ANGAK LAWNGUAN KOWI TARIPRA 1 Enni pungma dawng kowi tasenra hai takhüm tabawpra ün mih, matawng hownia kow uang mih chow? Enni kowh pabukma hownia kow, angak saktuak lak hownia kow tasen reng, nami bowk bowk hownia matawng paw nadowi pabow? 2 Enni ir khai chepaw, hingka dowi maru sak pat enni paw khai; enni ir khai chenganchepaw ka paw hing nowngia ka dowi ka enni dowi, enni hing tanang takhüm hai tasenra uowi khai rakowi tawngpaw kadowi, tawngplawng Thurai kowi enni lü dowi mih rakowi nauah mih dow enni ka dowi chekhai. 3 Enni lü chepaw enni alük krang tatawng dowi rakowi enni ka dowi, pe enni dowi, tawngplawng, naiungla plawnlawn kownmi enni hing tuak ta hüah chekhai rakowi. 4 Aw sak nik dowi miuüa low, lusa auiua naown kown mih dow, Thurai hown ransu na chekhai pami enni tuk dowi chekhai bow? Lusa auiua nana kown nau mih sarui dow, Thurai hown ransu mih aia tathawpah mih chekhai. 5 Nahanow, enni katuak mih cha laiklow kowi tek naklak kownmi tamingah khai mih bow? “ a-i matia sak kowi aia lümla uangpe mih dow, nau chow mang nau a-i mih chekhai”. 6 Hanow, aia dow nami klen kowi sanara uang pe reng; nachengachepaw cha laiklow kowi tek mih “Thurai mih chang bawri mih kowi dow kingah küa-ah khai, khamsum miuüa kowi tarap chedow, aia sanara uang pe reng. 7 Naiawng mih rakowi Thurai tut-e kup daw iai iowng büah diah, süngnam kowi tarap chedow, kingküa büah diah, hanow enni hownia napowt kown taih. 8 Thurai tut-e tatawn büah diah hanow aiamat paw uang tatawn enni kown, aw maru ngak miuüa low, enni rut ün siah-ah sauah büah diah, maru lumlaw miuüa low saktuak pe chim saiah büah diah. 9 Enni tuak krat büah hanow, taprüa diah; enni ren kowchowk kowi, taprüa tanguk diah, enni piaw müa kowi kawmkratra pacham chowngla. 10 CHAKRAMANG pur kowi dow, kup daw iai iowng büah diah hanow aia mih nape phaw enni kown. 11 Aw tainauuüa low, hang taprawng taren ria ria büah diah, lowra maru aia tainau kowi tek nak lak mih chepaw parawng mih dow, ari arow kowi tek naklak mih chekhai, ari arow kowi prawng ren mih dow ari arow kowi en tek naklak hanow ari arow chün mih en na dowi mih chekhai ari arow tara chet miia en nakhai rowt kown mih chekhai. 12 Thurai ari arow pe miia hai trachet miia lowkia chow chataih uowi, nowngia lawng miia hai nowngia piak miia nakhai, nachenganchpaw en matia iawngmichow klowkchak kowi atawima krawi cham khai mih bow? NACHANG BAWRI DOWI KOWN MIH VÜI 13 Kawmat sünta madiah, enni pungma dawng kowi amiaiawng mih tek khai, “kawmat kowi chepaw tharau chepaw paimi marow kowi chünchü a-i nacham kowi hanow, nami kowi dow paning nachang kun hanow ahuma a-i namarat kown” pakhai. 14 Enni dow tharau khe kow lawnguan tuk dowi; enni kow chownglawng matawngiawng ngaichow nauowi kowikown pami? Enni dow mai iawng naka mih nawngcchow mowr uang tatüng hanow, akung kowi plan kut tama khai iawk chatai iawng taiah enni na mih rakowi chekhai. 15 Chepaw, “CHAKRAMANG nauta now a-i nasing uowi kown hai a-i maka lup hai paimi lup dow nachang kown” enni natek rowt kown mih ta ka diah chekhai. 16 Nachenganchepaw, kawmat dow enni matia atuak bawri chang khai, maiawng mih bawri maiow dow angak chekhai. 17 Nahanow, miaiawng mih chow lup iung nachang kown atukma kow chenganchepaw nau hing chang dowi mih dow, angak chekhai.