1 Lisheni ipenga mu Zioni, mulishe kamangu pa lupili lwandi ulwa mushilo. Muleke bonse abaikala mu calo bakwate umwenso, pantu ubushuku bwakwa Yahweh buli mukwisa, kabili buli mupepi. 2 Bukaba ubushiku bwa mfifi, nayo iyafiita ubushiku bwa makumbi ne mfifi iyikalamba nganshi. Nga filya amacacayakupa pamulu wa mpili, efyo ibumba ilikalamba ilya fita ifyakosa likesa. Takwatala akumoneka icintu ca uyu musangoukufuma ku nshita ya ku kale, na kuntanshi kwine tacakatale acimoneka na kabili. 3 Ku ntanshi yabo fyonse fyonaulwa ku mulilo ulepya. Kunuma yabo ulo bapita kwashala fititi kwati lubingu lwa mulilo locele. Ilyo tabalapita, icalo cilemoneka kwati ni mwibala lya Edeni, nomba cilya bapita, impanga yashala ilemoneka nga mupile umupya no konaulwa. Kabili tabashamo nangu kamo. 4 Imimonekele yabo yaba kwati ni bakabalwe, nga bakabalwe ba nkondo ababutuka ulubilo. 5 Ilyo baletolauka pa mulu wa mpili, bapanga icongo kwati maceleta, nangu kwati cani icauma icilepya ku mulilo. Kwati libumba ilikalamba ilya fita ilileiteyanya kukulwo inkondo. 6 Abantu aba mitundu yonse balekatwa umwenso Ilyo bamona uko fileisa, ninshi na pa finso pawa. 7 Basansa kwati fita fya nkondo,banina ifibumba kwati bashilika. Na pakwenda onse kulungamafye apo alolele, takuli kupilibukila nangu kumo. 8 Takuba nangu umo uwakupunka umunankwe iyoo. Cila umo alolafye apo alungeme, ukwabula ukusakamana ku fyanso ifilefwintwa, ne milongo yabo taiputuka. 9 Nga balasansa umusumba, bacilukila pa mulu wa malinga. Balanina mu mayanda pa mulu wa mitenge, no kulaingilila pamulu wansolokoto kwati ni mpupu. 10 Isonde lilatenkana pakumona uko baleisa, no mulu uletenta. Akasuba no mwenshi fyafita fititi, ne ntanda nasho shaleka ukubeka. 11 Yahweh asansula shiwi ku ntanshi ya fita fyakwe, iyee umulalo uyu ubukulu, ifita ifinakila amafunde yakwa Yahweh tefyakupenda ku bwingi. Yangu, we bushiku bwakwa Yahweh nobe ulakulaee, kabili ulatinya. Nga ninani uwingashipikisha? 12 Yahweh walanda ati''- kanshi na nombaline bweleni kuli ine ne mitima yenu yonse, mukufunga ukulya na mukulila ifilamba no kulosha.'' 13 Pakulanga ubulanda, lepuleni imitima yenu, tefyakufwala iyoo. Bweleleni kuli Yahweh Lesa wenu. pantu aba uwacikuku kabili uwaluse, tafulwa bwangu kabili aba no kutemwa ukukalamba, takokola nokubwesha umutima. 14 Nga ni nani engeshiba nga cakuti Yahweh Lesa wesu kuti abwesha umutima, no kutushila ipalo pakutupela ifisabo. Pantu lyana ninshi kuti twakwata umutuulo wa cabunga, no wa cakunwa ifyakwa Yahweh Lesa wesu. 15 Lisheni ipenga mu Zioni, konkomesheni abantu ukuti bafunge ukulya, iteni ulukuta lonse lwise lukwate ukulongana kwamushilo. 16 Longanikeni abantu pamo, sangululeni ulukuta. Iteni abakalamba; longanikeni na baice, mulonganye no tunya twine utwa kwibele. Shibwinga na nabwinga bafume mu muputule wabo, nabo bene beseko. 