məssarang, mənni tə tai be. ⁵⁶ Mənni jɨni yaiye a nəngnga bwi na ba ri ji nəbbən yʊwe yəməm a mʊlai. Bukka nyangəng məssarbə ka mwarang. ⁵⁷ Ba tau Yesʊwʊm ka di rega a gwan Kayafai nigra nəbbə tung jɨni chəriyəm, tən gwa nəb mʊlarəm, na nəbbə gram ba nəbbəm a kʊra bwitʊwi. ⁵⁸ Mənni Bitrus ka fʊng hangʊ a buk pre, yɨgira a gwa nigra tung jɨni a chəriya Niyajiyʊwi, ka dɨgiya chichiyəng tə nəbbə tor təməm go na gə chu ji bə nəngngai. ⁵⁹ A fʊlla hi nəbbə gram bə tung jɨni a chəriya Niyajiyʊwʊm tən nəbbə rə kʊlgəntettə kʊntaiyəm ka sʊ farə butang ka swirəng ka nyatəng a jiyan Yesʊwi, gona tə ju. ⁶⁰ Mənni a nya bə gʊji, nən kwini bə bu bə bukka nyatəm mwam ka birawe. Mənni bagi bəsʊ ka jɨre, ⁶¹ ka sʊwe go, "Ni waiwe a sʊwe go, bə gə dəmən gə nyəng kanda rʊwani nyiniya Niyajiyʊwʊn, na bo gəbə mʊ a kotəttə bwanbi." ⁶² Kə nigra tung jɨniyʊ a gʊna sissiyəng, ka sotənna hangʊwi go, "Me bən sʊwe gʊji ga? Bənə yəm gəbə sʊwera dʊr da mʊnnəm? ⁶³ Mənni Yesʊ ka masi. Kə nigra tung jɨniyʊ a sotənna hangʊwi go "Kən mʊrgan rə dʊn da Niyajiyʊ rə yuumi, sʊbəmmən kə mən nən Kristi Yəlla Niyajiyʊwi ki." ⁶⁴ Kən Yesʊ a ngatən go, "Kən sʊwe rə nyiya mʊ. Mənni kə mən sʊnnənne, a dəba kʊ bən chu Yəlla Niyʊ a chichiya kang kə nyang ka wʊrə kʊmniyəng, bera kortətta jiyʊ." ⁶⁵ Kə nigra tung jɨniya chəriyʊ a yiro dʊttətang gʊ, sʊwere go, Ka sʊ bwandə bwiran, Wʊla ma kitə fauwe bagi yəm a dʊra giyəng? Tə chu, kʊ kəttə nwi nyəngka sʊ yəm bə bwiram gərəng. ⁶⁶ Kəmmarang ka jɨnəng wʊlai? Kə hanjim a nga sʊwere go "Ka dau ju." ⁶⁷ Kə sʊgtən sʊgʊm a kak gəng, kə bo bʊgtə rə kana jiyʊwʊng. ⁶⁸ Ka sʊwere go "Sʊbəmən yəm yʊwerang, mwe Kristi. Wʊna ga ban. ⁶⁹ Bitrus ka chi chi a tari a sʊgəm kə gʊ bwe chʊwi kewei a be a gwa hangʊwi sʊwere go, "Mənna nʊ tən Yesʊ a Galili." ⁷⁰ Mənni ka jau buri nyang a kak ka jiyəng, ka sʊwe go "Yəmbə ji mən sʊ yəma jiyʊ. ⁷¹ A jiir yɨgira nyiya fʊgangngiyəng a gai bo gʊ bwe chʊwi kewe a chu hangʊwʊng, kə sotənna bə ka gaiyəm go "Ni waiwe na nʊ tən Yesʊ a Nazaredi". ⁷² Ka jau buri bo rə bautangnga bʊni sʊwere go "Yəmbe ni waiwe. ⁷³ A buk ka fʊlla baniyəng bagi bə ka sira siraiyəm ka be a gwa Bitrusi ka sotən go, "Bə nyam mən ka mʊriya kwan na jiyʊ, bəra ki langngər da mʊn ka dəggan" ⁷⁴ Ka sʊ bʊwa bʊnita nəngngatang nyiyəng sʊwere go "Yəmbe wai ni waiwe" rə kwa rə kwang kolang ka dʊlga. ⁷⁵ Bitrus ka kəma rə yəmbə Yesʊ a sotənəm "Go ba jau buri yang gʊ kali tə bwanbi ki mənni kolong ba dʊlga." Ka jɨra tari a ti wi deniyəng.