ANOWM MAMI SAKRAURA HAI OWMRA HAU MIH 1 Aw tainau-uüa low, enni hai a-i CHAKRAMANG akrangmami Isu Krista owm miuüa dow, hang nem chowng maru büah diah. 2 Enni takuara kim kowi maru kruala kuk rutbüt mipaw uowi ne now, maru ngarawng ngaraima mih kowrma alawima mih khupla mih paw uowi ne khai. 3 Kowrma klangiungma khup mih kowi dow enni hawt towah sak hanow, “en mih dow chowmra aiungma mih kowi kachowm diah” enni pakhai maru angaraima mih tut-e dow, “en mih dow paimi ra-e kowiowng diah” pachepaw ang khawk ria towmphai kowi-e chowm diah pachepaw enni tekpe khai. 4 Anem achowng enni kow uowi chekhai enni aia müah mih krang kanema enni saktuak asür alawkma chekhai pami tachet dowi bowt kabow? 5 Aw ang sakrauah mih tainauuüa low, sünta büah madiah, lusa maru atuak kowi maru ngarawng ngarai miuüa mih owmra kowi nakureng kownmi hai aiamat kowi sakrau miuüa tut-e aia pren napeah kown khamah naka kown Thurai mih aia low hai langrui langkloah dowi chekhai pabow? 6 Enni mih dow maru ngarawng ngarai miuüa kowi mih dow, enni hing klowah dowi mih chekhai, kureng miuüa mih enni luk kowi anowng apowng chang enni dowi da? Now tara chetra kim kowi küngla iuala enni reng mih na büah dowi da? 7 Miachow ming klangiungma rükah mih kureng miuüa Krista kowi prangren dowi kabow? 8 Enni matia tasakrau mih powmiawng en klowk chakuüa kowi en nasakrauah kown chekhai pami cha laiklow maah ruiah miiawng ari arow lang kraing nowm mih kowi enni chün hanow, enni chang mih naiung kown chekhai. 9 Anem achowng enni chang khai hanow angak lup enni chang mih chekhai ari-arow piak miuüa enni nami chekhai. 10 Lowra maru mih ari-arow chün bowk nachenganchepaw lowkchow lawnguan mih piakta khai kowchalow hanow bowk bowk piakta mih angak chekhai. 11 Tawngpalawng Thurai aia tek mih, “hang chang iang diah” pami dow, “hang tu maru diah” pakhai iawk chekhai, chang iang dowi chepaw, tu maru khai kowchalow hanow, ari arow en piakta mih hing na khai ngowng mih chekhai. 12 Hanow, ari-arow pathaulang a-i mih laiklow tawngah kengah mih hai napaw pe a-i tara kown pami tuk hai now tek laiklow büah hanow, lup mih paw chang büah diah. 13 Tawngplawng miaiawng mih maru chow saksing sanara uowi dowi pat chang miuüa kowi dow, saksing sanara tawi dowi hai napawpe tara kown, tuk saksing sana mih maru kowi tarap chedow, tara chetra kowi awng ra prangra nauowi kown chekhai. OWMRA HAI LUP CHANG 14 Aw tainauuüa low, hanow miaiawngmi maru chawk towk mih “ang kow owmra uowi” pakhai-e dow aia lup-la kowi lawhawm mami iawng hing tüngah dowi-e dow matawng chow tamak mira nauowi kown bow? Naiawng mih owmra hai dow nanowngia lawngah kown bow? 15 Lowra mih tainau kachakuüa chepaw tuama chepaw khup dik tawnguat hai chak kham nau khai-e dow, 16 Hanow, enni pungma dawng kowi amiaiawng mih chünchü amatni kowi tekpe mih, “sak khawtma hai mang diah, mu du kanglaima hai uowi diah” pah tekpe-e dow tawkche dow amatni kowh kowi lang pankri mih uan mih dow hing peah dowi hanow matawng chow takmak kown? 17 Naiawng palawng dow, owmra dow uowi now naka alup ala dow uowi dowi hanow owmra dow akowngma chekhai. 18 Nachenganchepaw, “matawng mih chabak tekpe mih owmra uowi pakhai, matawng mih chabak alup ala iung changpe büah khai taih” aiua paw nowngia uowi chekhai, naiawng mih na khai kow hanow lup-la hai enni alow hing tüngah dowi matchang kowi owmra en nowngia ka mih krang samtüng ang madiah tara, ang mih owmra ang nowngia ka pami ang tüng en khai. 19 Thurai lowk chatai uowi pami owm khai, en tekpe mih kaneuma iung chekhai, süngnamuüa paw nami owm büah khai chür hai kram büah reng. 20 Nachenganchepaw, apawpla mami maru , owmra alup ala tawi uowi dowi hanow matwngpaw alup hing na dowi pami tatuk kown en nau bow? 21 Uang prek che a-i mih Abraham mih achapa Isak, rowsi kantawp rakowi awr ap kahi e, aia lupla rakowi kow awng prang hai tachi mih nadowi chekhai pabow? 22 Aia owmra hai lupla mih dow taiua uowi khai hanow, aia mih dow owmra kowi pe takümah pami en tuk chekhai, 23 Thurai chabowih laiklow uangtachi khai, “Abraham dow Thurai kowi owm khai, aia owmah mih dow awngra prangra kowi chünpe khai bowt tak” pami dow uang tatüng khai Thurai auiua padow rükpe aming khai bowt tak. 24 Maru mih alup ala rakowi tachi tanawmra uangtüng khai, owmra mih chataih rakowi nadowi pami en tuk khai bowt tak. 25 Naiwng mih rakowi dow, Rahawb, aia kow chinah miuüa kowi dow hawt howrah khai, aia lup-la mih rakowi tachi mih nadowi pabow? Akeng mih tiama iawng auat kowi amatni kowi chinah khai. 26 Kowh mih lümla tawi uowi dowi hanow akowngma chekhai, pami powmiawng dow alup ala tawi uowi dowi hanow owmra mih paw akowngma chekhai.