TASAKRAURA ¹ Lusa maru lai hai kramamu lai ang tek chenganchepaw ang tut-e sakraura che uowi dowi hanow, nari tün naklak mih hai klingcha tep tün naklak mih iawng ang na own kown. ² Now, purpra kowikow laiklow nowngia tekla mih kakhai, laipet maiow hai tukla mih miow hai hung nowngia tasüt tasowila pat mih owmra akümma ang ka chenganchepaw sakraura ang tut-e hing uowi dowi now matawng paw ang hing nadowi tham. ³ Now, nacha la kownkow ngarawng ngarai miuüa kowi ang pe ta bowk nami klen kowi satangiung na phuang la kownkow ang matia kowi paw ang hing taap takhai chenganchepaw ang tut-e sakraura uowi dowi hanow ang vüi matawng paw hing tamak dowi. ⁴ Sakraura mih dow nowngia kham khai, saksing sanara mih paw uowi reng; sakraura mih dow irsi dowi chekhai; sakraura dow pamatia pur downg chatai nadowi mü; ⁵ Chang bawri dowi, chowm krang uowi krang nga dowi, kunmarau maru naklak dowi, maru kow angak mü dowi, ⁶ Tachi tanawm dowi mih kowi howrah dowi; lainowm mih kowi tarapchedow tawi howr pe reng chekhai; ⁷ Lowra mih kowi kham ngare khai, lowra mih kowi owm khai, lowra mih kowi sakowmah khai now bowk bowk mih kowi ia kham sum khai. ⁸ Tasakraura tarapche dow matawng mih khin khe paw prowng dowi tham. Natarapchedow nowngia tek lai klow mih uowi khai hanow nalawpha kown; nowngia tuk taah dowi mih laiklow uowi khai hanow nami paw nachur kown; chanlaira uowi now nami paw nalawpha kown. ⁹ Taküm tangi dowi miiawng a-i ta khai, taküm dowi miiawng laiklow paw a-i tek reng chekhai. ¹⁰ Aküm angi mami khin nauang ting khe tarapchedow taküm tangi dowi mih na prowngta bowt kown. ¹¹ Ang ngeuuüa mih khin khe ngeuuüa lai hai ang lai reng khai, ngeuuüa tukla mih iawng ang tuk khai, ngeuuüa tuak iawng ang tuak khai, akawmmat tarapchedow ang uang tachi khai bowt rakowi ngeuuüa sang ching ang uang towta khai bowt. ¹² Akawmat mih dow nimrua kowi a-i khi kaneu mih miiawng chekhai, nami khin khe tarapchedow tamü mowk lowk miiawng na own kown, akawma mih dow taküm tangi dowi mih iawng a-i tuk, nami khi khe tarapchedow aküm angima tuk ang mih iawng aküm angima ang natuk bowt kown. ¹³ Nahanow maün mih sumchap, owmra ün, sakowmra ün, sakraura ün nauowi reng kown, now nami kowi langkri mih dow sakraura chekhai.