ANGAK MAMI HOWNIA CHAMLANG TAHEN TAKUAK KOWN MIH ¹ Tainauuüa low, maün mih enni natuk kown mih lainowmma ang nau enni chekhai, a-i pi pu amatni bowk bowk mih uang nim krüa hai sata rik iawng dow uang mang büah khai; ² Hanow amatni bowk bowk Mosi tut-e uang nim hai sata kowi chang baptis khai bowt. ³ Amatni bowk bowk lümla hawm taiua cha büah bowk chekhai; ⁴ Nahanow amatni bowk bowk lümla tui paw taiua kham büah khai, amatni kung tawi miuüa lümla pra singku huamang kowi mih tui kham büah bowk chekhai rakowi; nami singku huamang mih dow Krista chekhai. ⁵ Nachenganchepaw amatni pungma dawng kowikow maru langkawm rowt miuüa dow Thurai sak ih dowi bowt chekhai; naiawng rakowi süngrüp süngkangma prakowi cham kowng büah khai bowt. ⁶ Now, naün mih dow a-i vüi amatmüa chekhai, lupngak mih paw sakkrai büah mih iawng a-i na sakkrai la dowi kownkow. ⁷ Amatni pungma dawng kowi matawng mih chabak dow arup kowi nachup la kownkow kamrüt büah khai, nami powmiawng dow arup kowi hang chup büah diah, arui uowi khowk mih powm iawng dow, “Maru mih nacha nakham kownkow chowm büah khai bowt, nami kung kowi dow awr planrü now plai büah khai”. ⁸ Amatni pungma dawng kowi matawng mih chabak dow iua malauüa khai, pani sang kowi pirmilaisum thawngia maru iun kowng büah khai bowt, nami powmiawng dow a-i hang kachang diah sik. ⁹ Amatni pungma dawng kowi matawng mih chabak dow CHAKRAMANG kowi chaingah büah khai, now amatni kowi dow rua chawtah hanow kowng büah khai bowt; nami powmiawng dow CHAKRAMANG kowi a-i chaing kown nadowi. ¹⁰ Amatni pungma dawng kowi matawng mih chabak dow prawngah rengah büah khai, hanow amatni prawng reng iawng dow piak büah khai, nami powm iawng dow hang prawng renah büah diah. ¹¹ Now, naün mih amatmüa naownla kownkow amatni luk kowi uang ting mih dow nakhai miiawng; a-i kow akhin chur nauang ting laün kown mih kowi tapring tahai la kownkow paw ruiah büah khai. ¹² Nawiawng mih rakowi iowng pah kamrüt miia dow pacham pe ching lah, naiawng nadowi hanow natim ün tarawng. ¹³ Maru nowng khamah krowng chow dowi mih klen kowi enni tut-e achaingra nauang ting kown nadowi tham; Thurai mih dow kaah pasakowm mih chaekhai, aia mih dow enni tut-e enni kürra luk kowi nowng khamah dowi patmi chaingra uang pe enni dowi tham, chainra uangtowm iawng dow chaingra hownia lawtra paw aia mih dow uang thawpla enni reng mih chekhai. ¹⁴ Naiawng rakowi aw sakrauah mih tainauuüa low, arup aren chup mih towta büah diah. ¹⁵ Maru chanlai miuüa tut-e tek powmiawng ang tek enni mih chekhai; ang tek mih laiklow pawpe atuak büah diah. ¹⁶ Prasi bia kowi ang pe enni prasi reng chaw Krista vi vüi tahum mira nadowi pabow? Ang sek kawm reng mih Krista nga tahumla mih nadowi pabow? ¹⁷ A-i bowk bowk mih dow akatsang, abuk anga chak mih kawmpa a-i nami chekhai, pabuk panga chak; a-i bowk bowk mih tarapchedow pabuk chah mih kawmpa chatai. ¹⁸ Kowh pra kowikow Israeluüa kowi sammü madiah; rowsi kantawmuüa chaknga cha miuüa dow rowsi kantawpra mih dow tahumah büah dowi pabow? ¹⁹ Now ang tek enni khai bow? Arup aren tut-e kow uan ap mih dow langkri pami hai arup aren mih paw anowmmara ang pe enni mih chekhai bow? ²⁰ Jentailuüa natchang mih ra dow Thurai tut-e na dowi, süngnam tut-e chang nat büah reng pami ang tek rowt chekhai, enni mih dow süngnam hawm hai natahum dowi kownkow ang nau enni mih chekhai. ²¹ CHAKRAMANG bia hai süngnam bia enni nowngia tahum dowi tham; CHAKRAMANG salawnma kowi hai süngnam salawnma katsang enni nowngia hum kown nadowi chekhai. ²² Naiawng mih nadowi hanow CHAKRAMANG kowi a-i pe khereah mih chekhai bow? Aiamat lak-e a-i langkür khai bow? OWM MIUÜA KOW THAULANGRA ²³ Alup lowra nachang kown mih iung chang khai. Nachenganchepaw alup lowra nachang kown mih mapaw hing iung dowi. Alup lowra nachang kown mih iung chang, nachenganchepaw alup lowra nachang kown mih maru kowi aiung thawp dowi. ²⁴ Lowra maru kowmatia iung müa cham towsak dowi kowi akeng mih iung müa kowi powcham towsak rowt lah. ²⁵ Nak nak mih uan chi kowi sumah reng, pamatia pawla pe ching dowi kowi pacham cha lah. ²⁶ Matawng palawng kachow panow, “lusa kowikow uowi mih uan matiow dow CHAKRAMANG kow chatai.” Chimsai mami chabowih laiklow kowikow iawng chekhai. ²⁷ Owmdowi miuüa pungma dawng kowi amiaiawng mih chünchü chia enni khai kow, na kowi kown nua khai hanow aia uang hai ang tuk müa hai matawng paw lüntaah dowi matchang iawng then enni mih sarui chaah büah diah. ²⁸ Natarapchedow amiaiawng mih chünchü, “mami dow natchang ngar chekhai,” padow tek enni khai hanow patuk pata enni mih chekhai rakowi hangka chaah büah diah. ²⁹ Aiung angak ang tek mih dow en matia vüi chatai na dowi, akeng mih maru vüi chatai, aia tuk dowi matchang ang kow thaulangra napiak ta ang tarawng. ³⁰ Awmrawm lai tek hai ang cha khai e dow, amiaiawng mih rakowi chow ang tek awmrawm lai, nami rakowi prawngren ra hai tahumra matawng chow ang na tawi ka kown. ³¹ Nahanow enni cha chepaw, enni kham chepaw, enni cha mih sarui kowi paw Thurai krainmüa kowi phai changah büah diah. ³² Judauüa hai Grik hai Thurai langhawah miuüa kowi tarapchedow matawngiawng mih paw hangah dowi, ³³ Ang mih tarapchedow bowk bowk iung müa kowi ang tuakah reng, pamatia iung kown ang nau dowi, nachenganchepaw maru naiung kown mih ang nauah khai, amatni na nowngia ka lawngra kownkow.