AKHIN CHUR KHOWK KHE OWM MIUÜA NA AWR RÜ IAWK KOWN MIH ¹ Now tainauuüa low, Satangiung ang tek enni mih ang plan patuk pata enni iawk khai; nami satangiung dow enni howrah khai; Nami kowi chatai enni iowng khai; ² Ang pe enni mih satangiung che akhawtma enni towah khai hanow enni naka lawngra kown, nadowi now enni kow owmra dow aiawngma pa chatai. ³ Hanow, auown khowk khe kow lang pankri mih ang tüngsang enni mih ang matia paw ang kaah mih Sangbowk laitawm kowikow Krista dow a-i ngak vüi kowi-e uang kowng khai, ⁴ Now, dupah büah khai, now, sangbowk laitawm kowikow uowi iawng dow sumni kow nih kowi-e plan rü khai iawk; ⁵ Aia dow Kipha tut-e nami kung kowi atape laipreia tut-e katatüng pe khai; ⁶ Nami kung kowi dow tainau hai tuamauüa tangakawma lak-e lang hurowt uang kut plan tatüng iawk khai; nami pungma dawng kowi maru lang kawm rowt mih dow akawmat pat sing uowi reng tak; matawng mih chabak dow kowng büah ne khowk . ⁷ Nami kung kowi Jakawb tut-e, now bowk bowk chintakmiuüa tut-e katatüng pe kahi. ⁸ Achur amowi kowi ngeuuüa iawng dow ang uang ta diah khai, aia dow ang tut-e uang tatüng khai, ⁹ Now chintakmiuüa pungma dawng kowi bowk bowk lak-e ang lang sowm rowt chekhai, chintakmi kowi aming ang natawi tarük kown mih ang hing tataing dowi, Thurai maru hawmuüa kowi ang chang anowng apowng mih ang na khai rakowi. ¹⁰ Nachenganchepaw, Thurai saksing sanara luk kowi ang uowi mih chekhai, ang tut-e Thurai uowi mih aiawmma chatai na dowi, amatni bowk bowk lak-e ang lang chang lup rowt chekhai, nami chatai nadowi ang tut-e uowi mih Thurai sanara luk kowi chatai; ¹¹ Lowra iawng pacham na lah, ang mih paw amatni mih paw, naiawng mih anging cham tek cham chia reng khai; naiawng mih enni owm khai. KOWNG MIUÜA PLANKUT RÜ IAWK MIH ¹² Now, Krista aiamat tek khowk kow makowng pungma dawng hownia awr kut planrü pami naiawng-e matawng iawng chow enni nowngia tekkhai mih makowng pungma dawng hownia ngowngia rü dowi pami? ¹³ Makowng pungma dawng hownia nowngia rü dowi-e dow, Krista paw makowng pungma dawng hownia nowngia rü dowi tham. ¹⁴ Now, krista che planrü dowi e dow a-i cham phuang mih paw aiawng lowma chatai, enni kow owmra mih paw aiawnglowma chatai. ¹⁵ Nachow, Thurai lawnguan kowi paw a-i cham phuang dailai tai pamih nauang tatüng kown; nachenganchepaw makowng pungmadawng hownia awr kut planrü dowi-e dow, naiawng now aia mih aiamat kowi dow awrkut plan krüngah dowi. ¹⁶ Makowng pungma dawng hownia awrkut ia rü dowi-e dow Krista paw makowng pungma dawng hownia nowngia rü dowi tham. ¹⁷ Krista che awr plan rü dowi-e dow a-i kow owmra paw dailai chatai, kawmat mih enni matia lowk kow lowk angak kowi enni uowi mih na khai. ¹⁸ Naiawng chalow hanow krista kowikow kowng miuüa dow piak bowk khowk. ¹⁹ Akawmat kow Krista kowi sakowm kow a-i sing uowi sakuowi mih tarapchedow maru lang sanawng sanaah mih nakhai. ²⁰ Nachenganchepaw Krista mih dow makowng pungma dawng hownia awr plan rü mih anowm chekhai; mui miuüa kowikow awr rik rümui mih uang na khai. ²¹ Lusa maru tut-e tawngiawng chow kowngra uang towm nami iawng dow makowng pungma dawng hownia naawr planrü iawk kown mih paw uowi. ²² Adam hai tatawm kow matawng iawng chow kowngra uang towm, nami iawng dow Krista hown tatawm miuüa paw na awr kut sing iawk kown. ²³ Nachenganchepaw kowmatia chowlowk kow iawng kowi; Krista mih dow awr planrü lamih chekhai. Namih kowi aia nakut