¹ Dʊʊtətta jiyʊ ba chi nyararə bwi be ba dəb gʊngortətta kərangngi go nate yame bweli rə nati. ² Bə nu mɨte bə nʊ bərə bərsanəm. ³ A jii wʊ bə mɨtəm bə a dəb gʊngortətta kərangngi a dəbbə nʊng kə ba yəgtənəng. ⁴ Mənni bərə bərsanəm be ka dəb gʊngortətta kərangngi tan jiyʊ rə tagi nungər a gʊlte. ⁵ Bwelihi a langngəng, waringəm ba jiyəm dʊm ka dəb. ⁶ Mənni rə jʊgər da kʊmənəng, kən nwi finang mo bweli rə nati ka lauwe. Tə jurowe tənən yʊwe hangʊ. ⁷ Kə bətəm chʊwʊm həm waringəm a gʊno tungo kərtəttan jiyʊwʊng. ⁸ Be mɨtəm ka sotənna bə rə bərsanəm go, tə nəbbəmən nʊng ka jinəng bani, bəra ki kərang ka nənəng kə dʊmore. ⁹ Mənni bərə bərsanəm a sotən go, 'Nunghəng me ba labəmən tənən kin tə diya tə sʊtatəne wa dʊtətta jɨnu nʊng a gwa nəbbə mirəm. ¹⁰ A buk ka diya sʊtawʊre nʊnghəngəng, kə bweli rə nati ya dɨgiyəng. Kə ba buwa bwiyəm a dɨgi kin a gwa jɨni jaura natiyəng, kən məra fʊgangngəng. ¹¹ A buk ka fʊlla baniyəg bətəm chʊwʊm həm ka kauwe bwi sʊwerə go, 'Nigra, nigra wʊm bəməm fʊgang.' ¹² Mənni ka nga a sotən go, "Yəm bə nyam kə mən sʊgəməne, yəmgən be. ¹³ Bərarə nyang, tə chi rə yəmtang bəraki tə yəmbe ko tən jii. ¹⁴ Bəraki ba chi nyəra gʊ ni ba diya bagi təmi, ka buwowe bwiranəm ba gəm, ka wʊtugotən gəna gʊwʊng. ¹⁵ Ka ne gʊ chəmmər bətə tə nu, gʊ bətə təsʊ, gʊ bo bə kwan. Wʊne ki kən ne nyəngke ba dəmən gəreng, kə nihiya di yom ba gəməng. ¹⁶ Rə kwa rə kwang, wʊn ne betə tə nʊwi ka nəngnga dʊwong ge, ka nya hiya ji betəttə nʊ. ¹⁷ Nən nyang wa yʊ təsʊwi ka nya hiya ji betə tesʊ. ¹⁸ Mənni wa yʊ be kwani we ka di yom ba gəm, a gʊlla bwa a dəg chəmmər da ni rə kai ya gʊwʊn a mʊri. ¹⁹ A buk ka dəb fʊlla mwaməng ni rə kaiya bwiranəmhəmi ka kauwe bwi go nagə ke chəmmər da gən. ²⁰ Bwira yʊ tə nʊwi we, ka beri hi, yagi betəttə nuwi. Ka sʊwe go, ni rə kaiyʊ kən ni bete tə nʊ kən nyawe hi bete tə nʊ. ²¹ Kə nirə kaiyang gʊ a sotən go nyagʊ bwira wʊn nga rigi, kən nəngnga nyagʊ a jɨni bani, bən dəgəna jɨni mwami. Dɨgiya fur də kwau wʊn da ni rə kaiyʊ wa mʊwʊn. ²² Bwira yʊ betə tesʊwi ka be a sʊwe go, ni rə kaiya miyʊ, ni betə təsʊ. Chu kən nyawe hiya ji betə təsʊ. ²³ Kə ni rə kaiyʊ wan gʊ a sotən go, 'Nyagʊ mwe bwira wʊn nga rəgi kən nəngnga ji nya a jɨni bani rigo. Mən dəgəna jɨni mwami. Dɨgiya fur də kwauwʊn da nire kaiya mʊwʊn. ²⁴ Kə bwira yʊ be kwani a be sʊwe go ni rə kaiyʊ, kən yəm mənən kweu. Ka mən harre a gʊn wabʊwi, mənni bo ka mən kʊrare a gʊn wasibʊwi. ²⁵ Kən nwi tate bəra nyang kən yɨgi