NOWNGIA TEKLA LAIMIH HAI TUAH DOWI MIH LAIKLOW ¹ Sakraura kowi chamah büah diah, na nowngia tekla lai mih lümla awmrawm sung kowi towpe sak büah rowt diah. ² Amiaiawng mih chow nowngia tukah dowi mih laiklow tek mih dow lusa maru tut-e chatai na dowi, Thurai tut-e kow tek mih chekhai; amiaiawng mih paw nowngia tukta dowi rakowi lümla mih dow aia laipet tekah mih chekhai. ³ Nowngia tek laiklow mih tarapchedow, lusa maru tut-e kow tapring tahawila mih laiklow ün hai sakkhawtra laiklow ün tek mih chekhai. ⁴ Nowngia tukah dowi mih laiklow tek mih dow pamatia kowi asar pathawpah reng lah, now, nowngia tek lai klow mih dow Thurai hawm chak uüa kowi asar ma patawpah lah. ⁵ Ang nau enni mih dow, nowngia tuk ah dowi mih laiklow enni na nowngia tekla kown mih, nami klen kowi nowngia tek lah lai mih paw; nowngia tukah dowi mih laiklow tek kow Thurai hawmchakuüa kowi na krüng lah kownkow nau phuang pe dowi now, nowngia tek laiklow mih nami lak-e langkraing rowt kown. ⁶ Akawmat kow ang tainua hai tuamauüa low, ang uangah hanow nowngia tukta ah dowi mih lai hai ang uang tek enni khai e dow, enni tut-e lainowm naphuang enni kown mih, natek lai klow kown mih uowi dowi-e dow ang tut-e matawng chow maratra enni naka kown chow? ⁷ Purui pacham na lah, taraw pacham na la, atün iung dowi iawng tumah khai-e da matawng iawng mih chow tum mih, matawng iawng chow na tukah kown chow? ⁸ Baw mih alawng auan uowi dowi kow tum khai hanow Amiaiawng mih chow na tasen kownkow na khamrüt kown chow? ⁹ Nami powmiawng dow enni tuk taah dowi mih lai klow enni tek khai e-dow matawngchow tek mih matawngiawngchow enni na tukah kown chow? En tek laiklow khe Amiaiawng mih paw na tuk ta en kown nadowi tham. ¹⁰ Lusa kowi-e lai achap kawm uowi, nachepaw auan uowi dowi kow matawng mih paw uowi dowi chekhai. ¹¹ Nachenganchepaw laiklow auan che ang tuk ta dowi now, aia tut-e ang dow tukah dowi mih akeng chenchap iawng na own kown, aia pawle ang tut-e tukah dowi mih akeng chenchap maru iawng na own kown chekhai. ¹² Nahanow, enni mih paw lümla pra kowi uan pek ün mih luk kowikow enni towplawng towsak khai mih rakowi Thurai maru hawmuüa aiung thawpmüa nana la kownkow krawi cham büah diah. ¹³ Naiawng rakowi amiaiawng mih chow nowngia tukah dowi mih laiklow tuk khai mih dow pacham chup Thurai lah, auan mih dow nanowng ia phuang lah kownkow. ¹⁴ Tukah dowi mih hai ang chup Thurai hanow ang lümla ngengche hai dow chup Thurai khai, nachenganchepaw ang kow saktuak dow matawg mih re-e paw maratra uowi dowi tham. ¹⁵ Now, matawng chow ang nachang kown? Lümla hown saktuak hown ang nachup Thurai kown, Thurai kiow müa meng paw Lümla hown sangching hown ang na tek kown. ¹⁶ Naiawng mih nadowi hanow, lümla hown en kiow Thurai hai en tek awmrawm lai khowk khe tuk dowi mih maru dow matawng iawng chowh “Amen” pah na tek kown chow? ¹⁷ Klangiungma awmrwm lai en tek khowk chowdiah, nachenganchepaw nami maru kowi iuksown müa en tüng sangah dowi tak chekhai. ¹⁸ Enni lak-e lai chap ang lang tuk tek hu, naiawngra kowi Thurai kowi ang tekpe awmrawm lai. ¹⁹ Nachenganchepaw Thurai maru hawmuüa takua mira kowi dow tuktaah dowi mih laiklow hamüt thawng kat tek mih lak-e akeng mih maru ang nanowng ia tüngla sangla kownkow tanga nawr chatai natek kown mih ang nau khai. ²⁰ Tainauuüa low, saktuak pra kowi hang kow ngeuuüa büah diah, natarapchedow angak tia kowi ngeuuüa büah diah; natarapchedow prengia pra kowi chanlai büah diah. ²¹ Ari-arow chabowih kowi