THURAI KOWI AWMRAWM LAI TEK ¹ Krista kowi ang tüngsangmiia ang na khai rakowi enni paw maru kowi tüngsang mih na büah diah. ² Now,lowra kowi enni tukla ang reng mih hai sangmak laimak ang tekla enni powm powm sak kowi enni kumah matah khai rakowi ang kiow enni khai. ³ Natarapche dow, bowk bowk kachakuüa lu dow Krista now masiuüa lu dow kachakuüa Krista lu Thurai chekhai pami enni natuk kown mih ang nau chekhai. ⁴ Kachakuüa mih kruklu kow chup Thurai mih chepaw tek laiklow mih pacham nala, nami dow pamatia lukowi peah rukrai mih chekhai. ⁵ Natarapche dow, masiuüa mih phum lu dowi kow chup Thurai mih hai tek laiklow mih dow aiamat lu kowi peah rukrai mih chakhai; keptow sam aringchow mih hai akatsang mih na chekhai. ⁶ Masiuüa che mum lu dowi hanow, pacham kepta sam lah; nachenganchepaw nakepta sam mih hai aringchow khai ta sam mih uowi pa rukrai chekhai rakowi pacham mu lu lah, ⁷ Kachakuüa mih dow Thurai hai tatu mih hai kraingra na khai mih rakowi lukruk mih na kruk kown nadowi chekhai, masiuüa tarapchedow kachakuüa kraingmüa chekhai. ⁸ Kachakuüa tarapche dow masiuüa hownia nadowi chekhai, masiuüa tarapchedow kachakuüa hown kow lawt mih chekhai rakowi. ⁹ Kachakuüa mih masiuüa vüi thawpah mih paw hing nadowi chekhai; masiuüa tarapchedow kachakuüa vüi kowi thawpah mih chekhai. ¹⁰ Nami rakowi chekhai kramamuuüa kowi rakowi masiuüa mih kachakuüa alow kowi uowi mih amatra kowi na uowi kown chekhai. ¹¹ Nachenganchepaw CHAKRAMANG kowi dow masiuüa mih kachakuüa hai dowi hanow nowngia uowi dowi chekhai, kachakuüa mih paw masiuüa hai dowi hanow hing nowngia uowi dowi. ¹² Masiuüa mih kachakuüa hownia kow lawtmi na chekhai iawng dow, kachakuüa mih paw masiuüa hownia kow uang phuaru mih na khai; natarapche dow lowra mih Thurai hownia kow lawt bowk mih chekhai. ¹³ Enni matia tatuak büah diah, masiuüa mumlu dowi matchang kow Thurai tut-e chup Thurai mih lahawm khai bow? ¹⁴ Kachakuüa mih sam dawngma uowi khai hanow aia vüi uowiah parukrai chekhai pa mih enni saktuak lak kowi mih paw enni ta tuk dowi bow? ¹⁵ Natarapche dow masiuüa mih adawngma towsam khai-e dow nami dow aia kraingmüa chekhai, aia kow sam mih dow ta mumla müa kowi peah mih chekhai. ¹⁶ Lowra iawng pacham nalah, naiua kown mih uowi khai ne chepaw a-i pungma dawng kowi dow naiawng mih ari-arow anging kow uowi dowi, Thurai maru hawm kowi paw uowi dowi. CHAKRAMANG IAK HAWM ¹⁷ Natarapchedow nami laiklow ang tek enni mih kowi ang nowngia kiow enni dowi, enni takua talawm mih tarapchedow aiung müa nadowi hai angak müa chekhai rakowi. ¹⁸ Auown kowi ang ta mih tarapchedow, enni mih Thurai maru hown takua talawm khowk khe enni tut-e tapring tpraira uowi, nami ang owm khai dit chow chekhai. ¹⁹ Enni pungma dawngkowi aching nawm mami na nowngia tuk lah, kownkow enni pungma dawng kowi nadowi mih pra kowi owm mih paw na uowi reng kown chekhai. ²⁰ Nahanow enni langhawmi takua talawm khowk khe kow tuiua cha kham mih dow CHAKRAMANG iak hawm enni cha mih nadowi chekhai, ²¹ lawngtowng büarüa iakhawm enni rikcha ta reng chekhai rakowi; hanow matawng mih chabak dow hawm sakkrai, matawng mih chabak dowh ahuma chaah khai. Nahanow akengmi mru ngamdow pua khai. ²² Nacha nakham kown mih enni kow kim uowi dowi bow? Naiawng nadowi hanow, Thurai maru hawmuüa kowi enni e-ah mih hai peah rukrai mih chekhai bow? Matawng chow ang na tek enni kown chow? Ang na kiow enni kown pabow? Mami lawng uan kowi ang nowngia kiow enni dowi. ²³ Ang na kut plantek enni kown mih dow Thurai hownia kow ang kaah mih chatai, CHAKRAMANG Isu kowi dow khümah mih iak-e kawm pawah hanow, ²⁴ Awmrawm lai kitek kung kowi sekah khai, “Mami dow ang nga, enni vüi, enni natuk la ang reng kownkow chang reng büah diah,” aia pakhai, ²⁵ Naiawng dow iak hawm kicha büah kung kowi biah paw dowkah khai hanow tek mih, “mami bia dow ang vi hai sangbowk laitawm sar; natuk lah ang reng kownkow chang reng büah diah,” aia pakhai. ²⁶ Mamih kawmpa enni cha towng bia hai enni kham towng CHAKRAMANG aia uang dowi mowr dow aia kowng mih satang phuangah büah reng diah. ²⁷ Amiaiawng mih chow taka dowi kow CHAKRAMANG iak hawm hai biah kowi tawi kham mih sarui kowi dow CHAKRAMANG buknga hai vi lukkowi sumra dow naka kown. ²⁸ Nahanow maru kowmatia pacham tachaing lah, naiawng dow kawmpa hai bia paw pacham tawi cha kham lah. ²⁹ Amiaiawng mih chow cha hai kham mih dow pamatia kowh kowi hing tatuk matah dowi mih chekhai, nami dow pamatia tarachetra kowi cha kham mih chatai. ³⁰ Naiawng mih rakowi chatai maru kawmuüa kür uowi dowi hai arau abau hai kowng büah mih. ³¹ A-i che pamatia kowi tatuk mat khai-e dow, a-i mih tara chetra pur kowi uowi takla kown nadowi tham diah. ³² Nachenganchepaw chetpe a-i tara khai kow a-i uowi chepaw, lusa hai lawm kowh na kuakah sum kownkow a-i natawi uowi kownkow CHAKRAMANG pring hawi hai a-i uowi reng chekhai. ³³ Naiawngra kowi ang tainauuüa low, Nacha nakham kownkow enni takua tlawm khowk khe, tachawng taawng ah büah diah. ³⁴ Amiaiawng mih chowh hawm sakkrai khai mih dow kim kowi pacham cha lah; enni takua talawm mih dow tarachetra kowi nadowi chekhai. Hanow akeng mih lawnguan kowi ang uang mih khin khowk khe ang na tek enni kown tai.