1 Ndime ooyo mwaalumi wakabona makataazyo munsi akaponda kaJehova kakunyema. 2 Wakanditanda akuchita kuti ndeende mumudima kutali mumuni. 3 Nchobeni wasandwida kuboko kwakwe akati kangu lubo alubo, izuba lyoonse mbulizulwa. 4 Wachita nyama yangu achikanda changu kuchembaala; wakatyola mafuwa aangu. 5 Wakayaka bulambo bwakundilwisya, alimwi wakandizyungulusizya aabukali abuyumi. 6 Wakandichita kuti ndikale mumasena aasiya, mbabo bakafwa chiindi. 7 Wakayaka bulambo bundizyungulukide alimwi nsikonzyi kuchija. 8 Wakachita macheni aangu kuti aleme alimwi nikuba boobo ndayita aakulila lugwasyo, wandijalila aanze nkombyo zyangu. 9 Wajala nzila yangu abulambo amabwe aabezedwe, awachita nzila zyangu zyapilingana. 10 Ulimbuli bbule uulindide kundiluma, ulavu uuyubide; 11 Wakapindimuna nzila zyangu, wakandichitila kuba tongo. 12 Wakavunga buta bwakwe wandiiita mbuli chakuyasa kavwi kakwe. 13 Wakayasa nsa zyangu akavwi kakwe. 14 Ndakaba chisesyo kubantu bangu boonse, lwiimbo lwabo lwakundininda izuba lyoonse. 15 Wakandizuzya misamu iilula akundaangila kunwa mululwe. 16 Wakachita meno aangu kunyeela a bubwebwe, alimwi wandibumbulusya mudyota. 17 Muuya wangu luumuno; ndabula kuti kuzwidilila niinzi. 18 Aboobo nditi, ''bulangilizi bwangu bwamana abulangilizi bwangu muli Jehova.'' 19 Yeeya makataazyo aangu akutuntulika kwangu, mululwe akululilwa. 20 Ndachiyeeya lyoonse amuuya wangu ulalifwiinsya mulindime. 21 Pesi ndayeeya alimwi nkaambo ndaabulangilizi: 22 Luyando lupati lwa Jehova tabumani pe abuuya bwakwe tabumani pe, 23 Ndupya chifumo choonse; kusyomeka kwako nkupati. 24 ''Jehova ndukono lwangu,'' mbuuwamba muuya wangu, nkabela ndiyoosyoma mulinguwe. 25 Jehova mubotu kulaabo bamulindila, kumyuuya iimuyanduula. 26 Nchibotu kulindila chuumunizi kulufutuko lwa Jehova. 27 Nchibotu kuti mwaalumi ayumye jokwe kubuniini bwakwe. 28 Mumuleke akkale alike chuumunizi, awo niligwabika aalinguwe. 29 Ngabike mulomo wakwe mulusuko- amwi kuchinoli bulangilizi. 30 Ngakape seya lyakwe kulooyo uumuma, alimwi ngakazuzigwe azuule alusampawuko. 31 Nkaambo Leza tayootukaka kwa lyoonse. 32 Pesi nikuba wachita machise, uyooba aaluzyalo mukwiindila mukuvula kwaluyando lwakwe lutamani. 33 Nkaambo takataazyi kuzwa mumoyo wakwe nakombya bana babantu. 34 Kuvwinyuuna amawulu baange boonse bamunyika, 35 kukasya muntu nzyeelede kunembo lyamupati kampatila, 36 kukasya muntu nzyeelede kukubetekwa kunkuta- mwaami takouoozuminana azintu zyamusyobo ooyo! Na Leza taazizumizya? 37 Ngwani waambula alimwi zichitike, ado kuti mwaami wazyaamba? 38 Tazizwi mumulomo wamupati kampatila na ezyo mapenzi azibotu? 39 Muntu muumi ulatongawuka biyeni? muntu ulatongawuka biyeni aatala achisubulo chazibi zyakwe? 40 Ngatulingule nzila zyesu, alimwi tubweede kuli Jehova. 41 Atunyampule myoyo yesu amaboko eesu kuli Leza uuli kumajulu: 42 Twakabisya akupapa. 43 Mwalivumba akunyema akututobela, wajaya alimwi taakwe nchasiya. 44 Walijala ajoba kuchitila kuti kutabi nkombyo iiyinda. 45 Watuchita mbuuli makololo atombe alimwi watuchita mbuuuli tombe akati kabantu. 46 Boonse basinkondoma batutuka, 47 Buyoofu adindi bwatusikila, kunyonyona akujaya. 48 Menso aangu akunka milonga yaamisozi nkaambo kakunyonyonwa kwabantu bantu. 49 Menso aangu alazwa misozi nkaataleki, kakutakwe lugwasyo, 50 mane Jehova kujulu alange aansi abone. 51 Menso aangu ayeta kuusa kumoyo wangu nkaambo kabana bangu basimbi boonse mudolopo. 52 Ndalikuvwimwa mbuuli muyuni abaabo bakali basinkondoma; bakalikundivwima kaatakwe kambo. 53 Bakadyunkula buumi bwangu mudindi, 54 alimwi bakawaala bbwe aalindime, alimwi bakaachita maanzi afwasuuka, avumba mutwe wangu. Ndakati, 'Ndakadyunkulwa!' 55 Ndakiita muzina lyako, Jehova, kandili mudindi damfu. 56 Wakamvwa jwi lyangu mpundakati, 'utajali kutwi kwako kukulila kwangu lugwasyo.' 57 Wakaza aafwifwi mubuzuba mpindakakwiita kulinduwe; Wakati, ''utayoowi.' 58 Mwaami, wakalwanina kaambo kamoyo wangu, wavuna buumi bwangu! 59 Jehova, wabona babi mbubakachita kulindime; Beteka kambo kangu. 60 Wabona kubweedezya nkoto kwabo, zyoonse nzibabamba kundilwisya. 61 Wakamvwa kutukila kwabo,Jehova, alimwi zyoonse nzibabamba tala andime. 62 Milomo amiyeeyo yabasinkondoma ilaza kundilwisya buzuba boonse. 63 Langa mbubakkala alimwi mbubabuka; balandininda anyimbo zyabo. 64 Bweedezya kulimbabo zibeelede,Jehova,kwiindila muzichita zyamaboko aabo. 65 Uyoochita myoyo yabo kutawusa lutuko lwako lube aatala lyabo! 66 Batobele mukunyema akubanyonyona kuzwa kunsi lya Julu, jehova!''