RISI IUA TIAMA HOWNIA TAHEN KOWNMI LAWNGUAN HAI TÜNGSANGRA ¹ Israeluüa maru pungma dawng kowi Risi-iua uang uowi khai, nami iawng dow enni pungma dawng kowipaw tüngsangmi aiua mih nauang uowi kown; amatni nowngia piak maru mih kukpa nauang kup hanow, amatni kow CHAKRAMANG kowi paw natadata kown, naiawng hai kowmatia tapitmüa alenma nachowng kown. ² Hanow, amatni uowi krang suiiai kaniaia mami dow maruuüa natawi mang hanow natawi chang kown, amatni rakowi dow lainowm taima auan kowi Thurai kowi natekah naklak kown chekhai. ³ Nowngia kala kownkow alawphama hai amatni daila mih laiklow hown aiawnglowma enni pungma dawng kowi maratra nachang kown, nachenganchepaw amatni lukkowi kowh tara chetmiia dow, khin kradowi hai amatni piak müa dow müi dowi matchang kowi hawt pawmah reng chekhai. ⁴ Tawngplawng kachow panow, kramauuüa alup ngak chang mih khin khe Thurai mih lawtah naklak dowi natarap chedow ngare towkra kowi kuaktaah kown rakowi nachet tara dowi mowr chawng kownkow kuam iukma kowi dow towah khai. ⁵ Hanow, aia dow achük alai khe kowh lusa kowi mipaw raiah nakla dowi, natarapche dow lusa ngak achur mami luk kowi tuikling mangmow peiuk ah khe iawng dow, nami khin khe Noua tachi tanawm mih laiklow phuang miia hai akengmi maru rinitia chah chatai chekhai lawngah mi hai plaimi dow. ⁶ Hanow, Sadawm hai Gawmawra marow pow dinchow pechowngah khai, Thurai kowi peching dowi miuüa kowi towkah ngare khai, tachi dowi miuüa uowi krang kowi dow, amat müa iawng amatni kowi chang pekhai. ⁷ Hanow, Lawt tachi midow maru ngakuüa uowi krang kaneuma sangnga reng miia kowi tarap chedow lawngah tangah khai. ⁸ Tawngplawng kachow panow, nami maru tachi mih dow, amatni pungma dawng kowi tawi uowi reng mih chadiah, amatni lup ngak changmi rakowi khi hai tami kowi dow ni towng kowmatia sak kowi pe taprüaah reng khai. ⁹ CHAKRAMANG dow aia matkowi ringkaw miuüa kowi dow chaingra hai ngare towkra kowi nalawng natangah kownmi krang hai napawpe tara kown mih ni uang ting dowi rawn khe paw maru ngak natowkah ngare kownmi krang aia tuk chekhai. ¹⁰ Amatni kowh sakraira powmiawng sürlawt uowi mih uüa alow-ana uowi mi kowi e-ah miuüa kowi ngam dow angakra napeah kown, maün mih tüngsang miuüa aching nadowi mih athukma miuüa chakhei, rowsira kowi changbawri miuüa mi mukunag kowi kow kramamu kowi tek naklak kown kram dowi. ¹¹ Amatni lak-e kür hai lowra nowngia chang rowt mi kramamuuüa khowm padow CHAKRAMANG pur kowi amatni paw kramamu lawnguan tek khe laingak hai tara chetah dowi. ¹² Nachenganchepaw, maün miuüa tatuara sangching kabüah dowi hai piak kown rakowi sangching uowi dowi hai kaurawng uaram chak sadua powmiawng naün mih amatni tuk dowi hown kramamu kowi paw lainagak tek khai, naiawng rakowi amatni napiak büah kown chekhai. ¹³ Amatni ngak sung midow nakham ngare kown, amatni iung dowi mih lupchang rakowi chekhai, amatni piaw rakowi uowi reng, enni pungma dawng kowi suiia kaniai mami hai asür alawk mami tawi talawk büah chekhai, pamatia pawi changra kowi tangown hai piaw büah reng chekhai. ¹⁴ Amatni mik kowi nachang iang kown atungma kumit hili khai, angak chang mih hing du büah dowi, maru owmra khi khawt dowimi uüa kowi kuanah büah khai, lawpha krang kaneuma tuk khai, amatni piati klami chauuüa chekhai. ¹⁵ Tiama ching midow cham klowita büah khai, tamara tiama mang khai bowt, Bawsawra chapa Balaam tiama kowi tawitaiua mang khai bowt, aia matdow tachi dowi mikowi lang naumi chakhai. ¹⁶ Nachenganchepaw pamatia lup ngak chang mih kowi dow pringah hawiah khai bowt, kawrnga ramchük nowngia prowsang dowi mih dow lusa maru powmiawng uang prowsang khai, Risi thuk mami kowi dow hang tape khai bowt tak. ¹⁷ Maün mi maruuüa mih tui chawt tui kangma hai liku cham hutla uangnim lawmlawm mi-iawng chatai nakhai, iu kraingma iu mira kowi dow amatni uowira khowm pe bowk pe mih chekhai. ¹⁸ Tawngplawng kachow panow, athuk mami laiklow apawngma tek büah khai, amatni lusa prakowi nau krang hai chowm krang uowikrang suiia kaniai ma, naün midow kowh sak-kraira hai puanah büah khai, now lup ngak chang mih maru pungma dawng kowi paw uowi reng mih chekhai. ¹⁹ Athaulangma napeah kownmi amatni tut-e lai khamah khai, nachepaw amatni mipaw akiang iung dowimi nar hing na reng mih chekhai, tawngplawng kachow panow , lowra maru chepaw kowmatia kowi nowngia awnglami dow, nami dow aia nar chakhai. ²⁰ Tawngplawng kachow panow, a-i CHAKRAMANG hai uang lawng a-i miia Isu Krista chanlaima tuk lami rakowi kow lusa tachi dowi mih uan kowi powtta miuüa dow angak kowi tawi talük takak büah khai, amatni plan tim khai bowt kowh chalow hanow, auown khe kowh amatni chowmkrang uowikrang lak-e akung amowichow midow nalang nga rowt kown chekhai. ²¹ Tawngplawng kachow panow, amatni tut-e kow alow pek achim saimami tukta khowk miuüa dungkung kleumai takhai iawk mi dow tachi tanawm lami tiama mih uangtuk büah dowi ngowng panü dow amatni uüi nalangiung rowt diah. ²² Amatni vüi mami tantaw lainowm uang tüng mih chekhai, “kui dow matia hükmi plankut chaah iawk khai” hanow “pak pawplawng mih dow plan kut pawplawng iawk kown” paün mih.