LÜMLASAI UANIAWNG PEK ¹ Now, tainauuüa low, Lümlasai uan iawng pek lawnguan kowi enni natawi tuk dowi kown mih ang hing nau dowi chekhai. ² Jentai maruuüa enni na reng tak khowk khe matawngiawng mih prachow pawla enni nami pra chatai enni tawi mang reng; arup aren aklow akui uowi dowi mih prakowi chatai enni cham mang reng. ³ Naiawng rakowi ang patuk pata enni kown nau mih dow, Thurai lümla tek laiklow mih, amiaiawng mih paw tek dowi tham “Isu dow kapiati mih chekhai,” now, Lümlasai chatai dowi now “Isu dow CHAKRAMANG” pami lai klow amiaiawng mih paw nowngia tek dowi. ⁴ Uaniawng pek tarapche dow achapkawm, nachenganchepaw Lümlasai tarapche dow lowk chatai. ⁵ Aia kow lup tarapchedow achapkawm uowi, nachenganchepaw CHAKRAMANG tarapchedow lowkia chatai. ⁶ Hanow alup ala krang dow achapkawm uowi, nachenganchepaw Thurai dow lowkia chatai, maru maiow kowi lowra akümma chang mih ia dow. ⁷ Nachenganchepaw bowk bowk maru iung müa kowi Lümlasai uaniawng pek peah khai. ⁸ Maru lowkia tut-e chanlaira laiklow na tek kown mih lümla peah, lowkia mih tut-e namih lümla hown laiklow tukmüa peah, ⁹ Now akeng mih maru tut-e Lümla kowi owmra peah, akeng mih kowi dow Lümla akatsang kowi dow na nowngia iung lah kown mih uaniawng pek peah chekhai; ¹⁰ Akeng mih tut-e awdara lup nowngia changla kown mih, akeng mih kowi dow purpra kowikow laiklow nowngia tekla kown mih, akeng mih kowi dow Lümla kowi nowngia tukmat lah kown mih kürra, akeng mih kowi dow laiklow nowngia tekla kown mih now akeng mih kowi dow alang alang mami laiklow nowngia tekla kown mih Lümla dow peah reng chekhai. ¹¹ Nachenganchepaw naün mih maiow dow, Lümla akatsang iawng kowi dow lawngtowng büarüa tut-e aia nauah mih krang iawng kowi dow ret pe büah bowk hai aia chang reng. ¹² Kowh mih pabukma chekhai, aprek mih tarapche dow akawm ma uowi chenganchepaw buk kowh dow lowk chatai, Krista mih dow naiawng mih chekhai. ¹³ A-i Jantaluüa chepaw Grikuüa chepaw, nar chepaw nar nadowi mih chepaw, pabuk panga chak sang na nowngia na lah kownkow lümlasai hai chang baptis mih hai a-i bowk bowk mih Lümla hown kow kham mih chekhai. ¹⁴ Kowh mih aprek lowk cha na dowi, akawmma chekhai. ¹⁵ Khawk mih, ang dow rut nadowi pakhai-e aia mih dow buk kowh kowikow aprek nadowi tham bow, nadowi chekhai. ¹⁶ Param kui mih, ang dow mik nadowi pakhai e dow aia mih dow buk kowh kowikow aprek nadowi tham bow, nadowi chekhai. ¹⁷ Pabuk pakowh mik chekhai e dow param mih dow matawng re-e chow nauowi kown? Pabuk pakowh param chekhai e dow nakawng mih dow matawng re-e chow nauowi kown? ¹⁸ Nachenganchepaw Thurai mih aprek mataiow mih dow buk kowh kowi aia nauah mih re-e towah khai. ¹⁹ Nahanow naün mih maiow mih dow aprek lowkcha mih na khai e dow buk kowh mih matawng mih re-e chow natowah kown? ²⁰ Aprek mih akawmma chenganchepaw buk kowh mih tarapchedow lowk chatai. ²¹ Now, mik mih dow rut kowi matawng paw ang changla en dowi pah nowngia tek dowi; lu mih paw khawk kowi matawng paw ang changla en dowi pa nowngia tek dowi; ²² Nachow, nami lak-e aprek matiiow tut-e kowh mih dow tahum büah chekhai, nami dow lang pankri mih chekhai rakowi. ²³ Nahanow kowh kowikow aprek kaah rowsi dowi mih kowi a-i khowmah bowkah reng mih, naün miuüa ngengche kowi dow akraingma langrowsiah rowt reng; a-i kowh aprek klang ngakma miuüa kowi lahawm müa langklangiung rowt mih ka büah reng. ²⁴ A-i kowh aprek lang klangiung mih kowi tarapche dow ahuma atawng hau dowi, kowh kowi mih taprai taah mira maten uowi dowi chekhai, taprek tauowi büah mih atekma mih iawng natawng nakheng bowk büah rowt la kownkow. ²⁵ Thurai mih aklangiung uowi dowi aprek kowi dow lang rowsiah rowt hai, kowh mih klangiung mah khowmah bowkah mih chekhai. ²⁶ Nahanow aprek lowk mih kham arau hanow aprek maten tawi kham pe arau khai; aprek lowk mih rowsi kowi uowi hanow aprek miow mih tawi awmrawm pe büah reng. ²⁷ Krista buk kowh enni na khai, enni lowk kow lowk enni aprek mih paw uang na khai. ²⁸ Now, Thurai mih aia langhawah mih pungma dawng kowi, lowk kowi Chintakmi, pre kowi purpra kowikow nowngia tek lai mih, sum kowi tüngsang mih kowi towah khai; nami kung kowi awdara lup nowngia changla mih ün, aiung ra hai uaniawng pek ün, nowngku nowng khowng la mih ün, tara chetmi kowi ün hai achapkawm laiklow nowngia tek lami ün peah khai. ²⁹ Amatni chintakmi kowi na büah bowk bow? Pur kowikow nowngia tekla laiklow mih bowk bow? Tüngsang mih na büah bowk bow? Awdara lup nowngia chang büah bowk bow? ³⁰ Bowk bowk mih aiungra hai uaniawng ka büah bowk bow? Bowk bowk mih achap kawm lai ka bowk bow? Bowk bowk mih nowngia phuang bowk bow? ³¹ Uanpek langkraing mih kowi dow lang sakkraiah rowtchow büah diah; now, tiama langiung la ngamlam mih na tüng enni kown chekhai.