¹ Nobamakaintu amulibombye kubalumi benu. Amuchite oobu nikuba kuli balaabalumi bataswiilili jwi, kuchitila kuti basanduke kwiindila munchito zyabakayintu babo, kabatakambawukilidwe pe. ² Banoli babona kulemeka nkumubachita kuli aluyando. ³ Kulibotyabotya kwenu kutabi kwaanze luzutu pe, mbuli kulilungitizya masusu, kuzwata ngolide nikuba kulisamika mpasya zitentema. ⁴ Pesi, eechi ngachichitilwe muntu wamukati, nkaaambo mbombubo bweebesi bwamuuya wabubombe akulibatamika, koongola, oobo buyandisi kuliLeza. ⁵ Mbombubo banakazi bachiindi basalali basyoma muliLeza mbubakalibotezya kabalifwiinsya kubalumi babo. ⁶ Mbuli Sala, banyoko mbaakalibombya kuliAbbulahamu akumuti mwami. Lino nywebo mwaba bana bakwe kapati na mwachita zibotu alimwi kamutayoowi mapenzi. ⁷ Mubweelene, anywebo nobalumi mukazikane kabotu abakaintu benu mukumvwisisyania akubalemeka, mbuli chilongo chikompeme, nkamuzi kuti mbasimulya lukononyokwe lwaluzyalo lwabuumi nkokuti inkombyo zyenu tazikachizigwi. ⁸ Kumamanino, moonse, mube amuzeezo ukozyenie, mube akwetelelana, kuyandana mbuli babunyina, amoyo mutete, akulibombya. ⁹ Mutabweedezyi chibi kuchibinyina nikuba kubweedezya chisapi kuchisapinyina. Anukuti amubweedezye kulongezya, nkaambo eezi nzimwakayitilwa, kuti mukakonzye kuyookona zilongezyo. ¹⁰ ''Ooyo uyanda kubona buumi bubotu akubona mazuba mabotu weelede kuti wakasya lulimi kububi amulomo wakwe kukwambuula lweeneeno. ¹¹ Akube kuti alilesye kububi akunoochita zibotu luzutu. Ayanduule luumuno akulutobela. ¹² Nkaambo menso aaMwami alabona baluleme, alimwi matwi aakwe alaswiilila kunkombyo zyabaluleme. Pesi busyu bwaMwami buli aabukali kulibaabo bachita zibi.'' ¹³ Kabi ngwani ooyo unga ulamubisizya na mwasungwaala kukuchita zibotu? ¹⁴ Pesi na mwafwabisigwa nkaambo kabululami, mulilongezezegwe. Mutayoowi eezyo nzibayoowa. Mutapengi. ¹⁵ Pesi, musale Mwami Kkilisito kuti musalali mumyoyo yenu. Mukkale kamulibambilide kuti mukapandulwide boonse bamubuzya makani abulangilizi mbomujisi, mukulifwiinsya akulemeka. ¹⁶ Amube amamvwido mabotu kuchitila kuti nibamwaambikizya zitali kabotu akumwaambula anga ndinywe basizibi bakafwe bweeme akulijata kwenu kubotu muliKkilisito Jesu. ¹⁷ Kulimbubo, na kakuli kuyanda kwaLeza, kuti mukafwabisigwe akaambo kakuchita zibotu kwiinda kuchita zibi. ¹⁸ Alakwe Kkilisito wakafwaba lomwe kafwabila zibi. Ooyo wakaluleme wakafwabila nitwakataluleme pe, kuchitila kuti atuswenzye kuliLeza. Wakajayigwa kunyama, pesi wakabusigwa kuMuuya. ¹⁹ MuMuuya, wakiinka akuyookambawuka myuuya iilimuntolongo kwalino. ²⁰ Eeyo yakataswiilila pe kuchiindi nchaakachili kukazika moyo wakwe Leza mumazuba aaNowa, mumazuba akuyakwa kwabwaato, mpawo Leza wakavuna bantu bache biyo, myuuya musanu ayitatu, kwiinda mumaanzi. ²¹ Eechi nchitondeezyo chamubbabbatizyo ooyo umuvuna lino, teensi kwaamba kuti mbuli mbotusamba tombe amubili pe, pesi mamvwido mabotu kuliLeza, kwiindila mububuke bwaJesu Kkilisito. ²² Ooyo wakaya kujulu, uulikujanza lyalulyo lwaLeza, bangelo, beendelezi, abasimanguzu boonse, bakabikwa kunsi lyakwe..