ALAWNG 5

KURENG MIUÜA LAWNGUAN 1 Kowmatia sünta diah, aw maru kureng miuüa low, enni luk kowi ngare nauang ting kownmi rakowi kar hai pla büah rawm rawm diah. 2 Enni kow dawngthawnguan piak bowk khowk hanow enni kow khupdip tawngklai ün paw lowngpang kremta bowk khai. 3 Enni kow kuk hai tai mih paw akih uang lawt bowk khowk chekhai, hanow akih lawtmi dow nakuak enni asum mih krang uangtüng müa nana kown hanow, maih hai nowngia kam tabowk powmiawng enni kowh mih dow nachowng bowk kown, akung mowi chow mih vüi dawngthawnguan enni krüm mih na chekhai. 4 Sünta büah diah, enni iüa kowikow lup chang miuüa sukkri sung enni peah dowi miuüa mih dow pla büah khai, cha ngen miuüa hek klow mih dow, lowra nowngia talami CHAKRAMANG pram uangting khai bowt. 5 Krang luk kowi mih apiawma hai anawngnia panpunma hai enni uowi khai, napawpe asak kownmi ni kowi dow sak kowi enni matia kri piawma enni uowi khai. 6 Achi nawmma mih kowi dow enni pe sumah hanow, enni paw tape asak khai, aiamat mih dow kingküa enni dowi diah. NOWNGIA KHAMLA MIH HAI THURAI CHUPRA LAWNGUAN 7 Nahanow, aw tainauuüa low, CHAKARAMANG uangiu dowm dowi mowr dow nowngia kham ngare pat iawng uowi büah diah, cha ngen miuüa aia iüa hownia ahuma asung uowima mih aiuih kowi chawngah reng hanow, mün khowt ni kowi chow uang ka dowi mowr dow, nakhowt ni kowi aia dow nami lawnguan kowi nowngia kham iawng uowi reng. 8 Enni mih paw nowngia kham ngare pat iawng uowi büah hanow, matia saktuak akhi kawtma uowi büah diah; tawngplawng CHAKRAMANG nauang kut plan uang iawk kownmi dow, tawn khai bowt. 9 Aw tainuuüa low, nakua-ah asum kownmi hai enni nauowila dowi kownkow lowkia lowkia kowi tanaura hangka tachang büah diah hanow, tara chet kla kowi iawng; sünta büah madiah, tara chet miia midow kim plawt ria kowi iowng reng khowk mih chekhai. 10 Aw tainauuüa low, CHAKRAMANG ming kowikow tek laiklow miia Risiuüa, amatni kowi changah anowng apowng mira hai nowngia kham ngare mi krang aku müah büah diah. 11 Sünta diah, miaiawng michow sak khawtma uowi miia dow amatni kaucha iukma a-i pa chekhai, Jawba nowngia kham ngare mih krang enni tuk chow, CHAKRAMANG dow achur mowr pat changpe mih krnag ün enni tuk chekhai, CHAKRAMANG mih dow saksing sanara hai sana miia atekma na khai mih chekhai. 12 Nami klen kowi aw ang tainauuüa low, ang kow laiklow langkri mih maka chekhai, enni hang kham sawi diah, mukung chepaw, krang chepaw, akengmi sarui kowi chepaw, hang kow kham sawi büah diah nahanow, anama hai lowra mih kowi paw, tara chetra kowi enni nanowngia kuak sum dowi kownkow chekhai. OWM MIUÜA THURAI CHUPRA 13 Enni pungma dawng kowi mia chow kawm kratra kami uowi ne bow? Nami dow pacham chup Thurai lah, miachow piaw mih uowi ne bow? Nami dow rowsira kiow müa meng pacham tek lah. 14 Enni pungma dawng kowi mia chow arau bau uowi ne bow? Thurai langhawah mih maru lawngtangchauüa kowi hawah laiah büah hanow, amatni CHAKRAMANG ming hai phawkpe sau hanow aia arau uowi mih vüi pacham chup pe Thurai lah. 15 Owm ta-ah hüah luk kowi chup Thurai mira dow, nami arau uowi mih maru kowi dow napa iungah kown, CHAKRAMANG dow nakrüngah kown; lup riak tawi rimata khai mipaw nalawtape kown. 16 Nahanow, enni chang ngak mih ün alawt talü-ah büah ria rai diah, taiua chup pe Thurai büah daih; hanow, naiuang enni kown chekhai, tawngplawng towsakma hai kow maru achima Thurai chupra dow, alup akraingma nanowngia changpe kown chekhai. 17 Eliza mih dow, a-i matia powmiawng aiung hai ngak mih lusa maru chataih nami chekhai, uang nauang dowi kownkow kaneuchow towplawng towsakma hai chup Thurai khai, sum ning hown tarukla mowr krawng luk kowi uang uang dowi bowt. 18 Nami kung kowi, kut plan chup Thurai khai iawk, mukung hownia uang uang iu uang khai hanow krawng hownia aiuih sar uang iuih pau uang phaw khai bowt. 19 Aw tainauuüa low, enni pungma dawng kowi amiaiawng mih chünchü lainowm hownia chamlang taprek khai hanow, amia chow aia kowi plan kut pawah kown. 20 Nami lowra maru ngak mih kowi, aia cham tamami tia hownia uang plan kut hawla iawk miia dow, nami aia sak kowi kowngra hownia aia lümla nalawngah hanow, ngak huma mih napet tape kown pami tuah büah diah.