¹ Kyaishire ba parwa iki pa numa Amnoni umwana mwaume wakwa Davidi aritemwishishe nkashi yakwe Tama uwa muri banyina bambi uwayemba, ari ni nkashi fye wakwa Absarom, na umbi pa bana baume bakwa Davidi. ² Amnoni arikyukyutike mu mutima ikyakuti arirwere no kurwara pa murandu wakwa nkashi yakwe Tama. Tama ari ni nakisungu, kabiri kanshi kyariboneke ukukosa kuri Amnoni ukumukita ikintu ikiri kyonse. ³ Rero Amnoni arikwete umunankwe uweshina rya Yonadabu umwana mwaume wakwa Shimeya, wabo wakwa Davidi. Yonadabu ari mwaume indamu nganshi. ⁴ Yonadabu asosere kuri Amnoni ati, ''Kinshi, we mwana mwaume wa mfumu, ikyo urebonekera uwaburanda kira rukyero? Bushe tekuti ungebeko? Eikyo Amnoni amwasukire ati, ''Naritemwa Tama, nkashi wakwa ndume yandi Absaromu.'' ⁵ Eryo Yonadabu asosere kuri ye ati, ''Sendama pa busanshi bobe no kuba kwati urirwere. Iryo wiso areisa mukukubona, umwipushe auti, 'Napapata bushe tekuti mutumeko nkashi yandi Tama andetereko fimo ifyakurya eryo angipikireko muno mwine, e pakwebati ni nga bona uko areipika no kundishako? ⁶ Eikyo Amnoni arisendeme ukwati murwere. Iryo imfumu yaishire mukumubona, Amnoni asosere ku mfumu ati, ''Napapata tumeni nkashi yandi Tama ukunteyanishishako ifiryo pa kurwara kwandi pa menso yandi e pakuti nebo kuti andisheko.'' ⁷ Eryo Davidi akutire Tama kwi sano ryakwe no kumweba ati, ''Kabiye nombarine ku ng'anda yakwa ndume yobe Amnoni no kuya mupekanishishako ifiryo.'' ⁸ Eikyo kanshi Tama aire ku ng'anda yakwa ndume yakwe Amnoni uko asendeme. Aripitirepo umufuba no kukandura no kupangamo umukate pa menso yakwe, kabiri iryo aipike. ⁹ Tama aripitire pani no kumupera umukate, nomba ena arikene ukurya. Eryo Amnoni aebere abo arinabo ati, ''Bafumyeni bonse, ukufuma kuri nebo.'' Eikyo bonse barifuminemo no kumusha. ¹⁰ Eikyo Amnoni asosere kuri Tama ati, ''Reta ifiryo mu muputure wandi pakuti undishe.'' Eikyo Tama apitire umukate untu apangire, no kutwara mu kipinda kyakwa Amnoni ndume yakwe. ¹¹ Iryo atware ifiryo kuri ye, arimufukatire no kumweba ati, ''Isa, ndare nobe, we nkashi yandi.'' ¹² Na ye amwasukire ukuti, ''Awe, we ndume yandi, wimpatikisha, pantu ikyamusango uyu takyatara ukukitika muno mu Israeri. Wikita iki kintu ikya bubi! ¹³ Ni kwisa uko nebo nkatwara umusebanya wandi? Bushe pari bufi webo? Uri no kuba ikipuka kya muntu mu bena Israeri. Nomba, nakupapata randa fye ku mfumu, pantu te kuti ikanye nebo ukupwa kuri webo. ¹⁴ Nangura kyari ifyo Amnoni arikene ukumfwa kuri Tama, nekyo ikyakuti arikwatishe amaka ukumukira, kabiri arimunashishe, no kurara na ye mukupatikisha. ¹⁵ Eryo Amnoni apatire Tama nganshi. Urupato rwakwe rwakirire na pafyo amutemenwe. Amnoni asosere kuri ye ati, ''Aramuka eryo ureya.'' ¹⁶ Rero amwebere ati, ''Iyo nakana! Pantu ukuntamfya kwa rabipishapo ukukira na pafintu fya musebanya ifyo ukitire kuri nebo!'' Rero Amnoni tewakumfwa kuri ye. ¹⁷ Ikyakonkerepo, Amnoni akutire umubomfi wakwe no kumweba ati, ''Pita uyu umwanakashi umufumye pari nebo, eryo wisarishe ne kibi nga afuma.'' ¹⁸ Eryo umubomfi afumishe Tama panse, no kwisarisha ikiibi pa numa afuma. Tama afwere umwingira uwa mutengo pantu e fyakufwara fyarefwara abana banakashi bamfumu bana kisungu. ¹⁹ Tama aisubire imitoi pa mutwe no kulrpura umwingira wakwe. Abika na maboko pamutwe wakwe no kufumako, no kupongomona umusowa ninshi areya. ²⁰ Absaromu ndume yakwe asosere kuri ye ati, ''Bushe Amnoni ndume yobe e wakubifya? Rero nomba ikara tondoro, we nkashi yandi. Ni ndume yobe. Tekwesha ukubika iki kintu ku mutima.'' Eikyo Tama aikere mu ng'anda muri ndume yakwe Absaromu no mutima uwabombotara. ²¹ Rero iryo imfumu Davidi aumfwire pari ifi fyonse arifurirwe nganshi. ²² Absaromu tarandirepo ikintu nangu kimo kuri Amnoni, pantu Absaromu aripatire Amnoni pafyo akitire Tama na pafyo akitire umusebanya kuri nkashi yakwe Tama. ²³ Kyaishire kitika pa numa ya myaka ibiri iitunturu Absaromu arikwete baka beya ba mpaanga shakwe ku Baari Hasori, iyaba mupepi na Efuremu, na Absalomu akutire abana baume ba mfumu bonse. ²⁴ Absaromu aishire ku mfumu no kuyeba ati, ''Boneni nomba, umubomfi obe arikwata bakabeya ba mpaanga. Napapata bushe imfumu na bakiroro tekuti baye na nebo, ne mu bomfi obe.'' ²⁵ Imfumu yaasukire Absaromu ati, ''Awe. we mwana mwaume wandi, fwebo bonse tekuti tuyeko pantu kuti twaba ikisendo kuri webo.'' Absaromu aesha ukupapata imfumu, rero yarikene, rero ya muperefye amaparo. ²⁶ Eryo Absaromu asosere ati, ''Nga teifyo kanshi, napapata rekeni indume yandi Amnoni areya na fwebo.'' Eikyo imfumu e pakumwipusha ati, ''Bushe mulandu kinshi urefwaira Amnoni ukuya nobe?'' ²⁷ Absaromu aripatikishe Davidi, eikyo naye arirekereko Amnoni na bana baume ba mfumu no kuya naye. ²⁸ Absaromu akonkomeshe ababomfi bakwe ati, ''Kutikisheni.'' Iryo Amnoni ubwarwa bwa tampa ukumukora, na iryo na nebo na myeba ati, 'Sanseni Amnoni,' eryo mu mwipaye. Mwitina. Bushe tari ni nebo ndemikonkomesha ukumwipaya? Mube fye abakosa kabiri abashipa. ²⁹ Eikyo kanshi ababomfi bakwa Absaromu bakitire ifyo fine Absaromu abakonkomeshe. Eryo abana baume ba mfumu bonse baimine, banina kira umo pari punda wakwe no kufurumuka. ³⁰ Eikyo kyaishire ba ati, iryo bakiri mu nshira, iryashi ryarifikire kuri Davidi ukuti, Absaromu aipaya bonse abana baume ba mfumu, eryo tapari nangu umo uwasharapo.'' ³¹ Eryo imfumu yatareme no kurepaura ififwaro fyaiko, no kusendama panshi; bonse ababomfi baiko batareme mupepi ne fifwaro fyabo ifyarepuka. ³² Yonatabu umwana mwaume wakwa Shimeya, wabo wakwa Davidi, ayasukire no ku sosa ati, ''Mwe muropwe mwiranda ukweba ati ni bonse abana ba mfumu bepeye iyo, pantu ni Amnoni fye eufwire. Absaromu anshimikire ifi ukufuma fye pa bushiku burya Amnoni arere na nkashi yakwe Tama. ³³ Eikyo kanshi mwe muropwe imfumu yandi mwisakana ku rusebo rwa kweba ati abana baume bonse aba mfumu barifwire, pantu ni Amnoni fye eufwire.'' ³⁴ Absarom aribukire no kufumako. Umubomfi umo uwareronda ainwine amenso yakwe eryo abwene abantu abengi munshira ku masamba yakwe bareisa mumbari ya rupili. ³⁵ Eryo Yonadabu aebere imfumu ati, ''Boneni, abana baume ba mfumu abo bareisa. Nefi fyakitika ngo mwakirandira umubomfi wenu.'' ³⁶ Eikyo kyaishire kitika iryo fye apwishishe ukuranda, abana baume ba mfumu bafika no kusumbura amashiwi no kurira. Imfumu na babomfi nabo bene baririre nganshi. ³⁷ Rero Absaromu aribukire no kuya kuri Tarimai umwana mwaume wakwa Ammihudi, imfumu ya ku Gershur. Davidi arerosha umwana mwaume wakwe kira bushiku. ³⁸ Eikyo kanshi Absaromu aribukire no kuya ku Gershur, uko aikere imyaka itatu. ³⁹ Eikyo kanshi umupashi wakwa Davidi warefuruka ukuya kuri Absaromu pantu barimukosereshe ukurosha pari Amnoni no kufwa kwakwe.