məra chəmmər da mʊn a bwa. Chu yʊ jiya mʊ. ²⁶ Mənni kə ni rə kaiyʊ wang gʊ a nga sotən go, 'Mwe mən ka bwiragʊ, bwira rə bʊnənni, kən yəm mo ka mən harre a gʊn wabʊwi, ka mən kʊrare a gʊn wassəbʊwi. ²⁷ Mənni nabən di rə chəmmər da miyən tiya bənni ti chəmmər wi na bən kauwe bwi ki kən yʊ chəmmər da miyən rə hi. ²⁸ Bərarə nyang tə yəmən be kwani hi tə ne wʊre betə kwʊwiwe. ²⁹ Bərarə nyang wʊ karə mwami bən yɨgtən mwam deni. Mənni wʊ merə gʊjiyʊ ji karəgi bən yəmən. ³⁰ Tə mau bwira waiwe wʊ merə finiyʊ a gʊrə kʊmi na wʊluloliyʊ gʊn tirowitiwi na kərsə nungti. ³¹ A buk kə Yəlliya Niyʊ ba be a mʊra gratəttangʊwʊng, gə tən weni təmri yang gʊ, ba chi a dəntələn də nyan da gəni. ³² A kak ka gəng bən kʊra nəbba gʊsətəm warigʊ, bən wʊtʊgo nəb dəndang nyəngki yari jəgga mate tən bitəng. ³³ Ba kwi mate a kang kə nyang ka gəng, mənni bite a kang kə gwilang kang gəng. ³⁴ Mənni Nidʊhi ba sotəna ba kang kə nyangəm, 'Tə be jɨn bə Te miyʊ a dəgəmən kangngəm, tə dɨgiya dʊʊtəttə yəngna bəra nən jɨni a ji nəngnga gʊsəti. ³⁵ Bəraki kən nwi jʊwʊn kətə ni jɨni jauri, kən nwi hi kʊgri kətə ni hi, kən nəngnga fʊte kətə ni gʊ dari. ³⁶ Me məne dʊʊte kete ni dʊʊte, kən da bwate kətə jəggai, mən ka jarəm kətə yɨgi tə jəggaiye. ³⁷ Mənni be rə yobi nyaiyəm ba ngatən a sʊwe go, 'Nigra nən chʊn hale mən nwi jʊwʊn mənni nən nən jɨni jauri? Hallə gə hiya kʊgən kənən nən hi nong? ³⁸ Halle gʊn be fʊti nən nən gʊ dariyʊ? Halle bo me mene dʊʊte kənən nən dʊʊtəng? ³⁹ Halle gʊ nən chun mʊwa bwate, na mʊra jarəm na nən yɨgi nən sənnai? ⁴⁰ Mənni Nidʊhi ba ngatən a sotən go, yəm bə nyam kəmən sʊgəməne, jɨni tə nəngnga təna kwan a yarmən a mʊra chətətta miyʊwi tə nəngngatəna mi. ⁴¹ Mənni ba sotənna bə ka kang kə gwilangngəm, 'Tə diməna mi, jɨn bən nəngngəmən nyʊim, tə diya a mʊra kərang kən nəngngatəna nidʊwa gʊssəti tən weni bwiraiyagʊwʊng. ⁴² Bəra ki, mən nwi jʊwʊn tə ni be jɨni jauri, mən nwi hi kʊgri tə ni bə hi. ⁴³ Kən be fʊte mənni tə ni bə gʊ dari, me mənə dʊʊte tə ni bə dʊʊte, mʊwa bwate, na bo a mʊra jarəm tə yɨgi be tə jigaiye. ⁴⁴ Mənni hanjim ka ngatən a sʊwe go, 'Nigra halle gʊ nən chun mən nwi jʊnni, na mən nwi hi kʊgri, na be fʊte, me mənə dʊʊte, mʊwa bwate, na bo jarəm na nən tʊgan bi? ⁴⁵ Hangʊ ba ngatən a sʊwe go, kə mən sʊgəməne yəm bə nyam ji tə dəmən bə tə nəngngatənna ba yarmən a jɨni yaiyəm, tə nəngngai mən be. ⁴⁶ Hanjim ba diya mʊra kʊnang kə kʊrəkwangən, mənni bərə yəm bə nyaməm ba dɨgiya yuum bə kʊrəkwangəm.