¹ Ndikusungwaazya baalu bali akati kenu, mbuli mbendi mwaalu andime, amukamboni wamafwabi aaKkilisito, alubo ndime umwi wabatakaabane mubulemu oobo butazooyubununwe. ² Amweembele butanga bwaLeza oobo mbomuliikubbasopa, chabalangi peepe chakusungilizigwa, nikuba chakuyanda kujana mpindu, pesi chakuliyandila. ³ Muteendelezyi bantu balimunsi lyenu mbuli bami, pesi mube chitondeezyo kubutanga. ⁴ Eelyo Mweembeli Mupati aakuyubununwa, muyoopegwa munsini wabulemu uutakulumpali pe. ⁵ Munzila imwi, nywebo nobalombe, amulibombye kubaalumi bapati kulindinywe. Moonse, mulifwiinsye, mulisamike bubombe kuli umwi awumwi. Nkaambo Leza ulabakazya basikulisumpula, pes ulapa luzyalo kubabombe. ⁶ Nkiikaako amulibombye munsi lyejanza pati lyaLeza nkokuti akamusumpule kuchiindi cheelede. ⁷ Amusowele kulinguwe woonse makataazyo eenu nkaambo ngumubamba. ⁸ Amukalondoke akuchenjela, nkaambo sinkondonyokwe saatani uleendeenda mbuli mulavu uvuuluma, kavwima ngwatalye. ⁹ Mukamukazye mukiime njii mulusyomo, nkaambo mulizi kuti aaya mafwabi ngaalikuswaanwa ababunyina benu kumanyika woonse. ¹⁰ Pesi musule akufwaba kwakayiindi kaniini, Leza waluzyalo loonse, ooyo wakamwiita mubulemu bwakwe butamani muliKkilisito, uyoomulomania, uyoomusimpa, uyoomusimya, akuyoomuzikitizya. ¹¹ Akube bwendelezi kwalyoonse alyoonse kulinguwe. Ameni. ¹² Kwiindila muliSiluvenasi mukwesu usyomekede (mukumuziba kwangu) ndamulembela mubufwifwi, chakumusungwaazya akupa bukamboni kuti eezyo nzindakalemba nkasimpe kaluzyalo lwaLeza. Amwimikile njii mulinkako. ¹³ Mbungano yamuBbabbiloni, eeyo usalidwe antoomwe andinywe, iliikumujuzya loko. Alakwe Makki, mwana wangu, uliikumujuzya. ¹⁴ Amujuzyanie alumyontano lwaluyando. Luumuno lube kulindinywe moonse nimuli muliKkilisito.