¹ Ndakati, ''Teelela lino, nywebo nobazuluzi baJakkobbu anobeendelezi bang'anda yaIzilayeli: Tachilichibotu na kulindinywe kuti mumvwisisisye bululami? ² Nywebo nimusula bubotu akuyanda bubi, nyweebo nimunenguula mibili yabo, nyama zyabo kumafuwa abantu bangu, ³ nywebo nimulya alimwi enyama zyabantu bangu, akunenguula mibili yabo, akutyolola zifuwa zyabo, akuzityolola mutumpanzi, mbuli nyama iyamumpoto, mbuli nyama mukalongo. ⁴ Mpawo nywebo nobeendelezi muyolilila Jehova, pesi takoyomusandula pe. Uyosisa busyu bwakwe kulindinywe muchiindi eecho, nkaambo mwakachita michito mibi.'' ⁵ Jehova nguwaamba eezi, ''Kubasinsimi bazulwida bantu bangu chakubasowa, kuti umwi wabapa chakulya, balawompolola, 'Lumuno.' Pesi kuti takwe nchaabika mumilomo yabo, balalipeda lwabo kubwedezya nkondo kulinguwe. ⁶ Nkinkaako, buyooba busiku kulinduwe nkambo takwe nikuyooba mubono kulinduwe. Izuba liyobabbilila basinsimi, alimwi izuba liyosiya kulimbabo. ⁷ Basikubona bayooba ansoni, alimwi basikusonda bayopilingana. Bonseni bayovumba milomo yabo, nkambo takwe nsandulo izwa kulindime.'' ⁸ Pesi kukwamba ndime, ndizwide nguzu kwinda kuMuuya waJehova, alimwi ndizwide bululami amanguzu, kuti ngaambe kuli Jakkobbu abubisyi bwakwe, akuli Izilayeli aatala azibi zyakwe. ⁹ Lino komvwa eezi, nywebo nobazuluzi bang'anda yaIzilayeli, anobendelezi baIzilayeli, nywebo nimulwana bululami, alimwi mwezyanisya zyonse kululama. ¹⁰ Muyaka Jelusalemu abulowa alimwi Jelusalemu abusofwaazi. ¹¹ Bazuluzi benu amasinkamulomo, bapayizi balayisya kuti bajane mpindu, alimwi abasinsimi balabona kabayanda mali. Aboobo mulaboola kuli Jehova akwaamba kuti, ''Ani Jehova tali aswebo na? Taakwe bubi buyotusika atala lyesu pe.'' ¹² Nkenkaako, akambo kenu, Ziyoni uyooba muunda ufolwedwe, Jelusalemu uyooba mulwi wabufwefwelenga, alimwi kalundu kantempele kayooba mbuli chietyo.