¹ Nomba Yoabu umwana mwaume wakwa Zeruya aishibire ukuti mu mutima wa mfumu muri ukufuruka Absaromu. ² Eikyo kanshi Yoabu atumine amashiwi kuri Tekoa no kuretako umwanakashi uwa mano kuri ye. Asosere kuri ye ati, ''Napapata uboneke kwati uri ne kiriro no kufwara ne fifwaro fya mariro. Napapata tekwesha ukusuba amafuta yakukuyemfwa, uboneke kwati mwanakashi uwapwisha inshiku ishingi mukurira uwafwa. ³ Eryo ureya ku mfumu elo no ku sosa kuri ye pafintu ifyo narakuronorwera.'' Eikyo kanshi Yoabu aebere umwanakashi ifyakuya sosa ku mfumu. ⁴ Iryo umwanakashi uwafumine ku Tekoa areranda ku mfumu, asendeme panshi ubunkumpeme ashinta ne mpumi yakwe panshi pakupanga umukinshi no ku sosa ati, ''Ngafweni nebo, mwe mfumu.'' ⁵ Imfumu yasosere kuri ye ati, ''Bushe ninshi irekukyusha?'' Aasukire ukuti, ''Ikine kya kweba ati nebo ndi mukamfwirwa, no murume wandi arifwa. ⁶ Nebo, ne mubomfi obe, nari na bana baume babiri, eryo barerwa mu mabara, kabiri takwari nangu umo uwakubaramwina. Umo arikomene umunankwe no kumwipaya. ⁷ Nomba urupwa rwa rimine umubomfi obe, no kusosa ukuti, 'Tupere mu minwe yesu uyo uwaipeye wabo, pakweba ati nanye tumwipaye.' Eikyo nga kyakweba ati bakita ikyo kuti barofya impyani. Na parikyo ninshi barashimya amafya nga ayo nasha yareaka, no kurenga ishina rya murume wandi, nangu abana bandi nangu abakakonkapo mpanga yonse pano pe samba rya kyaro ukuroberera.'' ⁸ Eikyo imfumu yasosere ku mwanakashi ati, ''Kabiye ku ng'anda yobe nanebo narapera amafunde aya pa murandu obe.'' ⁹ Umwanakashi waku Tekoa ayasukire imfumu ati, ''Muropwe, we mfumu, rekafye umurandu ube pari nebo no rupwa rwakwa tata. Imfumu ne kipuna ibe iyakaere.'' ¹⁰ Imfumu yamwasukire ati, ''Nga kyakweba ati kwaba umuntu uwaisa mukusosa ikintinya kuri webo, umurete kuri nebo, eryo takakwikatemo na kabiri.'' ¹¹ Eryo umwanakashi asosere ati, ''Napapata, rekeni imfumu ibukishe Yahweh Resa obe, e pakweba ati karandura wa muropa e twaririra ukonaura umuntu naumbi, e pakweba ati beipaya umwana mwaume wandi.'' Imfumu ya mwasukire ati, ''Muri Resa fye umumi, takuri umushishi nangu fye umo uwa ku mutwe wa mwana mwaume obe ukaponena panshi.'' ¹² Eryo umwanakashi asosere ati, ''Napapata rekeni umubomfi wenu arande ishiwi na rimbi kuri muropwe imfumu yandi.'' Yasosere ati, ''Are randa.'' ¹³ Eikyo kanshi umwanakashi e pakusosa ati, ''Bushe kinshi nomba yarufyanishishe muri uyo musango pa bantu bakwa Resa? Pantu pakusosa muri uyu musango, imfumu yaba kwati yaipera icirubo iine, pantu mfumu tayabwesha umwana mwaume waiko uko abukutira. ¹⁴ Pantu bonse twaba no kufwa, eryo twaba kwati menshi yaitikira panshi, ayo tabaronganya na kabiri. Rero Resa tapiita ubu; rero, arafwaya inshira abo abantu abo batamfya no kuti betaruka kuri ye. ¹⁵ Nomba iryo, pakubona ukuti naisa mu kuranda ikya musango uyu kuri muropwe imfumu yandi, nikyo pantu abantu barindetere umwenso. Eikyo kashi umubomfi obe ariisosere umwine ati, 'Nebo nomba kankaye randa fye ku mfumu. ¹⁶ Narimo kuti ya bona ifintu ingakita pafyo umubomfi aromba. Narimo kuti imfumu yaumfwa kuri nebo no kurubura umubomfi waiko ukufuma ku maboko ya muntu uurefwaya ukonaura nebo no mwana mwaume wandi pamo, ku kikwatwa kya kishirano Resa atupera. ¹⁷ Eryo mubomfi