OWMRA AKHI KHAWTMA UOWI KOWN MIH LAWNGUAN
¹ Isu Krista nar hai chintakmi Simawn Peter dow, uanglawng a-i miia Isu Krista hai a-i Thurai tut-e tachi tanawm ra hown owmra asung uowi mami a-i ka iawng tawika miuüa kowi ang cha hown krawi ruiah mih chekhai. ² Thurai hai a-i CHAKRAMANG Isu lowra kowi atukmami sanara hai taking tasangra enni luk kowi pacham prung lah.
KRISTIAN MIUÜA HAWAH MIH HAI RUIAH MIH
³ Nahanow, Thurai aiamat rowsira hai prengia maiow natawikala kownkow uang haw uanglai a-i mih chekhai, Thurai aia lowra nowngia changla mira dow, a-i kowi singra uangpe a-i khai bowt tak. ⁴ Hanow, rowsira hai iungra akrikraingma mih aia khamah mih uang pe a-i khai bowt, hanow aia rakowi enni mih mami lusa angak ransu prüara uang nowngia piak mih hownia dow enni lawt khai bowt, Thruai kraingra mi dow enni tawi nowngia ka khai bowt mih chekhai. ⁵ Enni kow owmra ia mowr towk kür büah hanow, saktuak aiung mami hownia dow chanlaiah büah diah, ⁶ Enni kaah mi chanlaira dow nowngia khamsumra kowi tawngah rowt büah diah, hanow khamsumra mi dow nowngia town sakra kowi tawngah büah diah, now nowngia town sakra dow tachira na ka kown. ⁷ Enni tachira dow tainau saksing sanara hai tainauüa saksing sanara howia dow sakraura maratra kowi changah büah diah. ⁸ Naünmi enni tut-e uang awr iuk sown iawlaw hanow, a-i CHAKRAMANG Isu Krista chanlaira mi dow aklumma tut-e na kaah atawng akeng kown chekhai. ⁹ Naiawng ün maiow uowi dowi miuüa dow alakma kowi nowngia khi dowi mi mikdu miuüa chekhai, aia rik chang ta mi angak sia sau tape khowk pami tamata miuüa chekhai. ¹⁰ Hanow, tawinauuüa low, haw enni mi hai rui enni mih dow nowngia tüngla kownkow aklangiungma iowngah büah diah; now naiawng hown nowngia iowngmi dow matawng nam khe paw piak hai nowngia tim dowi tham. ¹¹ Tawngplawng kachow panow, a-i CHAKRAMANG lawngmiia Isu Krista chowngchowng saksakma pren kowi nanowngia kupla la mi alow nape enni kown chekhai.
KRISTA KRAINGRA NAUANG TING KOWNMI LAWNGUAN
¹² Naiawng mirakowi lainowmma enni maün mih maiow tukah mih kowi akhima hai uowi khowk chenganchepaw maün mih aplan aplan petuk peta enni kown mih atungma kamrütmi ang nau chekhai. ¹³ Hanow, mami tangbung kowi ang uowi mih mowr da, aplan aplan petuk peta enni hanow nakrüng enni kownmi ang nau chekhai. ¹⁴ Tawngplawng kachow panow, a-i CHAKRAMANG Isu Krista tekla ang miiawng dow mami ang kowh tangbung mih alenma ang na tatow ta bowt kown chekhai. ¹⁵ Hanow, ang nalawt kownmi kung kowi maün mih atungma enni na nowngia tuakla reng kownmi nathawp enni kown, naiwng rakowi ia mowr natowk kür kown mih chekhai. ¹⁶ Tawngplawng kachow panow, a-i CHAKRAMANG Isu Krista lowra nowngia changla mih hai lawm nauang kut plan uang kownmi lawnguan ang tek enni mih khin khe sangchia laiawh thawnah-kownah naklak kow ang tek enni mih nadowi chekhai, aia kraingra midow mik ngengche hai kowh khi miuüa ang ing nami chekhai. ¹⁷ CHAKRAMANG dow, Apa Thurai hownia kow rowsira hai kraingra aia kami khin khe langkraing nowmnowm mih aklow uangiu lawt khai, “mami ang Chapa, ang sakrauah nowm nowm mih nachekhai, aia lukkowi nowm nowm ang awmrawm chekhai” pah khai. ¹⁸ Hanow, aklow mukuang hownia kow uangiu bowk kowm khe dow, anging mih paw hung achim saima mi kowi aia tut-e tawi uowi mih chekhai. ¹⁹ Hanow, Risiuüa laiklow rik phuang riktek tarüm khowk mih uang ting mi chekhai, anging mihpaw akhima anging tut-e hing uowi ngamlam chekhai, enni mih paw rauleng karek uang lawt dowi mowr mih dow rau-e uar thowi dowi rawn aiuma mi ara kowikow maibu nowi powmiawng enni saktuak kowi nachang anowi hanow naiung kown. ²⁰ Thurai laiklow kowi rik phuang tami laiklow mi dow, kowmatia tuakah mih chatai iawng naphuang natekah kown nadowi pami auown khe riktuk riktaah rüm büah diah. ²¹ Tawngplawng kachow panow, rik phuang tami matawng khepaw lusa maru nauah mikrang hownia kowh lawtah mih mapaw hingna dowi chekhai, tawkche lusa maruuüa mih lümla sai tekpe hai Thurai hownia kowh ka-ah mi tekreng rowt mih chekhai.