¹ Kən Yesʊ a sotən yəmma kʊlən tən məssarbə ba gəm. ² A sotən go "Nəb mʊlarəm tən Farisawa bə chi a gʊn Mʊsa chiwi. ³ Bərarə nyang jiya sʊgəmən go tə nəngngai tə nəngnga, jɨni yaiye bo tə ne sori, mənni kari bətə məssa yobiya jiyʊ, bəraki bə sʊ a nyi me bə ri re. ⁴ O, Ka bʊrə jɨni nəgənni yə məmən dəmən dəbri, a gai ki ka dəb a səngtəna nəbba kʊmna jiyʊ. Mənni me ba yag wʊriyan jiyʊ a dəbbe. ⁵ Swiyer da jiyən bə nəngnga warigʊ go na nəb a chu. Bə sara swana jiyʊ wʊlulo bangsang, mənni yəgtəne bangsangngi a dʊtətta jiyʊ. ⁶ 6 Bə fau gani kʊntai a gʊn nəngnga bwiləmriyʊwi, na dəntəlltə kʊntai a gani nyini rʊwaniyʊwi. ⁷ Na nəggi grate a ganiya bandʊwati na bəgi rə mo nəb məssarəm. ⁸ Kari bə bəgən mo Ni məssari, bəraki ni məssaran jɨnu kwan, mənni warigʊwa jɨnu tən chəte. ⁹ Kari bətə bu gʊ ni to ten jɨnu a gʊsəte, bəra ki tə katənə te kwan bwigi, mənni ka ji. ¹⁰ Kari bən bəgən mo 'ni məsari, bəraki ni məssariya jɨnu kwan, gən Kristi. ¹¹ Mənni wʊ gra a mʊra jɨni ba chi bwiran jɨnʊ. ¹² Wa gʊg dʊr da gəni bən səge, mənni wa səg dʊr da gəni bən gʊg. ¹³ Jiya kʊnangngi jɨn nəb mʊlarəm tən Farisawa, nəbbə bwiram! Kətə məramən dʊʊtətta jiyʊ a nəb. Tə dɨgi be, mənni tə dʊbbə bagi a nya dɨgitang. ¹⁴ Jiya kʊnangngi nən jɨn nəb mʊlarəm tən Farisawa, bəra ki tə fʊng kaina yʊgiyonəmi tə nyəngore nyəra kə tə mai dɨlli tə rʊwa nyini wʊlləliyəng. Bərarə nyang bətə yʊ lʊgtətang kə grang. ¹⁵ Jiya kʊnangngi nəb mʊlarəm tən Farisawa, nəbbə bwiram, tə yʊwa late tə bətte to na tə nya bwira kwan bwigi, tə nya ki kətə dəg kali təsʊ a chi wa kərangngi. ¹⁶ Jiya kʊnangngi jɨn, dube bə nʊng jʊwiyəm, jɨn bətə sʊwere to, 'Wa bau bʊni rə kanda rʊwani nyiniyən me gʊjiyən. Mənni wa bau bʊni rə werdə kəlcəkəlcən da kanda nyini rʊwanniyən bʊnitangʊ ka bʊwa hangʊ.' ¹⁷ Jɨn dʊbə bə mɨtəm wʊnə gali grate, werda kəlcəkəlcən ga, n'kanda nyʊini rʊwaniyiniyəng da dəg werdə kəlchəkəlchən Yʊlgoiyən ga? ¹⁸ Mənni wʊna bau bʊni rə chəriyʊ, ki to menən gʊji. Mənni wa bau bʊni rə nəbbən tangngngi ka jiya chəriyən ki, bʊni hi ka tau. ¹⁹ Jɨn dube wʊne ga li grate, nəbbəntang ka chəriyəng dəg nəbbəntang a nəngnga Yʊlgoiyeng ga? ²⁰ Bərarə nyang wa bau bʊni rə chəriyʊ ka bau bʊni rə ge rə jɨnna jiyʊ warigʊ. ²¹ Wʊ bau bʊni rə kanda nyini rʊwaniyəng, a bau bʊni rə wʊ ka chiya mʊriyʊ, ²² mənni bo wa bau bʊni rə jiyʊ, ka bau bʊni rə gwa