¹ Kyaishire ba ati panuma yaiki Abisharom apekenye ikyereta na bakabarwe pa rwakwe, na baume amakumi yasano ku kubutuka pantanshi yakwe. ² Abisharom aimine urukyero no kutarama ku ruramba rwa nshira iyareya ku mpongoro ya musumba. Iryo umuntu onse uuri no murandu wa kwisa ku mfumu pa bupingushi, Abishalom aremwita no kusosa ati, ''Bushe musumba nshi wafumako?'' Eryo umuntu nga ayasuka ati, ''Umubomfi wenu afumine mu mutundu umo uwabena Israeri.'' ³ Eikyo Abisharom ari no sosa kuri ye ati, ''Bona, umurandu obe wa bune kabiri naurungama, rero takuri nangu umo uwasontwa ne mfumu uwakumfwa umurandu obe. ⁴ Abisharom arirundirepo ati, ''Nga kyakutira ninebo bakitire umupingushi mu kyaro, pakutira umuntu onse uukwete umurandu nangu uukitire ikikuru aisa kuri nebo, nga namuretere umuringanya!'' ⁵ Eikyo kyaishire ba ati umuntu onse nga aisa kuri Abisharom ku kumukindika, Abisharom arebura ukuboko kwakwe no kumwikata no ku mufyompa. ⁶ Abisharom arekita muri uyu musango kuri onse umwina Israeri uwareisa ku mfumu ku bupingunshi. Eikyo Abisharom aribire imitima ya bantu abena Israeri. ⁷ Kyaishire ba pakupwa kwa myaka ine ukuti Abisharom asosere ku mfumu ati, ''Napapata rekeni ndeya no kupera umurapo uo napangire kuri Yahweh mu Hebroni. ⁸ Pantu umubomfi obe aripangire umurapo iryo nareikara ku Geshuri mu Aram, ukusosa ati, ''Ikine kine nga kyakuti Yahweh akandeta na kabiri ku Yerusarem, eryo nkashinshimuna Yahweh. ⁹ Eikyo imfumu yasosere kuri ye ati, ''Kabiye mu mutende.'' Eikyo Abisharom arimine no kuya ku Hebroni. ¹⁰ Rero nomba Abisharom aritumine inengu mu mitundu ya bena Israeri yonse, ukusosa ati, ''Nga mwaufwa ikiunda kya ntandara, eryo musose ati, Abisharom e mfumu mu Hebroni.''' ¹¹ Na Abisharom aire na baume imyanda ibiri ukufuma ku Yerusarem, abo abaitirwe. Baire muri bukaire bwabo, mukukanaishiba nangu kimo ikyo Abisharom arepekanya. ¹² Iryo Abisharom apere amarambo, aritumine abakwita Ahithopheri ukufuma ku mushi wabo uwa Giloh. Ari ni kabiro wakwa Davidi. Ukumana akapi kwakwa Abisharom kwari ukwakosa, pantu abantu abarekonka Abisharom bareya barefurirakofye. ¹³ Intumi yaishire kuri Davidi ukusosa ati, ''Imitima ya bantu abena Israeri barekonka panuma yakwa Abisharom. ¹⁴ Eikyo Davidi asosere ku babomfi bakwe bonse abo ari nabo ku Yerusarem ati, ''Imeni na tubutuke, nangu pari baifwe tapabe uurepusuka kuri Abisharom. Ipekanyeni kukuya iririne, nangu areendesha ku kutusanga, no kukita ikyabipa pari fwebo no kutasha umusumba kumpera ya rupanga.'' ¹⁵ Ababomfi bamfumu basosere ku mfumu ati, ''Bona, ababomfi bobe nabaipekanya ku kukita kyonse ikyo shikuru wesu imfumu yasosa.'' ¹⁶ Imfumu yarifurumukire no rupwa ronse panuma yakwe, rero imfumu yarishire abanakashi ikumi, abo abari pambari ku kusunga ikipango. ¹⁷ Pa numa imfumu yaya na bantu bonse abaremukonka baiminine pa ng'anda ya kurekereshako. ¹⁸ Bonse abafita bareabuka na ye, eryo pa ntanshi yakwe pareya abena Kerete, na bonse abena Pereti, na bonse abena Gitti-abaume imyanda mutanda abo abaremukonka ukufuma ku Gati. ¹⁹ Eryo imfumu yasosere kuri Itah umwina Giti ati, ''Bushe kinshi ikyo waishira na fwebo? Bwekera no kwikara ne mfumu, pantu webo