¹ Maawe kulindime! Nkambo ndaba mbuli nibabweza michelo yamiinza, mbuli masansa asyalila: takwe zikkata zyakulya: Moyo wangu ulayandisya michelo ibizidwe mitanzi. ² Muntu mubotu ulimanide aansi: alimwi takwe ululeme akkati kabantu; Bonse balalala kulindila bulowa; balavwima muntu amunyina akazamba. ³ Kuti bachite bubi amanza obilwe chakumaninina, Mwami ulabuzya, alimwi mubetesi ukumbila chilumbyo; amuntu mupati, ulaamba nzyayaanda zyabubi; elyo balazichita. ⁴ Mubotu akkati kabo ulimbuli mamvwa, oyo ululeme loko akkati kabo ulabosya kwinda mpela yabuumvwa. Obo buzuba bwabasikulinda akuswayigwa kwako kwasika. Lino zilaba kombesegwa kwabo. ⁵ Utasyomi kumwenzinyokwe, utabikki moyo kuli sikuzulwida: jala milyango yamulomo wako kuli yooyo ulala munkombe lyako. ⁶ Nkambo mwana mulombe ulasampawula wisi, mwana musimbi ubukila banyina, mukamwana ulakazyania abanyinazyala; basinkondonyina bamuntu mbasing'anda yakwe. ⁷ Nkambo kako njolanga kuli Jehova, njolinda Leza walufutuko lwangu, Leza wangu uyondivuna. ⁸ Utandisekeleli, O sinkondoma, mumudima, Jehova ulaba mumuni kulindime. ⁹ Ndalibombya kubukkali bwa Jehova, nkambo ndamubisizya, mane andikoswede makani, akundibeteka, ulandeetela mumuni, alimwi njoyebela bululami bwakwe. ¹⁰ Elyo sinkondoma uyozibona, alimwi bweeme buyomuvumba oyo wakati kuli ndime, Ulikuli Jehova Leza wako? Menso angu alamubona lino uyolyatuulwa mbuli tombe lyamumigwagwa. ¹¹ Mubuzuba obo malambo ako ayoyakwa, mubuzuba obo mulawu uyotolwa kule. ¹² Mubuzuba abo alimwi uyosika kulindime kuzwa ku Asiliya, alimwi kuzwa kulwizi, alimwi kuzwa kuchilundu kuyosika kuchilundu. ¹³ Kaatakwe chikazya nyika iyoba tongo nkambo kabaabo bakkala mumo, kumuchelo wakuchita kwabo. ¹⁴ Sanina bantu bako azyabutanga zyalukono lwako, zikkala azilikke musokwe, akkati ka-Kkameli, zichela mu Bbasyani amu Gilidi,mbuli mumazuba akalekale. ¹⁵ Njomutondezya zintu zigambya mbubonya mbuli mazuba aalya nimwakazwa munyika ya Ijiputi, Ndiyobatondezya zigambyo. ¹⁶ Manyika ayobona akufwa bweeme anguzu zyabo zyoonse: bayobikka maboo aabo amilomo yabo, matwi aabo ayosika. ¹⁷ Bayomyankuta bulongo mbuli nzoka, bayozwa mumpako zyabo mubli ziyokaansi: bayoyoowa Jehova Leza wesu, alimwi bayoyoowa nkambo kandinywe. ¹⁸ Ngwani Leza ulimbuli nduwe, ulekelela babi, uyinda nsotoko zyabasyeede balukono lwakwe? Tabikkili kunyema kwakwe lyonse, nkambo ukondelelwa muluzyalo. ¹⁹ Uyoboola lubo, uyotufwida luse; uyolyatauula zibi zyesu; alimwi uyosowela mulwizi lumbila zibi zyabo zyoonse. ²⁰ Uyochita chalusinizyo lwa Jakkobbu, aluzyalo kuli Abbulahamu, nzyakakonkezya kuli bamataata besu kuzwa kumazuba akalekale.