AKUNG AMOWICHOW NIH KHIN LAIKLOW ¹ Akung anowi chow nih dow akhin pusa krat nauang ting kown pami tukah diah ² Maru kowmatia tiah chatiah thakmi ün tangka ngown mi ün pamatia tatow sakowm miün alowchow mami ün Thurai kowi hingtek naklak miün u hai pa lai chün dowi mih ün tuk awmrawm dowi mih ün achim asaima dowi mih ün, ³ kaphuaru kowi sakraura uowi dowi mih ün angak kangow tuak mih ün maru kowi angak kangow memi ün tow khiti dowi ün arang rawn mami ün aiung kowi nau khi dowi mih ün, ⁴ dia hai kowh chawk towk mih ün klowk maru dowi mih ün bawri chang mih ün Thurai lak-e pamatia iung müah chatiah tuak mih, ⁵ uat kowi katüng krowngchow chang kawngmu mih alak kowi dow anowm hing uowi dowi miün nauang uowi kown naün miuüa mih dow dungkung kleumai tadiah. ⁶ Amatni pungma dawng kowi matawng mih maru ngam padow maru kim kowi cham hawr iualua hanow kür uowi pauowi dowi mih masiuüa kowi khümah dowkah büah sak krai khai bowt mih sarui kowi krawi cham büah. ⁷ Lowra mih kowi asang dow aklum ma lainowm mami dow tuk hing ta dowi mih pra kowi nauowi büah kown. ⁸ Jania hai Jambrian Mosi kowi kingküa iüa miiawng dow lainowm kowi naking küa iüa kown, amat chi saktuak piak ta iüah bowk khowk chekhai, owmra mih kowi mih paw kala klowk auiua iüa dowi bowt. ⁹ Naün mih klen kowi mih dow akengmi matawng sia mih paw nanowngia changla mih dow naiüa dowi bowt, Jania hai Jambrian iüa iowngmi kowi dow maru maten mih dow amatnchi aching anowk uowi dowi mih krang tamata büah dowi kown. THURAILAI OWMRA HOWN NAKHAWT KOWN MIH ¹⁰ En mih dow ang tüng sang en mih ün ang uowi krang ün ang tuak mih ün ang owmra ün ang nowngia kham sumra ün ang sakraura ün hai ang nowngia kham ngare ün mih krang en tuk chow. ¹¹ Antiokhiia kowi ün Ikonio kowiün hai Lustra kua kowi ün nowng chang powngcha rahai pusara ahuma ang luk kowikow uangting mih ün nowng chang powng chang mira krangma kowi ang kham ngare mih luk hown kowi dow CHAKRAMANG ung lawng ang tang ang mih laiklow mih en ta chekhai. ¹² Lowra maru mih Krista Isu chowmkrang klangiung uowi krang klangiung ma mipowm iawng nachowm nauowi kown mih tuakah khai bowt, mih hanow naowngchang powng changra mih dow nakrum ngengche kown. ¹³ Maru ngak miuüa hai krawi ling krawi puan miuüa tarap chedow amatni uüi bak nanga ngamlam kown, akeng mih maru kowi champuan chamling büah reng chenganchepaw amatni ngeche mih paw tapuan büah mih chekhai. ¹⁴ - ¹⁵ En mih dow sangah khowk en akhima en chünah khai bowt mih hing plawm ta hüah diah, amiah kowi chow tüngsang en mih en tuk chakhi mirakowi, en ngeuuüa cha hownkow cha achim asima mih dow lainowmma en tuk bowk mih chekhai. Krista Isu owmmi rakow owm mih rakowi kow lawngra nanala kownkow chanlaira nowngia pe en chekhai,pami en tuak. ¹⁶ Cha laiklow maiow Thurai kawli na khai mih chekhai kowmatia nata owmla müa kownkow ün kowmatia nata thawk asar la mimüa kownkow chowmkrang uowi krang achi ma natatüng tasang müa kownkow lainowmma asung uang mih chekhai. ¹⁷ Naiawng kowikow tawngah kengah khai mih hanow nami chekhai, Thurai maru mih dow kaah atawng mih uang na khai, uan iung mih maten nanowngia changla kownkow tawngah mih uang na reng chekhai.