dow, “akeng mih maruuüa tut-e akeng pren maru nawr hown natek laiklow now amatni dow ang laiklow na sünta kown” pah arui uowi khowk mih dow CHAKRAMANG tek khai. ²² Nahanow, naowngia tukah dowi mih lai tarapchedow owm miuüa vüi na dowi, owm dowi miuüa vüi amatmüa nami chekhai. Natarapche dow nowngia tek laiklow mih dow owm dowi tak mih vüi na dowi, owm miuüa vüi na rowt mih chekhai. ²³ Naiawng rakowi Thurai maru hawmuüa maiow takua hanow, nowngia tukah dowi mih laiklow tek bowk khai e dow, iawng pami maru hai owm dowi tak miuüa uang tawi kup khai e dow amatni mih thuk miuüa pah natuak enni dowi tham pabow? ²⁴ Natarapcheedow bowk bowk mih Ris iawng tek laiklow kachalownow owm dowi mih chepaw iawng pami maru chepaw uang kup khai now, nami laiklow bowk bowk mih hownia dow aia angak pami tuk khai now bowk bowk pungma dawng hownia aia tachet tara khai bowt. ²⁵ Aia sak kowikow laipet ün mih dow nauang tatüng bowk kown, nahanow tabawk krawm hai Thurai kowi na chup büah hanow Thurai enni pungma dawng kowi uowi ching khai pami naphuang kown. ACHIANAWM MAMIH KRANG ²⁶ Tainauuüa low, Matawng iawng tak chow? Enni uang takua talawm mih khin khowk khe kiowmüa meng chepaw, laiklow tüngsang mih chepaw petuk petala mih laiklow chepaw, lai tuktaah dowi mih chepaw, aphuangma mih chepaw enni ka bowk reng mih chekhai. Lowra akümma aiungma na thawpla kownkow mih pacham chang lah. ²⁷ Amiaiawng mih chow tukah dowi mih laiklow tek khai chalow hanow, preia chowh pacham tek lah, hu pra sumia pacham tek lah, now lowkia mih tarapche dow auan mih pacham phuang lah. ²⁸ Nachenganchepaw lai plan mih che uowi dowi hanow, nami maru dow Thurai hawmchak pur kowi arimma pacham uowi lah, kowmat ia hai Thurai tut-e pacham tek lah. ²⁹ Laiklow nowngia tek mih paw pre sum ia chowh pacham tek lah, akeng miuüa dow peching hai auan mih pacham sünta kaneu lah. ³⁰ Natarapche dow Amiaiawng mih tut chow uang phuang khai chalow hanow, aia re-e tawi chowm mih dow rarim raramma hai pacham uowi lah. ³¹ Enni bowk bowk mih lowk kow lowk tuk tek laiklow, bowk bowk mih tawi nowngia tuk lah kownkow hai na towsak lah kownkow. ³² Laiklow tekmi lümla ün dow laiklow tek miuüa alow iawng nauowi büah kown chekhai. ³³ Thurai mih dow pusa langkan mami nadowi chekhai, aia dow taking tasang mami hai achim asaima mih Thurai hawmuüa tut-e kow aiawng uowi mih chekhai. ³⁴ Thurai maru hawmuüa Takuara kowi dow masiuüa hawm mih dow rarimma hai pacham uowi lah; amatni mih dow natek laiklow kown mih petekah dowi mih chekhai rakowi; ari-arow chabowih kowikow tek mih iawng dow laiklow chün khai pacham uowi büah lah. ³⁵ Lowra mih na sang büah kown nau khai hanow pamatia hua tut-e kim kowi pacham sang lah, Thurai maru hawmuüa pur kowi na tawi tek laiklow kown mih uowiah parukrai mih chekhai rakowi. ³⁶ Tek büah madiah Thurai laiklow enni hownia kow uang lawt mih chekhai bow? Nadowi hanow enni tut-e chatai bow uang towm? ³⁷ Amiaiawng mih chow pamatia kowi nowia tek laiklow mih hai Lümla pami tatuak khai hanow, aiamat mih pacham tatuk lah, enni tut-e kow ang uang krawi rui enni mih tarapche dow CHAKRAMANG alow pek chekhai. ³⁸ Nachenganchepaw tuk dowi mih dow tuk dowi iawng pacham uowi lah. ³⁹ Nahanow ang tainauuüa hai ang tuamauüa low, nowngia tekla mih laiklow nownia tuk lah kownkow kamrüt büah diah; now, nowngia tuktaah dowi mih laiklow natek kown mih hangka hang ah büah diah. ⁴⁰ Nachenganchepaw lowra mih aklangiungma hai achimasaima kowi changah büah rowt diah.