dəntəllən da gratəttən da Niyajiyʊwi rə wʊ ka chiya jiyʊ. ²³ Jiya kʊnangngi jɨn, Farisawa tən nəb mʊlarəm, nəbbə bwiram, katə nəbbən kwan a mʊra kwʊ a boni yolo, kʊdogi tən kʊboga mʊtti, mənni kətə dʊ jɨnna dautənwa mʊra sori yan Mʊsai a li nəgənni-nyəra yəm bə nyam, bʊmte tən nəbbəntangnga yəm bə nyam. Yaiye giye na li tə nəngngai na dabə tə dʊ tə nəngngna be. ²⁴ Jɨn dube bə wʊrə damərən, tə gwi gʊlgo kətəle, mənni tə mi kʊrmong ²⁵ Jiya kʊnangngi nən jɨn nəb mʊlarəm tən Farisawa, nəbbə bwiram, tə yəramən buk ka chʊlleng tən kasiyəng, mənni mʊri a ri rə sʊ tən fautangnga dʊr. ²⁶ Jɨn Farisawan dubi! Yəramən chʊlle na kasi a mʊri rə jigʊ, na buk ka gəng a chi rə kaluriyʊ. ²⁷ Jiya kʊnangngi jɨn nəb mʊlarəm tən Farisawa, nəbbə bwiram! Tə nyəra rə sʊtə jərri, wa tari chʊra nyiyai, mənni a mʊri kutətta nəbba bətəromi a ri rə kʊrsəni. ²⁸ A jʊwi kwani, kətə jɨre da tə nəbbə nyam, mənni tə ri nən yobi bwira rə swiyer də bwiran. ²⁹ Jiya kʊnangngi jɨn nəb mʊlarəm tən Farisawa, nəbbə bwiram! Tə mʊra suta nəbbə yʊwe yəməm, mənni bo tə yəngna suta bə nəngnga jɨni nyaiyəm. ³⁰ Tə sʊwe to 'Na nən nʊwa daam ba tebəba nənəməm ki nangnga nəbbəm be bʊtangang a buk a kwitangnga dʊgʊm ba nəbbə yʊwe yəməm. ³¹ Bərarə nyang kətə jəg dʊtətta jɨnu to tən yəlləm ba nəbba juwo nəbbə yʊwe yəməm. ³² Mənni kətə ri jɨni tebəbba jɨnəm a nu nəngngari. ³³ Jɨn sote, betan gərsənttem, bətə nəngnga to nyənə ki tə jiirməna dʊtətta kərangngi? ³⁴ Bərarə nyang, tə chu, kəmən təm gəməni nəbbə yʊwe yəməm, na nəbbə rə bərsanəm tən nəb mʊlarəm. Bətə juwo bagi tə yʊwa bagai a riyang yʊwarang; bagi bo bətə nəngngatən səmbi a kantəttə rʊwaninyʊiniyʊ, tə karə hanjim a bəra bɨr. ³⁵ Bwiran da dʊgʊm ba nəbbə yʊwe yəməm bətə kwiyəm ba kaubwiya dʊtətta jɨni, nyəra dʊgʊm ba Habilam wʊ nya yɨgira dʊgʊm ba Zakariyam yəlliya Barakiyai, gə betə ju a jugər da kanda rʊwaninyʊiniyəng tən chəri. ³⁶ Bə nyam kəmən sʊgəməne warigʊ jɨni yaiye ba nəngnga bwi rə nəb a daam bambe. ³⁷ Urshalima, Urshalima, mʊ mən juwo nəbbə yʊwe yəməm na mʊngngo nəbbən təmera a gwa mwiyəm! Kali tə nyəne mən farə mo mən kʊra gən nyəra kə yawi kʊra betəm ba gəm rəga a gʊ kwaniyəng mənni tə fabbe. ³⁸ Tə chu, kən dʊgəmən kaita jɨnu a nyərə kʊlloni. ³⁹ Kən sʊgəmmən me bətə kaubwi tə chui, a dəba kʊ yɨgira fʊlla bətə sʊwei to, 'Dəgtangnga kangnga wʊ beri a mʊra dʊn da Nigran."