¹ Lino swiilila eezyo Jehova nzyawamba, ''Buka waambe kaambo kako kunembo lyazilundu; tulundu ngatukamvwe jwi lyako. ² Swiilila lulayo lwaJehova, yozilundu, andinywe nontalisyo yanyika. Nkaambo Jehova uli aalulayo abantu bakwe, alimwi uyoolwana mulubeta aatala aIzilayeli.'' ³ Nobantu bangu, ndamuchitilaanzi? Ndamukataazya biyeni? Ngamukaambe aatala andime! ⁴ Nkaambo ndakamugwisya kuzwa munyika yaIjipiti akumuunununa kuzwa kung'anda yabuzike. Ndakatuma Mozesi, Aloni aMiliyemu kulindinywe. ⁵ Nobantu bangu, muyeeye zyakachita Bbalakki mwami waMowabbu, akuti Bbalamu mwana mulombe waBbiyo wakamusandula biyeni aawo nimwakeenda kuzwa kuSyitimu kuya kuGiligalu, kuti mukazibe nchito zyaJehova zisalala.'' ⁶ Ndikeetenzi kuli Jehova, aawo neyoovundama kuli Leza? Ndikaze kulinguwe azipo zyakutenta na, atunamani tuli amunyaka womwe? ⁷ Jehova uyoobotelwa na abagutu balichuulu, na azyuulu zilikkumi zyamilonga yamafuta? Ndikape mwana wangu mutaanzi na kuchibi changu, muchelo wamubili wangu kuchibi changu ndemwini? ⁸ Wakwaambila, muntu, chibotu, anzyayanda Jehova kuzwa kulinduwe: Nchita chabululeme, yandisya bubombe, alimwi weende chakulibombya aLeza wako. ⁹ Jwi lyaJehova lilikwaamnba mumuunzi - nikuba lino busongo bulazumina zina lyako: ''Mukaswiilile musako, akuliwooyo wakuubika aabusena. ¹⁰ Kuli buvubi butaluleme mumaanda aabasizibi, amweelo wakubeja uutatambuliki pe. ¹¹ Kujana muntu ndamwaamba bululami na mukubelesya myeelo yakubba, ankomo yamyeelo yakubeja? ¹² Bavubi bazwide bukali, bamumo baamba mabejo, alulimi lwabo mumilomo yabo luleena. ¹³ Nkinkkako ndiyoomuuma achisubulo chipati, akuyoomuchita matongo akaambo kazibi zyenu. ¹⁴ Muyoolya pesi kamutakkuti; nzala iyookkalilila mulindinywe. Muyoobamba buvubi pesi kabutabambikani pe, nzimutakabambe ndiyoozipa kupanga. ¹⁵ Muyoobyala pesi tamukoyootebula pe; muyoosina ma olivi pesi tamukoyoolinanike lwenu pe amafuta; muyoosina masaansa pesi tamukoyoonywa wayini pe. ¹⁶ Milawu yakachitwa aOmuli yakabambwa, amilimu yeng'anda yaAhabbu. Weende muluchenjezyo lwabo. Aboobo yommunzi ndiyookuchita matongo, andinywe nimukkala mumo chisesyo chakufota, alimwi muyoobweza busampu bwabantu bangu.