ALAWNG 3

DAI LAWNGUAN KOWI TAKHET DIAH 1 Aw ang tainauuüa low, ahuma tüngsang mih na bowk kown mih hang katuak bowk büah diah, atüngsang miuüa mih akeng mih maru lak-e langkrat rowt mih napaw pe tara kown pami enni tuk chekhai. 2 A-i bowk bowk ahuma kowi atungma atawi ama a-i uowi reng, lowra maru laiklow tek kowi katpaw tawima dowi mih maru achimami chekhai, naiawngmi maru dow amatni kowh pabukma paw nowngia tow khowti-ah reng. 3 A-i laiklow nowngia chünla kownkow, kawrnga nawr kowi kia kowm a-i pe tapah khai, amatni kow pe kawmah mih paw a-i nowngia khum plan küngah reng. 4 Chawnlawng ün mipaw aiukma chenganchepaw, li kürma uang thüm khe hutah chepaw ate miia saknau mih prakowi aplang müa chala chami hai penowngia mangah chekhai. 5 Naiawng plawng dow dia mih paw kowh kowikow aprek chala chami na khai chepaw nowngia chang bawri chawktowk mih chekhai, mai iang asin chami hai kaurawng aphia mami nowngia kam ün mih samtuakah büah madiah. 6 Dai mih paw mai iawng chekhai, lusa angakra tekmami, a-i kowh kowikow tawi uowi mih, a-i kow chowmkrang uowikrang kowi pe sür pelawkah mih chekhai, a-i k kowh buk maiow mai kowikow ngare towkmiia hai chownglawng piak miia chekhai, 7 Kaurawng uaramchak hai uakling uaber maten ün, asadua hai dam maten ün mih kowi sangching nowngia lekah thüm chekhai lusa sangching mih hown nowngia thumah büah reng. 8 Dai mih tarapche dow, amiaiawng mih paw nowngia lekah thumah dowi nowngia tawmah duah dowi mih ngak, makowng kru atek ma uowi chekhai. 9 Nami hown dow, a-i pa CHAKRAMANG kowi dow a-i kiow lah khai, a-i lusa maru kowi Thurai klungklang iawng thawpah a-i mih kowi thaah nangah khai. 10 Nawr lowkcha mih hownia kiow müa hai atha hai piati paw uang lawt reng, aw ang tainauuüa low, naiawng ün mih krang lahawm kown na dowi. 11 Tui na lowkchow nowngia tawkche adingmi hai asur mih ün tui pre chaing uang nowngia lawt ka kat tak pabow? 12 Aw ang tainauuüa low, iudut sing kowi kanrawn iuih ka kat tak bow? Grep rui kowi paw iuih dut nowngia iuih khai bow? Tui ikmami lawtra hownia dow ading mami tui nowgia lawt dowi. ANAMA MIH CHANLAIRA LAWNGUAN 13 Enni puangma dawng kowi chanlaira hai tukra kami uowi ne bow? Chowmkrang uowi krang iungmi hai lup iung chang chanlaima hown tow plawng towsakma hai lup pacham tüngah lah. 14 Tawkche, enni saktuak kowi Irsira büpma hai kowmatia pur downg tia chataih enni mü khai hanow lainowm kowi kingküa hown enni chanlaira bawri hai hang tek dai lai büah diah. 15 Niawng mih chanlaira mih dow mukung hown kow uangiu lawtmi na dowi, süngnam hown kow uang lawtmi chekhai rowt, lusa maru kiang powmiawng lümla kiangra dow nadowi chekhai. 16 Tawngplawng, irsira hai kowmatia pur downg tia thakmi uowi krang kowi dow, pusara hown angak maiow uowi reng 17 Nachenganchepaw, mukuang pra hownia kow chanlaira uangiu lawt mih dow müng chük nowm kowi chima sakhawt chekhai, nami klen kowi dow, akümma aklamma kunma iungma, aklowp alang paw kaneuma iung khai; saksing sanara hai atekma iuih iung pauiung paw uang lawt reng anem chowng maru dowi apuan putma hown na dowi. 18 Hanow, taking tasang thawp miuüa maten dow, taking tasangra cham hai sawt aliu büah mih dow, taking sangra lup iung hai aiuih apau iung ngen singra ka reng.