¹ Mwami wavumba mwana musimbi waZiyoni munsi lyajoba lyakunyema kwakwe. Wawaalila lubono lwaIzilayeli aansi kuzwa kujulu. Tayeeya chilyatililo chakwe mubuzuba bwakunyema kwakwe. ² Mwami wamena alimwi takwe nakaba aaluzyalo kumadolopo woonse aaJekkobbu. Mumazuba aakunyema kwakwe wakawaalila aansi myuunzi iikwaabililidwe yamwana musimbi waJuda; mukuubula wawaalila aansi bwami abeendelezi bwabo. ³ Alunyemo lupati wagwisya lwija loonse lwaIzilayeli. Wagwisya jaanza lyakwe lyalulyo kunembo lyasinkondo. Watenta Jekkobbu mbuli mulilo uuyaka uusyukuta zyoonse zyuuzyungulukide. ⁴ Mbuli sinkondo, watondeka kanta kakwe kulindiswe, alulyo lwakwe ulilibambilide kuyasa. Wajaya boonse bakali kumubotezya mutente lyamwana musimbi waZiyoni; watulida bukali bwakwe mbuli mulilo. ⁵ Mwami waba mbuli sinkondo. Wamena Izilayeli. Wamaena maanda akwe woonse. Wamwayuula zichijilo zyakwe. Wayungizya kulila akoomoka mukati kamwana musimbi waJuda. ⁶ Wabukila chikombelo chakwe mbuli ng'anda yachilili. Wamwaya busena busalala bwakuswaananina. Jehova wachia busena busalala bwakuswaananina abuzuba butegwa Sabata kuti bulubinkane muZiyoni, nkaambo wanyansya mwami amupayizi mubukali bwakunyema kwakwe. ⁷ Mwami wakaka chipayililo chakwe alimwi waleka chikombelo chakwe chisalala. Wapa malambo aabwami bwakwe mumaanza aasinkondo. Banyampula loompololo mung'anda yaJehova, mbuli mubuzuba busalidwe bwapobwe. ⁸ Jehova wayeeya kunyonyoona bulambo bwamwana musimbi waZiyoni. Watandabika kakole kakweela alimwi taakasya jaanza lyakwe kukunyonyoona bulambo. Wachita zichijilo abulambo kuti bulile; antoomwe zyakaloba. ⁹ Milyango yakwe yakabbila munyika; wanyonyoona akutyoloola tuponda twamulyango wakwe. Mwami wakwe amwana musimbi wamwami bali aakati kamanyika, mulawu tuuchiwo vpe abasinsimi bakwe tabachijani chilengano kuzwa kuliJehova. ¹⁰ Basilutwe bamwana mulombe waZiyoni balakkala aanyika muluumuno. Babika lusuko aamitwe yabo akuzwaata masaka. banakalindu baJelusalemu bakotamika mitwe yabo aanyika. ¹¹ Menso angu akatala akaambo kamisozi yabo; tumbu lyangu lilaguluma; zyangu zyamukati zilagwisigilwa aanze akaambo kalunyonyoono lwamwana musimbi wabantu bangu, bana atunsabila balakatala mumigwagwa yamuunzi. ¹² Baamba kuti kumanyina, ''Nchili chakulya awayini?'' aawo nibakatala mbuli mwaalumi wachiswa mumigwagwa yamuunzi, mawumi aabo alitilidwe aanze muluyando lwamamama aabo. ¹³ Ndilatyeni kulinduwe, mwana musimbi waJelusalemu? Kujana ndakweezyanisya aanyamaanzi, kuti ndikuumbulizye, nakalindu waZiyoni? Chilonda chako nchipati mbuli lwizi. Ngwani ukonzya kukuponia? ¹⁴ Basinsimi bako bakubonena zilengano zyakubeja zyabuyo. Tebayanzaala zibi zyako kuti zyoolwe zyako zikuboolele, pesi bali aakwaamba kulinduwe kwakubeja kusowa. ¹⁵ Boonse biinda munzila balakambilila maboko kulinduwe. Balafota akutikinia mitwe yabo aatala amwana musimbi waJelusalemu akwaamba kuti, ''Ooyu ngumuunzi na ngubakali kuti, 'Kubotezegwa kwaBubotu,' 'Lukondo lwaNyika Yoonse'?'' ¹⁶ Boonse basinkondonyokwe balajula milomo yabo aatala anduwe. Balasimbula akuluma ntwino mubunyeme akwaamba kuti, ''Twamumena! Oobu mbuzuba mbutwakali kulindila! Twakakkala kuti tububone!'' ¹⁷ Jehova wachita nzyabambide kuti achite. Wazuzikizya jwi lyakwe. Wamuzunda chakutaba aaluzyalo, nkaambo wazumizya sinkondo kuti abotelwe aajulu aandinywe; wanyampulwa lwija lwabasinkondonyokwe. ¹⁸ Moyo wabo wakalilila kuMwami, malambo aamwana musimbi waZiyoni! Misozi yako ngikakunke mbuli mulonga mansiku asikati. Utakalyookezyi pe, menso ako kutalyookezya. ¹⁹ Buka, lila mansiku, kumatalikilo aakati kabo! Tila moyo wako mbuli maanzi kunembo lyabusyu bwaMwami. Nyampula maanza ako kulinguwe akaambo kamawumi aabana bako bafwa nzala muchimpetu chamugwagwa umwi awumwi.'' ²⁰ Bona, Jehova, ulange aabo mbuwachitila munzila eeyi. Sena banakazi kabalya michelo yamatumbu aabo, bana mbibakabamba? Bapayizi abasinsimi bakajayigwe na muchikombelo chaMwami? ²¹ Boonse baniini abapati balilede mulusuko lwamumigwagwa. Banakazi abaalumi bangu baniini bajayigwa epanga; wabajaya kotabafwidi nsoni. ²² Wayita, mbuli mboyita bantu kubuzuba bwapobwe, basinkondoma kulubazu lwangu, mubuzuba bwalunyemo lwaJehova takwe wakanzwenga na kupona; aabo mbindakabamba akulela, sinkondoma wanyonyoona.