uri mbutushi na bunkore. Bwekera ku nkyende yobe. ²⁰ Apo waishire mairo, bushe kinshi ikyo narengera webo ukusabanta konse na fwebo? Nshishibepo uko ndeya. Eikyo bwekera eryo usende ba munonko ba mu kyaro kyobe na webo, na pabe ukutemwa ukukuru ne kitetekero fibe na mwebo.'' ²¹ Rero Itah ayasukire imfumu eryo asosere ati, ''Na pari Yahweh uwa mweo, na pari shikuru imfumu uwa mweo, kine kine monse mu nkyende uko shikuru imfumu akaya, eko no mu bomfi obe akaya, nangu ikyo cipiribure ukuba no mweo nangu ukufwa,'' ²² Eikyo Davidi asosere kuri Itah ati, ''Twaririra no kukonkanyapo na fwebo. '' Eikyo Ittai umwina Gitti aire ne mfumu, na baume bakwe bonse na barupwa bonse abo ari nabo. ²³ Ikyaro kyonse kyaririre ne shiwi mu kukosha abantu bonse barepita mu mukonko wa Kidroni, ne mfumu yine na ye yaripitire. Abantu bonse bareya mu musebo ukurora ku kiswebebe. ²⁴ Na Zadoki wine na bena Rebi bonse, nabasenda imbokoshi ya kipangano kyakwa Resa, uwabako. Babikire imbokoshi yakwa Resa panshi, eryo iryo Abiyata airundireko kuri bo. Barirorera mpanka abantu bonse bapita ukufuma mu musumba. ²⁵ Imfumu yasosere kuri Zadoki ati, ''Sendeni imbokoshi yakwa Resa mu bwekeshe mu musumba . Nganasanga ububire mu menso yakwa Yahweh, akambwesha kuno no kundanga na kabiri imbokoshi ne nkyende umo ekara. ²⁶ Rero nga asosa ati, ''Nshire sansamukira muri webo, 'Bona, pano ndi, reka akite kuri nebo ikiremoneka ikya bune kuri ye.'' ²⁷ Imfumu na ye yasosere kuri shimapepo Zadoki ati, ''Bushe teiwe kabona? Bwekera ku musumba mu mutende, na bana baume bobe na webo, Ahimazi umwana mwaume obe, na Yonatani umwana mwaume wakwa Abiyata. ²⁸ Bona, nderora pa fyabu fya Araba mpaka rise ishiwi ukufuma kuri webo ku kungibukisha. ²⁹ Eikyo Zadoki na Abiyata basendere imbokoshi yakwa Resa ukubwekesha mu Yerusarem, kabiri baikere kurya kwine. ³⁰ Rero Davidi aninine pa makasa ayakufurako insapato no kunina ku rupiri rwa Miorife, na ku mutwe wakwe kwarifimbirwe, kabiri baninine bare enda ninshi barerira. ³¹ Umuntu umo aebere Davidi ukusosa ati, ''Ahitopheri ari pa baumana akapi na Abisharom.'' Eikyo Davidi aripepere ati, ''Mwe Yahweh, piribureni ukupanda amano kwakwa Ahitopheri mu fya buwere were.'' ³² Kyaishire ba ati iryo Davidi afikire pa muru wa musebo, uko Resa areshinshimwinwa, Hushai umwina Arki arishire ku kumukumanya no mwingira wakwe na urepurwa ne roba pa mutwe wakwe. ³³ Davidi asosere kuri ye ati, ''Nga waraya nanebo, eryo waraba ikisendo kuri nebo. ³⁴ Rero ngawabwekera ku musumba no kusosa kuri Abisharom, 'Naraba umubomfi wenu, mwe mfumu, ifyo nari umubomfi waba shinwe mu nshita shakare, eikyo nomba ndeba umubomfi wenu,' eryo ukufurunganya bumpanda mano bwakwa Ahitopheri pari nebo. ³⁵ Bushe takuri bashimapepo Zadoki na Abiyata kuri webo? Eikyo fyonse ifyo waraumfwa mu kipango kya mfumu, uringire ukumweba Zadoki na Abiyata bashimapepo. ³⁶ Bona ukuti kurya bari bena bari na bana baume babo babiri, Ahimasi, umwana mwaume wakwa Zadoki na Yanatani umwana mwaume wakwa Abiyata kuti wantumina mu minwe yabo kyonse ikyo ureumfwa.'' ³⁷ Eikyo Hushai, kibusa wakwa Davidi, aishire mu musumba iryo Abisharom afikire no kwingira mu Yerusarem.