¹ Ubushiku bonse pa busanshi bwandi tepakufuluka umutemwikwa wandi. Namufwaya fwaya awe tewakumoneka nakalya. ² Naisosela nemwine, ''Awe kanjimefye nemwine, mpitane mu musumba, nje ndefwaya fwaya uo umutima wandi waemwa.'' Namufwaya fwaya awe tewakusanga nakalya. ³ Bamalonda abapitana mu musumba basuka basanga, na ine epakwipusha ati, ''Bushe namumonako umutemwikwa wandi?'' ⁴ Kutifye cilya nafuma apo bali, awe namusanga umutemwikwa wandi. Na ine naine namwikatisha nshamulekeleko nasuka naya mwingisha mu nganda yakwa mayo, namutwala ku muputule wa mufyashi wandi. ⁵ Imwe mwe bakashana ba mu Yerusalemu, Ndemukonkomesha napali impombo ne nsebula ishikota isha mupanga ati, ''Mwibukulusha nangu ukusunkanya ukutemwa mpakafye ukwine kwaitemenwa. ⁶ Cinshi cilya cilefuma mu matololo kwati ni ntumba ya cushi? Icushi cilimo cena ca muri ne ca cinyamuti ca fulankunisenshi, icileleta ne cena ca fintu fyonse ifinunka ubusaka filya filetwa na bamakwebo? ⁷ Mona, ala licili lyakwa Solomoni. Pali ne fita amakumi mutanda nshilinshingulukile, ifita filya basala mu fita ifyapambaba ifya bena Israeli. ⁸ Impalume shonse shintu shacejela kukulwa no lupanga, shintu shaishibila ukulwa inkondo. Impalume shonse imo imo nshipikila ulupanga, ulwakukulwishishako abengashisansa pa nshita ya bushiku. ⁹ Imfumu Solomoni eyaipangile icipuna ku fimuti fya ku Lebanoni. ¹⁰ Amolu yaciko apanile aya silifa. Kunuma capangilwe na golide. Apakwikala pali insalu ishakashikila, isho abakashana ba mu Yerusalemu bapikwile ubusaka. ¹¹ Mwe bakashana bamu Zioni, iseni mutambe imfumu Solomoni, naifwala icilongwe ico nyina aifwikile ku mutwe, pa bushiku bwa bwinga bwaiko, pa bushiku ubo umuetima waiko wasansamwike ukufikapo.