¹ Nkikaako amusowele kumbali bubi, lweeno, kuupawupa, bbivwe akubejekezya koonse. ² Mbuli muvwanda uchitumbukwa, mulakamine malili mabotu aajwi, kuchitila kuti mukwiindila mulingawo mukonzye kukomena kulufutuko, ³ na kamuli mwakalabila akuziba kuti Leza ngusibuuya. ⁴ Muboole kulinguwe mukuti ndibbwe gumi eelyo lyakasowegwa abantu, pesi kalisalidwe kuliLeza mbuli bbwe liyandika kulinguwe. ⁵ Anywebo mbuli mabwe mawuumi muliikuyakwa kuti mube ng'anda yaMuuya, bupayizi busalala bupa zipayilo zyamuuya zitambulika kuli Leza kwiindila muliJesu Kkilisito. ⁶ Muzili mumagwalo eezi: ''Langa, ndiyosimpa muZiyoni ibbwe lyechiswi, lisalidwe alimwi liyandika. kufumbwa usyoma kulinguwe takoyowusa.'' ⁷ Nkokuti bulemu, mbubwenu, nimusyoma. Pesi kulibaabo batasyomi, ''Eelyo bbwe ndibakasowede bayaki, ndilyakazooba mbandama yachiswi,'' ⁸ Alimwi, ''Ibbwe lileba alimwi mwaala uubachita kuti babijilwe.'' Balalebwa nkaambo bakalikaka jwi lilindilyo litondeka nzibakatumidwe kuti bakachite. ⁹ Pesi nywebo mulizyalane lyaLeza, bupayizi bwabwami, chisi chisalala, basale baLeza, kuti mukakambawuke milimu igambya yayooyo wakamwiita kuzwa mumudima kumweeta mumumuni wakwe ugambya. ¹⁰ Chiindi teensi mwakali bantu pe, pesi lino mwaba bantu ba-Leza. Teensi mwakali mwalutambula pe lweetelelo, pesi lino mwakalutambula lweetelelo. ¹¹ Nomuyandwa, ndamulayilila mbuli bazwakule, banakweenda basaalide kuti mulilesye kunkosya zyenyama zilwana aamyuuya yenu. ¹² Kweenda kwenu aakati kabamaasi kweelede kuba abulemu, kuchitila kuti aawo nibayomupa mulandu wakuchita chibi, bakalange milimu yenu mibotu akuyoobwedezya bulemu kuli Leza mubuzuba oobo mbwayoolibonia. ¹³ Amukalibombye kubwami boonse bwabantu nkaambo kaMwami. Amukabaswiilile boonse bami nkaambo mbapati, ¹⁴ na beendelezi bazilikiti, batumidwe kusubula basimuchita zibi akusumpula aabo bachita ziluleme. ¹⁵ Nkaambo ndoluyando lwaLeza, kuti mukwiindila mukuchita zibotu muumuzye kwaambuula kwakutaziba kwabantu bafubafuba. ¹⁶ Mbuli bantu bangunukide, mutakabelesyi lwaangunuko lwenu kukuvumbya zibi, pesi ngamube mbuli bazike baLeza. ¹⁷ Amulemeke bantu boonse. Amuyande babunyina boonse. Muyoowe Leza. Mulemeke bami. ¹⁸ Nobalanda, amubaswilile basimalelo benu akunoobalemeka lyoonse. Mutanooswiilili basimalelo babotu abatontozi luzutu pe, pesi akulibaatalomene. ¹⁹ Nkaambo eechi chilalumbika, na wafwabila bululami kazi kuti takwe mulandu kazi kuti ulikuzuzikizya ziyanda Leza. ²⁰ Ino kuli bulumbuunzi na wasubulwa akaambo kamilandu njiwachita mpawo wazitambula amoyo mulamfu? Pesi na wasubulwa kochitide milimu mibotu, eechi chilalumbayizika kuliLeza. ²¹ Nchenchicho eecho nchimwakayitilwa, nkaambo Kkilisito lwakwe wakamufwabila. Wakamusiila chitondeezyo chakuti mukatobelezye mumukondo wakwe. ²² ''Utakwe chibi nchakachita, nikuba lweeneno lwakajanika mumulomo wakwe,'' ²³ iwakati naakatukilwa, takabwedezya pe. Aawo nakafwabisigwa, taakabayosezya pe, pesi wakalipedekezya kuliyooyo uubeteka chakweelanisya. ²⁴ Lwakwe mwini wakayumuna zibi zyesu mumubili wakwe achisamu kuchitila kuti swebo katuli twafwa kuchibi tukaponene bululami. Amibunda yakwe mwakapona. ²⁵ Nywebo moonse mwakali mbuli mbelele ziswekede, pesi kwalino mwakapiluka kuMweembeli aMulinguli wamyuuya yenu.