CHAKRAMANG NAUANG PLANLA IAWK KOWNMI LAIKHAM
¹ Sakrau amiuüa low, prekat chasak mih ang uang sak enni mih nakhai bowt tak, enni tuk khowk mi planpe tuk peta enni iawk kown kow enni mat kowi saktuak achim saima mi kowi nathowr aula enni kown kow ang krawi sak mih chekhai. ² Laiuan kowi Risi achimsaima miuüa laiklow hai CHAKRAMANG lawngmiia alow pek enni kowh chintak miuüa achük alai khe kow tek enni mih tuk laah büah reng diah. ³ Akung mowichow khin khe dow, tuk laah diah, khare nichak miuüa kowmtaia sak-kraira powmiawng uowi miuüa nauang lawt kown pami rik tukta rüm büah diah. ⁴ Hanow, aia na uang kut plan uang iawk kown mih laikham midow matawngiawng chow? Nami khin hownia “uang prek uang che a-i miuüa midow kowng bowk khowk, uownthawpah mih hownia lowra miiawng chang reng iawng uowi reng pabow” napa büah kown. ⁵ Nami maruuüa nauiawng hai mata mi mukuang hai krawng hownia tui hown thawpah midow, Thurai aia laiklow hown thawpah khai. ⁶ Hanow, nami laiklow hownia dow, nami khin khe lusa mi dow tuikling mangmow hown lim hai piak khai. ⁷ Nahanow, nami laiklow iawng dow, akawmat khin kowi mukung hai lusa mi maih hown nakam akown mi vüi kamrütia towah khai, Thurai kowi peching dowi miuüa tara chetra kowi napiak kown mih nih mowr kamrütia ma hown towah khai. ⁸ Sakrauah miuüa low, enni mami lailowk hang kow ma ta diah, CHAKRAMANG tut-e dow pani mih athawng ning akatsang iawng chekhai, athawng ning mipaw pa nih powmiawng chekhai. ⁹ CHAKRAMANG aia laikham uang tachi kownmi lawnguan kra hu dowi tham, enni pungma dawng kowi nami iawng tuak dowi chepaw aia dow chawng enni reng chekhai, maru maiow mih napiak kown mih dow aia nau dowi chekhai, nahanow maru maiow mih angak tarip kown mi dow aia nauah rowt mih chekahi. ¹⁰ Nachenganchepaw CHAKRAMANG nih mi dow kuk mih powmiawng nauang ting ngenche kown, nakhe dow aklow tünma hown mukuang mih napik kown, now mukuang kowi kow lamah, sat hai karek ün nakam hanow na piak bowk kown; lusa hai alak kowi kow uan uowi mih maiow hailawm maih kowi nakam hanow natama bowk kown . ¹¹ Nami mih khin khe bowk bowk napiak kown, achimsai mami chowmkrang uowikrang hai chünlai mih uüa matawngiawng chow nauowi kown? ¹² Thurai tara chetra nauang ting kown mih chawng miuüa dow sakowmra khawtma hown uowi kown mi enni lahawm khai, nami nih kowi dow mukuang na kam hanow lama, sat hai karek ün paw nachawr bowk kown chekhai. ¹³ Nachenganchepaw, aia laikham miiawng dow chawng a-i reng mih Mukuang hai Lusa sar kowi dow maru tachi tanawm mami nauowi kown chekhai. ¹⁴ Hanow, sakrauah miuüa low, nami ni enni chawng mih khin khe kaneuma pela ching hai achi-anawmma Thurai mik mük kowi natüng la kown kow uowiah büah diah. ¹⁵ Hanow, a-i na ka la lawngra kown kow CHAKRAMANG mi dow hawt chawng a-i reng chekhai; sakrauah mih tainau Pawl tut-e aia chanlaira peah miiawng dow enni tut-e paw aia uang ruaiah mih chekhai. ¹⁶ Hanow, aia chasak maiow kowi maün mi lawnguan kowi dow ruiah reng khai; ma ün mi lawnguan kowi tuk dowi miuüa tarap dow akeng chabowih laiklow powmiawng hai tuakah büah khai, na tukta lakown kaneuma krat khai rakowi naiawng ün lai uan tuk dowi hai tamara tiama kowi piak büah bowk khai. ¹⁷ Nahanow sakrauah miuüalow, enni mih naiawngün lawnguan auown hownia peching büah diah, naiawng na dowi hanow nü-klowk dowi miuüa nacham puanla enni kown, en hai enni kow owmra hownia nacham tala ün tarawng. ¹⁸ Nachenganchepaw, a-i kow lawng miia Isu Krista saksing sanara hai chanlaira khai dow iuk sownah büah diah. Akawmat hownia chowngchwong saksak ma mowr pat aia rowsira dow pacham uowi reng lah. Amen.