¹ Yesʊ ka jɨrməna kanda rʊwaninyiyən, ka tau jʊwiya gʊwʊng. Məssarbə ba gəm ka be nʊng rə hangʊ kanda nyini rʊwaniyən. ² Mənni ka ngatəna hanjimi go, "Kətə chu jɨni yaiye warigʊ? Kəmən sʊgəmən yəm bə nyam mərə wer də bən dʊwa dagaiyya jiyən, də mebə nyəngən. ³ A fʊla hangʊwa chiya wer da Zaituni, məssarbə ba gəm ka be nya hangʊ a kɨlʊkɨlʊwi bwi ka sotən ngo, sʊbəmən, yai jɨni ba nəngnga bwi halle? Wʊlai ji ba nʊngbən betang ka mʊngngi, na jitang ka gʊsətəng? ⁴ Yesʊ ka ngatən a sʊwe go, "Tə nəngnga den kari gʊ ba julla gən" ⁵ Bəra ki bagi ba be a mʊra dʊn da miyən. Ba sʊwe go, memən Kristi, mənni bo ba dəg bagi mwam a lira. ⁶ Bətə nwi yəmniya kʊnni, bətə nwi si finang ka kʊnəng. Tə nəngnga den kari bətə nwi tate, bəra ki a chi kwak jɨni yaiye a nəngnga bwi; mənni mwatanta a lambə lauwerə fu. ⁷ Bərarə nyang bagi təm ba gʊntənna bagi təm, bo dʊʊte ba gʊntəna dʊʊte. Bən nəngnga jʊwʊn rə kitti a gani dəndang. ⁸ Mənni jɨni yaiye warigʊ, sʊtang ka bwarda buwʊngəng bwigi. ⁹ A buk ka nyangngəng bən di nən jɨn nəggən kʊnnang deni, ba juwo gən. Nəb warigʊ ba kwilagən bəra rə dʊn da miyən. ¹⁰ A nyangngi bagi ba təlnani, bagi ba mi bagi na kwila bwita jiyʊ. ¹¹ Nəb yʊwerəm ba nyatəm mwam ba gʊne ba dəg bagi a sei. ¹² Bəra ki yobi bwira ba nəngnga mwam, yodai a mwami ba nəngngna lattiti. ¹³ Mənni wa bi fur yɨgira jitangni bən jəg. ¹⁴ Bən wau yəm ba dʊʊtəm a gʊsəte warigʊ na chi jiya sʊwetangngi a gwa gʊsəti warigʊ. Ki mwatəntatə ka be. ¹⁵ Bərarə nyang tə chu jɨni bwirai nəngnga bwi rə kiyatang kə ni yʊwe yəmi Daniyel a sʊwe yəma jiyəng ki, a siya a gwa Yʊlgoiyʊ (Masi ni keri a jəgga), ¹⁶ "masi bəka Yahudiyam a mwara səgni yɨgira bangngərte, ¹⁷ masi wʊ ka bəlliya kaniyʊ kari ba suwe go gə dəb mən gʊjiya a kaitang gʊ. ¹⁸ mənni bo wʊ ka kuwi kari ba diyewa kai go gə dəb dʊg kə kʊntang ka gəng. ¹⁹ Mənni jiya kʊnangni a bərə futəm na bərə bətəbi no yʊte a kotihiyəm! ²⁰ Tə rʊwa nyini kari səgniya jɨnnu ba chi ya fʊlla gʊwi na ko gəriyʊ. ²¹ Bəra ki bə no kʊnang deni, wʊ nəngngamən bʊwi a sʊtang ka gʊsətəng bere kʊ, O O me bən kaubwi nəngnga kang ke. ²² Mamən bə kotə ki merə gʊ ni na ba nga jɨrtangni. Mənni bəra rə bən samənəm, bən mamən kote. ²³ A nyangngi gʊ a sʊgəmən go tə jiga Kristi gwe, go Kristi gʊrerə ki" kari bətə nga. ²⁴ Ba na Kristi a nyati, na nəbbə yʊwe yəm ba nyatəm, tən nəbbən jəgrəm ba be nəngnga yagi jɨniya mənatangnga bʊniyʊ, na ba tə dəg bagi a yira mʊri, mənni a nəngnga bwi rə bə samənsauwiyem. ²⁵ Tə chu kən sʊgəmən fʊlla hi a lauwe be. ²⁶ Bəra rə nyang, a sʊgəmən go 'n'gʊrera se mʊri ki, 'kari bətə yɨgi, a sʊgəmən go n'gʊrera Kanda