¹ Ala ine ninjisa mwibala lyandi, we nkashi yandi, we nabwinga, ine nalasaba na muri pamo nefintu fyandi ifinunkila ubusaka. Ndelyamo ubuci bwandi ndenwamo umwangashi wandi no mukaka wandi. Lyeni, mwefibusa; nweni kuti mukolwe pa mutemwikwa wandi. ² Ine ndi mutulo, lelo umutima wandi wena walelola. awe naumfwilefye iciunda ca mutemwikwa wandi ulekonosha nokulanda, ''Njiswila ine, we nkashi yandi, wemutemwikwa wandi, nabwinga wandi, uwapwililika wandi umo, pantu umutwe wandi naubomba kucime no mushishi naubomba kumata yabushiku.''' ³ Ala ine nimfula ifyakufwala fyandi; bushe mfwale nakabili? ine nisamba amakasa yandi; bushe njalafye nakabili? ⁴ Umutemwikwa wandi epakupusha ukuboko mucipunda ca cibi naine umutima wabilimuka. ⁵ Awe nalimine kukwiswilako umutemwikwa wandi; ninshi na mafuta ya busaka muri, nakuminwe na kuminwe yandi ninshi kuletona pacikatilo cakwiswilako iciibi. ⁶ Naliswilile umutemwikwa wandi icibi, lelo umutemwikwa nabwekelamo naya. Umutima wandi wakalipa ilyo nalesosa naloleshe kuli ena, lelo shamumufwaile; nalimwitile ena, lelo tajasukile ne. ⁷ Bamalonda abapitana mu musumba basuka bansanga, balanguma bancena nefilonda; bampoka necakufimbana candi . ⁸ Mwebakashana bamu Yerusalemu, nga mwamona umutemwikwa wandi, mu mwebe ukuti ine nindwala icikonko ku kumufuluka. ⁹ Cinshi calenga umutemwikwa obe ukucila bambi, ukuwamisha ukucila abanakashi bambi? Finshi efyo umutemwikwa obe acilako bambi, pakuti iwe uletukonkomesha ifyo? ¹⁰ Umutemwikwa wandi aba no mubili uwatelela kabili uwakashika tewakulubika nangu enga pa bantu (100,O00). ¹¹ Umutwe wakwe ni golide; umushishi wakwe uutali kabili uwafita fititi. ¹² Amenso yakwe yaba nge nkunda ishili mupepi na kamana ka menshi, akalepita no mukaka, kabili yaikala nge fisamo. ¹³ Amatobo yakwe yaba nga umwamena ifyakusuba ifinunka bwino. Imilomo yakwe yaba kwati buluba ubuletonya muri. ¹⁴ Iminwe yakwe yaba iyakulungilwa nga golide iyo afwalako mbalaminwe; ilyo babikamo utumabwe twamutengo utwa safile. ¹⁵ Amolu yakwe nge nceshi sha marbo, ishanshimpwa pa mashinte ya golide; amoneka ngo lupili lwa Lebanoni, ulwakwata ifimuti fya keda. ¹⁶ Akanwa kakwe kalilowesha; awamafye onse. Uyu emutemwikwa wandi, cibusa wandi, mwe bakashana bamu Yerusalemu.