CHINTAKMIH PUAL ¹ Athaulangma angnadowipa bow? Chintakmi ang nadowi pabow? A-i CHAKRAMANG Isu kowi ang khi dowi pabow? Enni matia hawmuüa mih dow ang lupchang rak enni nadowi pabow? ² Akeng mih maruuüa tut-e ang chintakmi nadowi chenganchepaw enni vüi kowi dow chintakmi ang na khai, CHAKRAMANG kowikow ang chingtakmi pami amatmüa dow enni matia chatai chekhai. ³ Chaing ang miuüa kowi dow ang na klang ah kown mih dow mami iawng chatai, ⁴ nachow nakham kown mih alow ang kow uowi dowi pabow? ⁵ Akeng mih chintak miuüa hai CHAKRAMANG tainauuüa hai kipha iawng dow masi owm mih hown cham krawi kowi iawng dow a-i paw cham kowila kown mih tawng chow alow uowi dowi pabow? ⁶ Naiawng mih nadowi hanow, lup mih nala dowi kownkow ang hai Barnaba ang ching alow nowngia ka dowi pabow? ⁷ Siphai amiaiawng mih chow kow matia tathum kow chamtasen mih uowi kakat bow? Amiaiawng mih chow Grep iuih mang changah kow aiuih chaah dowi mih uowi ne bow? Naiawng mih nadowi hanow amiaiawng mih chow ruapur thingah kow kham pe iawn tui dowi mih uowi ne bow? ⁸ Naün mih laiklow dow lusa maru laiklow powmiawng chatai ang tek mih bow? Nami klen kowi ari-arow pow maün mih laiklow tek dowi bow? ⁹ Mosi ari-arow chabowih kowi dow, “chia mih thuacha thüm khe hang kow mempe nawrbawng lah,” pah ruaiah mih chekhai rakowi Thurai mih chia vüi chatai bow tuak pe? ¹⁰ A-i matia vüi chatai nadowi bow atungma aia tek mih? Na chow; a-i matia vüi chatai kowikow ruiah büah mih chekhai; laithawn mih chia mih sakowm tatma hai thawn mih chekhai, chathau miia paw aia bak nakala kownkow sakowm tatma hai thua mih chekhai. ¹¹ Anging mih lümla pra kowikow aliu ün sawt khai bowt hanow, kowh pra kowikow uan iungah khai e dow naün mih amaratma na own kown bow? ¹² Akeng mih maru khowm dow enni lukkowi alow ka büah chekhai hanow anging ngam padow alow naka ngamlam kown mih nadowi tham pabow? Nachenganchepaw nami alow mih dow anging chang dowi; Krista satangiung mih tiama anging na pitta dowi kownkow lowra sia mih kowi anging khamsuam rowtchowh chekhai. ¹³ Achim asaima mih lup chang büah mih dow achim asaima mih rakowi cha kham büah reng hanow rowsi kantawpra kowikow lup chang miuüa dow rowsi kantawpra hai akak uih ka büah reng pami enni tuk dowi bow? ¹⁴ Naiawng palawng dow CHAKRAMANG satangiung na phuangla kown mih kowi alow peah khowk miuüa kowi dow satangiung hownia chak kham mih napeah kown. ¹⁵ Nachenganchepaw ang mih dow matawng mih paw hingtawng hingkengah dowi chekhai, ang luk kowikow nami powmiawng enni na changla kownkow ang rui enni mih chatai na dowi, amiaiawng mih paw ang sakowm miiawng mih matawngpaw nadowi mih iawng kowi thawpah mih lak-e dow ia kowng khai panü dow ang vüi na lang iung khai rowt diah. ¹⁶ Satangiung ang phuang khai chenganchepaw nachangla bawri kown mih matawng paw hing uowi dowi chekhai, satangiung na phuangla kown mih dow ang kow alow chatai, nami dow ang nachang ngengche kown tkala, piatira ang tut-e pacham uowi lah, satangiung mih ang tek dowi now. ¹⁷ Ang matia low hownche mamih ang chang now awnmrawm sung ang vüi na uowi kown; nachenganchepaw kow matia alow hai hing nadowi hanow aluchow mih lupchang mih kowikow owmra ang tut-e peta khowk mih kowi dow, ¹⁸ Awmrawm suang matawng naown chow? Satangiung ang phuang mih khin khowk khe satang iung mih aiawngma hai ang phuang, satangiung na phuangla kown mih alow ang ka khowk mih dow na tachila kownkow. ¹⁹ Amiaiawng mih nar ang nadowi chenganchepaw, maru langhu rowt mih ang na nowngia pawla kownkow maru maiow nar kowi ang matia kowi ang tathawpah khai bowt. ²⁰ Hanow Judauüa ang na nowngia pawla kownkow Judauüa tut-e Juda maru powmiawng ang uowi reng; ari arow kowikow uowi miuüa ang na nowngia pawla kownkow ari-arow kowi uowi miuüa tut-e ari-arow kowi uowi mih powmiawng ang uowi reng, ari-arow kowi dow uowi dowi iawng. ²¹ Ari-arow uowi dowi miuüa ang na nowngia pawla kownkow ari-arow uowi dowi mih tut-e ari-arow uowi dowi mih powmiawng ang uowi reng; Thurai ri-row chün dowi powmiawng krista ri-row chün mih powm iawng. ²² Kür uowi dowi miuüa kowi na nowngia pawla kownkow kür uowi dowi mih powmiawng ang uowi reng; lawngra kowi na nowngia pawla kownkow maru maiow tut-e akümma ang tawi uowi pe reng mih chekhai. ²³ Satangiung mih rakowi lowra akümma mih ang chang reng; amatni hown nowngia taiua uowila reng kownkow. ²⁴ Tapreng iowm taowt miuüa hawmuüa mih dow bowk bowk iowm büah reng, nami kowi-e awmrawm sung lowkia chatai kareng pami enni tuk dowi bow? Enni nowngia kala kownkow naiawng palawng dow enni iowm büah diah. ²⁵ Now, taprengra kowi towk kür ngamlam mih dow lowra sia kowi achima miiawng uowi büah reng chekhai, amatni dow mang lukkruk piakla dowi mih na nowngia kala kownkow. ²⁶ Nahanow towpe kheti mira pra ang hing iowm ta hüa chekhai, asung kowi chataih na dowi ang chang kür ang matia la la ang tachang kür rowt reng chekhai. ²⁷ Naiawng palawng dow ang matia buk kowh kowi nar powmiawng dow ang towah khai, maru tut-e ang cham kitek (phuang) kung kowi tataingma nadowi powmiawng ün naown tarawng.