TAKHANG MIH LAWNGTANG CHOW PAWL KOWH ACHUR LAIKLOW ¹ Thurai hai Krista Isu makowng hai masing maru kowi nachet tara kownmi ia pur kowi aia nakut plan uang iawkla kown mih hai aia pren kowi alow ang pe en mih chekhai. ² Laiklow mih dow akhin iung mih kowi chepaw akhin iung dowi mih chepaw tek ngamlam diah, khamsum mow tüngsang mih luk koiw amtni nowm dowi mira tüngpe tawkpe hanow pringah hanow peah küe diah. ³ Tünsangra kowi iungma mih nau sünta dowi mih hai amtni nauah mih krang chatiah, sünta hai amatni pram kowi kup mih tüngsang miuüa chatiah na krawi chia kuah mih khin nauang ting kown. ⁴ Lainowm kowi pe param dowi kowh iawngpami sangchia lai aw kowi asowr nauowi büah kown. ⁵ En mih dow lowr amih kowi towta khowti hanow iakham pat khamah diah, satangiung tek alup mih changlangamlam hanow en lup chang alup mih chur tadiah. ⁶ Ang midow naap takowkow pami ang nakhai bowt lusa hown kown ang namang kown mih khin mih uangting khai bowt. ⁷ Taprengra iung mih dow ang kichang ta khai bowt, ang iowmra kowidow ang ki iowm takhowk ang owmra mih dow ang towah reng mih chekhai. ⁸ Kawmta dow awngra prangra rowsira luk kruk mih dow naka kown mih chatiah ang pur kowi uowi khowk mih chekhai, nami nih kowi dow nape ang kown ang matia chatiah mipaw na dowi aia nauan tatüng kown chawng miuüa maiow uüa kowi mipaw napeah kown. ⁹ Ang tut-e alenma nauang kown mih haita tuak ah madiah. ¹⁰ Dima dow akawmat kowh lusa ngownra mira kowi Thesawlawnika kua pra kowi champowt ta ang khai bowt, Kreska mipaw Galathe pren kowi kakowi khai tita mih dow dal matia pren kowi kakowi khai; ¹¹ Luk chatiah uowila ang mih dow Marka mih lup chang tiah kowikow tawikhowng tawiku ang mih chekhai, uan haw uanglai la diah. ¹² tuk ikmi Efisi kua kowi ang kowh chin khai bowt tak. ¹³ En nauang mih khin khe dow Taroas kua kowikow karpe tut-e ang kowh kowrma thawng ang tatowla mih uangpaw la ang diha, ang kowh chabowih hailawm chakpik cha ngam padow uang hai pawla ang ngengche dioah. ¹⁴ Kri krai mih Aleksandra mih ang luk kowi kaneuma lup angak chang khai CHAKRAMANG dow aia lup chang mi iawn gdow nasatpe aklai kown. ¹⁵ Aia hown kowi en paw kaneucha pawlape ching diah, a-i laiklow kaneuma kingküa khai. ¹⁶ Awng laiklow angrik tek mih leng khe dow amia mipaw nakhowng ang mih uowi büah dowi, cham powt ta ang bowk khowk. ¹⁷ CHAKRAMANG tarap che dow tawiuowi lah ang khai uang pe ang kür khai Jentail maiow natukah kownkow satang iung midow akümma ang phuang ta khai bowt tak, primangma hownia dow kalawngra khai. ¹⁸ CHAKRAMANG dow alup iung dowi mih maten kownkow nalawng natang ang ngmlam hanow matawng paw thawngtaha ramai dow iawng aia mukuang pren kowi dow nauang pa awr tiang ang kown, chowng chowng saksak mah kraingra mih dow aia tut-e pacham uowi lah.Amen. ACHUR TACUP TAIIARA ¹⁹ Priski hai Akilla hai Awnesiphowr kimchak miuüa kowi ang peah achup aiia khai. ²⁰ Irsta mih dow Korin maro kowi uowi reng tak, Trowfima mih dow aia arau uowi khai mih rakowi Miletow kua kowi ang mang ta khai bowt tak. ²¹ chungrau dowi rawn tak khe nauang ia ung kown mih tuak ngenche diah. ²² Eubul ün pudi ün Lina ün Klaudi ün hai tainau maiow uüa mih pe enni achup aiia büah khai CHAKRAMANG mih dow enni tut-e pacham uowi lah, sanara enni bowk bowk tut-e pacham uowi lah.