¹ Ingolida yakabisigwa; ingolide isalala mbiyakasanduka! mabwe asalala alisowedwe achoko chamigwagwa woonse. ² Bana balombe babotu ba ziyoni bakeelede bulemu bwabo mungolide isalala, pesi lino balangika mbuuli nkomeki zyabulongo, mullimu wamaboko amubumbi! ³ Tanzya bawunpe balanyonsya bana babo, pesi bana basimbi babantu bangu baba aamoyo mubi, mbuuli mpoo zili muchimpayumu. ⁴ Lulimi lwamwana uunyonka lulanamatila kubwaasa bwamulomo wakwenkaambo kanyota, bana balakkumbila chakulya, pesi tachiwo. ⁵ Abo bakabide kulya zinono lino baleezukide mumigwagwa. Abo bakakkomena kabazwaata zizwaato lino bacha kulala mumalwi amadota. ⁶ Chisubulo chamwana musimbi wabantu bangu mbupati kwiinda chibi chasodomu, chakanyonyonwa mukiindi kanini alimwi taakwe maboko aakaguma aalinguwe pe. ⁷ Bazuluzi bakwe bakalisalede kwiinda sikunkwe,kutubisya kwiinda malili; mibili yabo yakali kusalalisya kwiinda mabwe, bube bwabo bwakali mbuuli Safila. ⁸ Lino chiwa chabo kwasiya kwiinda muye; tabachilemekwipe mumigwagwa. Zikkumba zyabo zyakanamatila aamafuwa aabo; zyayuminina mbuuli nkuni. ⁹ Abo bakajayigwa apanga balimbubo mbubo kwiinda aabo bakajayigwa anzala, banyana, bayaswa akookubula zilyo zyamumuunda. ¹⁰ Maboko aabanakazi bawuya akajika bana babo; bakaba chakulya chabo muchiindi eecho mwana muimbi wabantu bangu bakali kunyonyonwa. ¹¹ Jehova wakatondeezya bukkali bwakwe boonse; wakatulida kunyema kwakwe kuyoosya. Wakayasya mulilo mu Ziyoni wasyukuta ntalisyo zyakwe. ¹² Baami banyika taakwe nibakasyoma pe, nikuba bantu bamunyika takwe wakasyoma pe, kuti wajana basinkondonyina balanjilana kumulyango we Jelusalema. ¹³ Ezi zyakachitika nkaambo kazibi zyabasinsimi bakweazibi zyabapayii bakwe abo bakatila bulowa bwabalulami akati kakwe. ¹⁴ Bakatuntulika, boofu, mumigwagwa.Bakali sofweede loko abulowa bwakuti takwe wakalikukonzya kuguma zizwaato zyabo. ¹⁵ ''Oko! noosofweede!'' bantu bakalilila. ''oko! oko! utagumi! mpawo bakatuntulika; Bantu bakati kumanyika, ''Tabachizokkali mumo limbi pe.'' ¹⁶ Jehova lwakwe wakabamwaya; Tokoyobalanga limbi pe. Tebakalemeka Bapayizi, alimwi tebakatondeezya kulemeka bapati. ¹⁷ Menso esu akachilwa, kulangilila lugwasyo chabuyo; kuzwa kumalambo eesutwakalikulangilila kuchisi chakatalikukonzya kutuvuna. ¹⁸ Bakatobela ntaamo zyesu, kuti tutakonzyi kweenda mumigwagwa yesu. Mamanino esu akali abaafwifwi amazuba eesu aya kumamanino, mamanino eesu asika. ¹⁹ Basikututobela besu balaaluno kwiinda chuungwe wakujulu. Bakatwaandila kuzilundu akutulinda munkanda ²⁰ kuyoya kwamumpemo zyesu-bananikidwe ba Jehova-nguwe wakajiswi mumalindi aabo; eezyo mbuuli mbuzyakaambidwe, ''munsi lyamweenzule tuyoopona akati kazisi.'' ²¹ Botelwa akukondwa, mwana musimbi wa Edomu, iwe nookkala munyika ya Uzi. Pesi akulinduwe nkomeki iyoosika; unookoledwe akuligwisya zizwaato kuba maya. ²² Mwana musimbi wa Ziyoni; Chisubulo chako chiyoomana; takoyooyungizya buzike bwako pe. Pesi mwana musimbi wa Edomu, uyo chisubulo kukubisya kwenu; uyooyubununa zibi zyenu.