¹ Rə kʊm ko gəriyʊ, ko rə jigʊwi a nyibiyʊ a diye rə dʊng, Maryamʊ Magadaliya tən Maryamʊ wʊ kwani ka diyawe gona tə jiga su hi. ² A gaiyəng təm ka məga bwi rə kʊmni, bəraki we təmriya Nigrai ka sʊwe wa ji ka mərgə werhən a chiya jiyəng. ³ Jəretang ka gəng nyəra kəlbatang, dʊtəttangʊ kwau nyəra wetetta hiyʊ. ⁴ Nəb torəm ka sau bəraki ka nwi tate, ka yullo nyəra nəbba bətəro-bətəroiyəm. ⁵ Kə we təmriya sotənna nyʊimhəm go "Kari tə nwi tate, kən yəm tə fauwe Yesʊ wʊ yʊwa riyang yʊwarangngi. ⁶ Mə gaiwe, mənni ka gʊn nyəngka sʊwe rəgəng. Tə be tə chu gʊn tiwi. ⁷ Tə kwatən yam tə sotənna məssarbə ba gəm, ka gʊn a mʊra bwiyate. Tə chu ka kak ka jɨnnəng yɨgira Galili, bətə chu a gai, chu mərə kinəng kin sʊgəmən. ⁸ Nyʊimhəm ka dʊ suhi wʊlag rə tate na rə bwiləmri, ka mwara səngniyəng go natə sotənna məssarbə ba gəm. ⁹ A gaiyəng Yesʊ ka nya hanjim ka sotən go "Sʊrang". Kə nyʊihəm a tauwa nanagʊwʊng, ka ne gratəng bo. ¹⁰ Kən Yesʊ a sotənna hanjimi go "Kari bətə nwi tatte. Tə yigi tə sotənna chətətta miyʊ a diya Galili. Ba chui a gai". ¹¹ A bukkə nyʊim ka yoməng, a gaiyəng bagi nəb torəm ka dɨga bɨr a sotəna nəbbə gram bə tung jɨniyəm jɨni warigʊ a nəngnga bwiyʊ. ¹² Kə nəbbə tung jɨni a chəriyəm tən bagi nəbbə gram a chiga a suga jɨni nəngnga bwiyʊ wʊng, ka ne nəbbən barə kərangəm chəmmər mwaməng, ¹³ ka sotən go " Tə sotenna bagi to "Məssarbə ba Yesʊwʊm ka be kʊ bwiyan gʊ rə kʊm fʊlla tə ka dʊmi." ¹⁴ Bam yəm bambe a lau nigra tautəmi ki, bənən sʊg hangʊ nən dəbmən kənə kəmmarangnga jɨni." ¹⁵ Kə nəbbə barə kərangngəm a yʊ chəmmərhənəng, ka nəngnga nyəngkə sotən gərəng. Bam yəm bambe ka lwetəm a jugər da Yahudawan, ka jau kak berə tən kʊ. ¹⁶ Mənni məssarbə bə kwʊ a jiir kwanəm be ka diya Galili, a bangkə Yesʊ a sotənəng. ¹⁷ Hanjim a chu hangʊwʊng, ka ne gratəng, mənni bagi ka nəngnga jʊgər. ¹⁸ Yesʊ ka be a gwa hanjimi a sotən yəm go "Kʊmni ta jiyʊ tən ta təmi warigʊ kən ni" ¹⁹ Tə diya tə dəg nəb a chi məssarbə warigʊ. Tə nəngnatən batisma a mʊra dʊn da Ten, tən da Yəlliyəng, na We Yʊlgoin. ²⁰ Tə məssatən a fʊng jɨni sʊgəməni warigʊ, nyəngkən nəggən sori rəgəng. Tə jiga, mən ka nən jɨn jʊtəkwang yɨgira jitang ka gʊsətəng.