KRISTA SIPHAI IUNG ¹ Ang chapa Krista sanarah mih napa pe en akürlah, ² Maru akawm mami tukah kowi ang tüngsangra en süntaah bowt. khowk mih en nakut nowngia tüngsang kown bowt mih en owmah khai mih maru kowi tüngah sangah iawlaw diah. ³ Krista siphai kaah sakowmmi powmiawng tawi khowng khamla ang ngare diah. ⁴ Siphai mih dow aia aluchow pa awmrawmla kownkow akeng mih lusa uan hai katpaw chamtalük chamta kak dowi. ⁵ Taowt iowm mipaw ari-row taka maiawng iowm dowi mih hanow awmrawm sung nowngia kadowi tham. ⁶ Iua pra kowikow akawmma changlup miia dow arik iuih mih nalang rikka kown chekhai. ⁷ Ang tekmi sipsip sowngsowng tuakah hanow CHAKRAMANG dow lowr atia towng kowi natuk talamih nape en kown. ⁸ Satangiung ang tek reng mih Isu Krista David chuprek chaprek kowikow maru kowngmi pungma dawng hownkow awr kut plan rü khai bowt laiklow mih tuklaah reng diah. ⁹ Nami satang iung rakowi ngaremiuüa ngare mihdow ang kham khai maru ngakmi powmiawng tiah hai lawngha leng hai tawm ang mih Thurai laiklow tarapche nowngia tawmah mih hing nadowi ¹⁰ Krista Isu kowi uowi mih lawngra mih dow achowngma kraingr hai lawm nanowngia tawikala kownka ruitaah khowk miuüa rakowi maün mih maru mih ang kham ngare mih chekhai. ¹¹ Mami laiklow mih anowmma chekhai, aia kowngra a-i tawi tahum hanow aia singra a-i tawi tahum kown. ¹² A-i tawikham ngare hanow a-i natawi tahum tara chet kown a-i tadataah khai tarap chedow natata a-i kown. ¹³ A-i kaah sakowm dowi chenganchepaw aia mat kaah sakowm reng khai aia laiklow kowi katpaw latta dowi. ¹⁴ Maünmi laiklow patuk pataah diah, Thurai ming hai tekpe hanow laidawng takhün taiüa rengmi pacham towta lah, tamakra uowi dowi chekhai. Süntak miuüa kowi piakta naklak mih chekhai. ¹⁵ Enda Thurai howrah mih krang maru lup chang mih ia kowmatia alup kowi rukrai laah dowi mih lainowm mih dow achima kowi tuk tawng tuk keng mih ia nana lakown hing tuak taah hüah diah. ¹⁶ Lusa maruuüa laiklow kaah atawng akeng dowi mih kowi dow dungkung kleumai tah khai diah nami laiklow dow Thurai kowi peching dowi mih pra chamkung chamiua lareng chekhai mirakowi chekhai. ¹⁷ Mangak powiawng amatni tüngsang mih laiklow mih dow chamtauet khai reng amatni pungma dawng kowi Humenai hai Felet mih atut akia chekhai iüah. ¹⁸ Lainowm kowi dow cham dungkungta iüah khai, awr plan kut rüla mih dow uowi tüang khowk paiüa khai, maru matawng mih chabak owmra mih paw krawita iüah mih chekhai. ¹⁹ Thurai lainowm huai akhi mami kowi tarap chedow hing nowngia chua iüah dowi, CHAKRAMANG dow aia maru kowi aia tuk pami hai CHAKRAMANG ming luk kowi naumiuüa dow nacham powta nngak kown chekhai, pami ruiah khai. ²⁰ Kim aiung mami kowikow pu biah ün mih paw pu hai tai hai kowh tawpah mih nabowk dowi chekhai. sing hai kowh thawpah mih ün hown bawn hai kowh thawpah mih paw na khai, matawngmi chabak langkri rowt matawng mih chabak langkri dowi rowt chow. ²¹ Maün mih uan iung dowi mikowikow ang tek enni hown langta hen langta cham uowi mih dow atawng akeng langiung langkri mih kim ia uüi kaah atawng akeng mih sawkta sauta rüm khowk lup iung maten nanownia tawngah rüm kownkow kamrüt ia uowi reng mih powmiang naung nakown. ²² Awta dowk lowtcha khe dow sak kraira sangür ra ün dungkung kleumai takhai diah saktuak achim asaima kowi CHAKRAMANG lüklau miuüa hai lawm tachi tanawmra ün owmra ün sakraura ün taking tasangra ün kowi krawiah diah. ²³ Maün mih taiuara tamak dowi hai aching uowi dowi mih kowi cham dungkung tahai diah, talük talau hai taüa prungrung khai. ²⁴ CHAKRAMANG chin kür mih dow tapring tangan nanau kowi mih nadowi lowr amaru mih kowi nowia saksing sana mih hai tuk tüng tuk sang mih maru khamsum kahamdaw mami nana kown chekhai rowt kown. ²⁵ Aia mat kowi kingküa miuüa mikowi paw sum kham mahai naming nakhetah kown mih chekhai, lainowm natuktala kownkow Thurai mih amatni saktuak nakling klai tarawng. ²⁶ Setan leng kowikow nata siowk kownmi aia nauah mih aia kowi pachangah reng mih ün kowi dow uanglawt hanow matni saktuak nauang chim ün tarawng.