17 Lekeni bashimapepo ababombelaYahweh bekale pakati ka mpongolo no bulambo epo balelilila, baletila, ''Langulukila abantu bobe we Yahweh, belelako abantu bobe uluse. Wileka imfwe fwecikwatwa cobe tusebane, na bantu ba misobo batusule. Nga cinshi ico abenafyalo bengalatuwelela,no kutwipusha abati, 'Lesa wabo ali kwi?'' 18 Élyo Yahweh akakwata ubufuba pa calo cakwe, no kulangulukila abantu bakwe. 19 Elyo pakwasuka abantu bakwe, Yahweh akabasuka ati, ''Mona, nalamutumina inganu, umwangashi upya, elyo na mafuta. Kabili mwakulaikuta, na ine nshakaleke nomba ukuti imishibo ya benafyalo ikamusebanye. 20 Nalatalusha umulwani wa ku kapinda ka ku kuso ukufuma kuli ikwe, ndemuntamfisha mu calo icauma umushaba kantu. Ulya atangila pantanshi, ndemutamfisha muli bemba wa ku kabanga, ulya nao akonka panuma, ndemuntamfisha muli bemba wa ku masamba, mpaka pakeme icena icanunka pipi.'' Cinefye alicita ifintu ifikulu nganshi. 21 Iwe we calo leka ukutiina! Sekelela no kusansamuka pantu Yahweh alicita ifintu ifikulu nganshi. 22 Na imwe mwe nama sha mu mpanga mwitiina, pantu umulemfwe naumena mu mpanga.imitima naitwala ifitwalo, imikunyu ne myanganshi nayo naitwala nganshi. 23 Na imwe mwe bena Sioni sansamukeni, sansamukeni muli Yahweh Lesa wenu. Pantu mubulungami namuletela imfula ya maisa iya pakutendeka, nalenga ne mfula iyingi ukuloka nga filya cali kale, imfula ya pakutendeka elyo ne yakulekelesha. 24 Apakupumina iganu pakaba imina iyikulu, ne fikamino fikesula umwangashi elyo na mafuta. 25 ''Ndi nokumibwsesha ifya pa myaka yonse iyo makanta alilemo ifisabo fyenu. Makanta ulya aputaula ulya atebelelala, ulya atolauka na ulya apwishshisha imwe. 26 Kanshi nomba mwakulakwata ifilyo ifingi, ifyakuti mulelya no kwikuta. Mukambe no kulumbanya ishina lyakwa Yahweh Lesa wenu, uwabomba pali imwe ifintu ifyakupapa. Na imwe mwe bantu bandi nomba tamwakatale amwikatwa insoni nakalya. 27 Elyo mwe bena Israeli mukeshiba ukuti kanshi ine naba pakati kenu, nokuti ine ne Yahweh nine Lesa wenu, takwaba na umbi. Mwe bantu bandi, nomba tamwakatale amwikatwa insoni na kabili. 28 Panuma ya ifi fintu, ine ne Yahweh nkapongolwela umupashi wandi pa bantu bonse, elyo abana benu abaume na bana benu abanakashi bakalasesema amashiwi yandi, abakote benu bakalalota ifiloto, na bana benu abalumendo bakalamona ifimonwa. 29 Mu nshiku shilya, cinefye kapongolwela umupashi wandi na pa babomfi bandi bene abaume na banakashi. 30 Nkalanga ifingelengwe mulya mu mulu na pano insonde. Kukaba umulopa no mulilo ne ntumba ya cushi. 31 Akasuba kakafita fititi, no mwenshi nao ukakashika ngo mulopa, Ilyo ninshi tabulafika ubushiku bukalmba ubwakutiinya ubwakwa Yahweh. 32 Lelo abantu bonse abakalilila peshina lyakwa Yahweh ebakapusuka. Pantu mu lupili lwa Sioni na mu Yerusalemu emukesa ikala abalepusuka, ukulingana ngefyo Yahweh walanda. Pantu akabapususha bakaba ni abo Yahweh aita.