¹ Akaambo kakuti Kkilisito wakatufwabila kunyama, anywebo mulisamike munzila yeelene aanjiyeeyi, nkaambo kufumbwa muntu wafwa kunyama ulaanzeene achibi. ² Aboobo ooyu muntu, mubuumi bwakwe boonse tacheelede pe kuponena kunkosya zyanyama, pesi kuluyando lwaLeza. ³ Nkaambo chalampa chiindi kamuliikuponena ziponenwa aabamasi, kuponena munkosya zyamubili, mukweemuzya, bukolwi, amukuyobuchita zisesemyo zyakukomba mituni. ⁴ Mulicheechi zilabagambya kuti tamuchijatili aamwi pe ambabo munchito zitaluleme, aboobo baambuula bubi aatala andinywe. ⁵ Bayoolyaambilila kulinguwe ooyo ulibambilide kuzoobeteka bawumi abafwide. ⁶ Akaambo kaako Makani mabotu akakambawukwa akubafwide, kuchitila kuti, nikuba bakabetekwa abantu kunyama, pesi bapone kumuuya mbuli mbabede Leza. ⁷ Mamanino aazintu zyoonse aswena. Aboobo amube amiyeeyo mibotu mulondoke kuchitila kuti kamunokomba kabotu. ⁸ Chipati kwiinda zyoonse, amusungwaalile kuyandana, nkaambo luyando luvumba mulwi wazibi. ⁹ Amukatambulane akuchitilana kabotu, kakutakwe unyontooka pe. ¹⁰ Mbuli umwi awumwi mbaakapegwa chipo, amuzibelesye kukugwasyania, mbuli babaanzi bazyiimo zyaandeene zyaluzyalo lwaLeza. ¹¹ Na kwaba waambuula, kwambuula kwakwe akube kwamajwi aLeza. Na kakuli ubeleka milimu, abeleke kazizwa kunguzu nzyamupa Leza, kuchitila kuti mulizyoonse Leza alemekwe kwindila muliJesu Kkilisito, nkaambo bulemu anguzu nzizyakwe kwalyoonse alyoonse. Ameni. ¹² Nomuyandwa, tamugambi pe aatala amasunko makolokolo aalikumuchitikila, kwaba anga malweza. ¹³ Pesi, amukondwe kuti mulikwaabana mafwabi aaKkilisito, kuchitila kuti anywebo mukakondwe kuchiindi chakuyubununwa kwabulemu bwakwe alukondo lupati. ¹⁴ Na mwakutukilwa akaambo kazina lyaKkilisito, mulilongezezegwe, nkaambo Muuya wabulemu antoomwe aMuuya waLeza unooli alindinywe. ¹⁵ Kutabi umwi wenu uyoofwaba akaambo kakuti mujayi, mubbi, na simuchita zibi, nanka sikudyobokela mutwaambo twabantu. ¹⁶ Pesi na umwi wafwabila bunaKkilisito, atawusi pe; anukuti, ngalumbayizye Leza akaambo kezina lyakwe. ¹⁷ Nkaambo chindi chasika chakuti lubeta lutalike empuli yaLeza. Na lwatalika aswebo, bayooyiima aali batazumini makani mabotu aaLeza? ¹⁸ Alubo ''na kachili chiyumu kubaluleme kuti bakafutulwe, ino bayooba buti aabo batakwe buleza antoomwe abasizibi?'' ¹⁹ Aboobo aabo bafwabisigwa chaluyando lwaLeza, mukuchita zibotu, ngabapedekezye myuuya yabo kuMulengi usyomekede.