¹ Pesi kumazuba akumamanino kuyoza aatala achilundu chang'anda yaJehova iyoyakwa aatala lyachilundu. Iyosumpulwa atala lyatulundu, alimwi bantu bayokunkila kulinchicho. ² Manyika manji ayoyinka akwamba kuti, ''Muboole, atwiinke kuchilundu chaJehova, kung'aanda yaLeza waJakkobbu. Uyootuyiisya inzila zyakwe, alimwi tuyoyenda munzila zyakwe.'' Nkambo kuzwa muZiyoni mulawu uyozwa, alimwi ijwi lyaLeza kuzwa muJelusalemu. ³ Uyobeteka akati kabantu banji alimwi uyoyeeya atala abantu biingi balikumanyika aalikule. Bayowuma mapanga aabo kuyoba zimpanzi zyajamba alimwi masumu aabo ayooba mbuli ngobyobyo. Chisi tachikoyonyampula panga kachinyampwida chisinyina, nikuba kuyolibambila nkondo. ⁴ Anukuti, bayokkazika bantu boonse munsi lyamisansa alimwi amunsi lyamukuyu wakwe. Tawope uyobayoosya, nkaambo mulomo waJehova wamakamu waambuula. ⁵ Nkaambo bantu boonse baleenda, umwi awumwi, muzina lyaleza wabo. Pesi tuyoyenda muzina lyaJehova Leza wesu kwalyoonse alyoonse. ⁶ '''Mubuzuba oobo,'' ooku nkokwambilizya kwaJehova, ''Njobunganisya batakonzyi kweenda alimwi akuyobungika batandidwe, aabo mbindakapenzya. ⁷ Njosandula bateendi kuti bakabe chaabilo, alimwi abaabo batandilidwe kule kuyooba musyobo usimide, alimwi mebo, ndeJehova, ndiyoyendelezya aalimbabo atala lyaChilundu chaZiyoni, lino mane kukabe kutamani. ⁸ Kulinduwe, yembela butanga, kalundu kamusimbi waku Ziyoni, kuli nduwe chiyosika, sikwendelezya wako wachiindi uyoboozegwa, bwami bwakali bwamwana musimbi waJelusalemu. ⁹ Lino, nkaamboonzi notambwizzizya mujulu? Takukwe mwami na akati kenu? Ani basinkuta bakafwa na? Eechi nchenchicho na chimwetelezya machise amwanakazi sikutumbuka? ¹⁰ Amube mumachise alimwi mubelekele kutumbuka, mwana musimbi waZiyoni, mbuli mwanakazi ulimumachise akutumbuka. Nkaambo lino nywebo muyozwa anze lyadolopo, mukakkale mumyuunda, alimwi mukiinke kuBbabbiloni. Ooko muyovunwa. Ooko Jehova uyomuvuna kuzwa kujanza lyasinkondonyokwe. ¹¹ Lino manyika miingi alibungene kukulwisya nduwe; baamba kuti, 'Ngasofwaale; menso eesu ngaakkutikane atala lyaZiyoni.' ¹² Tabazi pe miyeeyo yaJehova, nekuba kumvwisisisya mayeyelo aakwe, nkaambo wakababungania mbuli mimpusa yamaila ayanda kupolelwa busu bunante. ¹³ Buka upole, mwana musimbi waZiyoni, nkambo njochita lwija lwako kuti lukabe butale, alimwi njochita nsumba zyenu kuti zikabe mbuli mukuba. Muyolyatuula bantu biingi alimwi muyopedekezya buvubi bwabo butaluleme kuli Jehova, buvubi bwabo kuMwami wanyika yoonse.''