obe apepere ati, 'Yahweh, napapata rekeni ishiwi ryakwa muropwe imfumu yandi rindetere ukutusha, pantu firya maraika wakwa Resa aba, e fyaba muropwe imfumu yandi mukuranda amashiwi ayabune ukufuma mu fya bubi.' Rekeni Yahweh Resa wenu abe nenu.'' ¹⁸ Eryo imfumu yaasukire no kusosa ku mwanakashi ati, ''Napapata wifisapo ikintu kimo pafyo narakwipusha.'' Umwanakashi asosere ati, ''Rekeni muropwe imfumu yandi irande nomba.'' ¹⁹ Bushe tari ni Yoabu e waibika muri ifi fyonse? Umwanakashi ayasukire no kusosa ati, ''Iki kine, apo mwebo muri abomi muropwe we mfumu yandi, tapengaba nangu umo uwingapiribukira ku kuryo nangu ku kuso ukufuma ku fintu ifyo muropwe imfumu yandi ireranda. ²⁰ Umubomfi obe Yoabu e wakitire ifi pakuti umurandu ube mu musango umbi kufirekitika. Muropwe mwarikwata amano, kwati mano ya kwa maraika wa kwa Resa. kabiri aishiba fyonse ifirekitika mu kyaro. ²¹ Eikyo kanshi imfumu yasosere kuri Yoabu ati, ''Bona nomba ifyo narakita ni fi. Kabiye kanshi, no kureta umurumendo Absaromu kuno. ²² ''Eikyo Yoabu asendeme panshi ubunkupeme mukupera umukinshi no kupara imfumu. Yoabu e pakusosa ati, ''Rero umubomfi obe aishiba ukuti asangwa uwakutemwikwa ku kinso kyobe, muropwe, we mfumu, pakuti imfumu yakita ifyo umubomfi arombere.'' ²³ Eikyo Yoabu aimine, aya na ku Gershur, no kubwesha Absaromu ku Yerusaremu. ²⁴ Imfumu e pakusosa ati, ''Afwire ukubwerera ku ng'anda yakwe, rero nshirefwaya ukumubona mu menso.'' Eikyo Absaromu abwerere ku ng'anda yakwe, rero tabonenepo na wishi. ²⁵ Nomba mu kyaro kyonse ikya bena Israeri tamwari umuntu nangu umo uo barerumbanya ukuyemba ukukira pari Absaromu. Ukutampirafye pa muru wa mutwe wakwe ukushinta na kukatende ka ku rukasa rwakwe takwari akarema nangu kamo muri ye. ²⁶ Iryo arebeya umushishi wa ku mutwe wakwe pakupwa kwa kira mwaka, pantu yareremya, arepima umushishi wakwe, ukurema ukushinta na kuma shekere imyanda ibiri, ikyo ikyari ikipimo ikya mfumu ikya suminishiwa. ²⁷ Absaromu afyere abana baume batatu no mwana mwanakashi umo, uweshina rya Tama. Ari umwanakashi wayemba. ²⁸ Absaromu aikere imyaka iitunturu ibiri mu Yerusaremu, ukwabura ukubonapo ikinso kya mfumu. ²⁹ Eryo Absaromu akutire Yoabu pakweba ati enga mutuma ku mfumu, rero Yoabu taire kuri ye. Eikyo Absaromu atumine intumi na kabiri, rero Yoabu naryo rine taire. ³⁰ Eikyo Absaromu asosere ku babomfi bakwe ati, ''Boneni, ibara ryakwa Yoabu ryaparamina ne bara ryandi, kabiri aririmamo na barle murya mwine. Kabiyeni muye okyamo umuriro. Eikyo ababomfi bakwa Absaromu e pakuya baokya ibara ku muriro. ³¹ Eryo Yoabu aimine no kuya ku ng'anda yakwa Absaromu, no ku mweba ati, ''Bushe kinshi ikyo ababomfi bobe baokyera ibara ryandi ku muriro? ³² Absalomu ayasukire ati, ''Bona, naritumine amashiwi kuri webo no kutira isa kuno pakweba ati ni ngesa ku kutuma ku mfumu no kuyeba ukuti, ''Bushe kinshi ikyo na bwerere ukufuma ku Gershur? Nga kyariweme fye na nomba ne mwine nga ndifye kurya kwine. Eikyo nomba ndefwaya ukubona imfumu, eryo nga kya kweba ati ndi no murandu, kayengipaya.''''' ³³ Eikyo kanshi Yoabu aire ku mfumu no kuyayeba. Iryo imfumu yakutire Absaromu, na ye aringire no kukontamina panshi pakupera umukinshi ku mfumu, ne imfumu na ye yamutomwene pa kumuposha.