mʊriyən ki kari ti nəbbn yəm bə nyam. ²⁷ Nyəngkə nyəlbatang kə nyəlbare a tur ki ka kəlba a yʊwʊng, nən nyang rə betang ka yəlliya niyʊwʊng. ²⁸ Gʊ jiya bwiya bwiyaiyʊ kawi n'gʊ jaltəbʊni kʊra bwi wi. ²⁹ Mənni rə kwa rə kwa a buk kə nəngnga yai kotə ya kʊnangngi ki ko ba nəngnga yullu, swang me ba nəbbən kwetərrei, betə swangngi ba yərawe, kʊmnita jiyʊ ba məga bwi. ³⁰ Kə mənni nungtang ka betang ka yəlliya niyʊwʊng bən chu a ji, mənni langtətta gʊsətə warigʊ ba nwi rə fur də yuluwʊn. Ba chu yəlliya niyʊ bera korta jii rə kʊmni rə netangnga grate. ³¹ Ba təme weni təmriya gʊ rə jiir da risiyən rə kʊmni, mənni bo ba kʊra bən samənnəm a gani kɨngri tə gwariye, a jitang ka jiyəng yɨgira jitang ka kagi kɨngngəng. ³² Tə məssaməna riyang ka jaurangngəng. Nyəngkə fare go gə sʊwang, bətə yəm to jʊswang ka diye rə do. ³³ Nən nyang, tə chu jɨni yaiye ki, ka nəngnga nyagʊ tə yəm to ka be rə do a nyiya fʊgangngi. ³⁴ Kəmən sʊgəmən yəm bə nyam, bam daam bambe me ba su jɨni yaiye warigʊ ba nəngnga bwi. ³⁵ Jii tən təm ba su, mənni bwantətta miyʊ meba su. ³⁶ Mənni a jiya kohi merə wa yəmi, weni təmriya jiyʊ a yəmbe, Yəlli hi a yəmbe, Tehi gən kwan ga yəm. ³⁷ Ngəngka nəngnga bwi rəga kota Nuhuwiyəng, ba nəngnga bwi nyang rə betang ka yəlla niyʊwʊng. ³⁸ A mʊra yai kotə ye a ji hiya lambə beri ka jare, ka nore, ka nəbbən nate, ka nəngnga wʊre nate, lauwe ra fʊlla Nuhu a dɨgiya bontəlongngi, ³⁹ hanjim ka sʊssəlliyəng hi ka be yi hanjim-ba chi nyang rə betang ka yəlliya niyʊwʊng. ⁴⁰ Mənni bən nya nəb bəsʊ a sei- bən dəbmən kwan, n'dʊ kwan. ⁴¹ Bən nya nyʊim besʊ kwa ner, bən dəbmən kwan dʊ kwan. ⁴² Bərarə nyang tə chi rə yəmtang, bəra ki tə yəmbə ko Nigra jɨnʊ ba be rəgi. ⁴³ Mənni tə yəm kang ke, lʊngo ni rə kaiyʊ ka yəm fʊlla nikʊ ba be rə kʊmi ki, ba simən, me ba dʊwa dɨgiya kaitang gʊ. ⁴⁴ Bəra nyang tə bʊ bwi bəra ki tə yəmbə fʊlla yəlla niyʊ ba be rəgi. ⁴⁵ Nə wʊnə bwira wʊ nga gəri wʊ rə bərsani, wʊ nirə kaiyʊ wan gʊ a dəg go jəga kaiyʊ, na nəbbən jɨni jauriya a fʊlla dautən wiyʊ? ⁴⁶ Wʊn dəgtangnga kangngi bwira wʊ ni rə kaiyʊwan gʊ a nya nəngnga swiyər də mo nəngnangan bera jiya kaubwiyʊ. ⁴⁷ Kəmən sʊgəmən yəm bə nyam ni rə kaiyʊ ba ti hangʊ a jiya jɨni karə gəri warigʊ. ⁴⁸ Mənni bwira rə yobi bwirai a kəma fʊriyan gʊ go, 'Ni rə kaiya miyʊ ka langngə, ' ⁴⁹ ka sʊ bʊgtəre bagi bwiranəm, ka jau kak jare nore tən bə nororəm; ⁵⁰ ki ni rə kaiyʊwa bwirai ba kauwe bwi a fʊlla bwira hiya kəma bi, a fʊlla wa yəmbi. ⁵¹ Ni rə kaiyang gʊ ba mwiya hangʊ fangngi təsʊ, a jitang ka gəng ba chi bə kwanəm tə nəbbə bwiram, bən dɨga a gʊn tirowitʊwi na kərsətangnga nungtə wi.