¹ Maawe kulibaabo bayeeya bubi, alimwi akuchita zibi aamalo aabo. Mumumuni wachifumo balazichita nkambo bajisi nguzu. ² Baleemuzya myunda akwitola changuzu; baleemuzya maanda akwatola changuzu. Baladyaamizya muntu ang'anda yakwe, muntu azyakukona zyakwe. ³ Aboobo Jehova wamba eechi, ''Langa, mebo ndamba kweeta mapenzi alangene aluzubo oolu, ooko nkomuyokachilwa kugwisya nsingo zyenu. Tamukoyoyenda chakutaswiiilila, nkaambo chiyooba chiindi chitalomene. ⁴ Muleelyo zuba, muntu uyoyimba lwiimbo aatala anduwe, alimwi uyoowomoka aloompololo. Bayooyimba, 'Swebo tobaIzilayeli twamaninina kubatongo; Jehova wasandula masena aabantu bakwe. Mbobuli mbwanga ulachigusya kulindime? Waaba myuunda yesu kulisikutupenzya!''' ⁵ Nkinkaako, nywebo nobavubi tamukoyooba abasimukowa bayowabulula masena azisolo mumbungano ya Jehova. ⁶ '''Mutasinsimi,'' balaamba. '''Tabeelede kusinsima aatala azeezi zintu; kuzyotololwa takukoyoza.'' ⁷ Zikaambwe na nchoonzyo, yong'anda yaJakkobbu, ''Muuya wa Jehova ulinyemede na? Eeyi chanchoonzyo michito yakwe na?'' Takwensi kuti majwi aangu achitila bubotu kuliyooyo uyenda mubululami? ⁸ Kumamaninino bantu bangu babuka mbuli sinkondoma. Mulasaluula zikobela, zisamo, kuzwa kulibaabo banakweenda kabatayeeyeli, mbuli basilumamba bajoka kuzwa kunkondo kulizeezyo nzibeyeyela kuti zilisitikene. ⁹ Mulatanda banakazi babantu bangu kuzwa kumaanda aabo; ulatola zilongezyo zyangu kuzwa kubana babo kwalyoonse. ¹⁰ Buka uyeende, nkaambo oobu tabwensi busena mbonga ulakkala pe, akambo kakusofwaala kwabo; bulinyonyweedwe alunyonyooko lumaninide. ¹¹ Kuti umwi muntu wasika kulinduwe amuuya wakubeja alimwi wakwambila kuti, ''Ndiyosinsima kulinduwe aatala awayini azinywigwa zikali,'' uyobwezwa mbuli musinsimi wabantu bakwe. ¹² Chakasimpe ndiyomubungania monseeni nywebo, Jakkobbu. Chanchoonzyo njobungania baIzilayeeli basyeede. Ndiyobayobolola aamwi mbuli kampusa kambelele, mbuli butanga akati kamacheelelo azyo. Kuyooba lusabilo lwiingi nkaambo kakuvula kwabantu. ¹³ Sikuyobazulwida uyobajulila nzila yabo nkambo uyoyeenda kunembo lyabo. Bayotyola mulyango akuyozwidaanze; mwami wabo uyoyinda kunembo lyabo. Jehova uyooba amitwe yabo.