uang la iawk kown mih kowi dow Krista maruüa naown kown. ²⁴ Nami kung kowi dow achur nauang ting bowt kown; nami kung kowi dow tara chetra maiow hai, alow kala mih hai lowra nowngia changla mih maiow ün na mata mih kung kowi, Thurai (pa) tut-e na apta pe bowt kown. ²⁵ “Aia ransuuüa kowi aia kawkpha krüa kowi towah dowi mowr mih”, aia na chowm mang reng tak kown. ²⁶ Achur amowi kowikow ransu kowng mih dow napiak kown mih chekhai. ²⁷ “Aiamat dow aia khawkpha krüa kowi lowra mih aia towah mih chekhai bowt mih rakowi,” Nachenganchepaw “aia krüa kowi lowra mih aia towah khai,” pa tek mih, lowra mih towah miia dow tawi uowi dowi pa mih uang tüng reng chekhai. ²⁸ Now, aia krüa kowi lowrami towah khai bowt mih kung kowi chapa ngengeche mih paw nami a krüa kowi lowra mih towah miia krüa kowi dow na towah bowt kown, Thurai mih dow lowra mih kowi lowra nowngia own lah kown. ²⁹ Kowng miuüa vüi kowi chang pe baptisma miuüa matawng chow na chang kown? Kowng miuüa awr kut planrü dowi-e dow, now, amatni vüi matawng paka chow nachang pe baptisma kown? ³⁰ Now, matawng palang kachow nari towng a-i kramkown uowi mahai uowi reng mih? ³¹ Tainau hai tuamauüa low, a-i CHAKRAMANG Krista Isu kowikow tow enni sakowmra mih ming lüklau hai, “nitowng ang kowng khai.” ³² Ephisi kua kowikow kaurawng uaramchak arang mami hai takhüm tamak mih ang na khai, hanow ang vüi matawng chow maratra nauowi kown? Makowng pungma dawng hownia kutplan rü mih uowi dowi-e dow, sangbowk laitawm kowikow arui uowi powmiawng dow, “uang madiah a-i nacha nakham lah, tharau mih a-i na kowng kown” pa ruai ah khowk mih iawng dow. ³³ Puanra kowi hang uowi büah diah, auiua angakma mih ün dow chowmkrang uowikrang aiungma mih piakta büah khai. ³⁴ Achima kowi sunah büah hanow, lup ngak hang chang büah diah, matawng mih chabak mih dow na tukla Thurai mih mapaw enni ka dowi chaw; mami enni na uang rukrai la kownkow ang tek mih chekhai. NA AWR PLAN RÜLA IAWK KOWN MIH KOWH ³⁵ Nachenganchepaw amiaiawng mih chünchü dow, kowng miuüa dow matawng iawng chow naawr plan rü iawk kown? Matawng iawng chow na nowngia ka buk kowh kown chow? ³⁶ Thuk miuüa low, enni sawtah mih paw kowng kat dowi now nowngia rü dowi dow; ³⁷ Now, en sawtah reng mih ama nauowi la reng kownkow en sawtah mih nadowi mih chekhai, ama (anuk) lowkchah chih mih chekhai en sawt reng mih dow, chama chepaw nowngia na chekhai; ³⁸ Nachenganchepaw Thurai peah mih buk kowh dow aia nau now nowia pereng chekhai; aia dow bowk bowk aliu kowi aiamat kowh peah reng. ³⁹ Nga dow bowk bowk achap sang na dowi; Natarapchedow maru mih achapsang, asadaua tarapche dow achap sang na dowi, uakling nga paw achap sang nadowi now dam kow paw achap sang na dowi. ⁴⁰ Now, Mukuang kowh nga paw uowi, Lusa kowikow kowngra paw uowi; Nachenganchepaw Mukuang kowhru kraingra lang khai, lusa kowikow kowhru paw lang chekhai. ⁴¹ Sat kraingra dow lang khai, lama kraingra mih paw lang khai, karek kraingra mih paw lang khai, karek mih paw kraingra hing tatu büah dowi. ⁴² Makowng pungma dawng hownia kow awr plan rü kown mih paw naiawng chekhai. Nahanow buk dow dupah now nasu kown taih, tarapchedow na awr plan rü kown mih kowh dow tawngkhepaw piak kown nadowi tham. ⁴³ Rowsi ah dowi kow sawtah mih paw uowi, akrainma awr rü la mih paw uowi, kür uowi dowi kow sawtah mih paw uowi, Kür hown kow sawtah mih paw uowi; ⁴⁴ Lusa prakowi sawtah mih paw uowi, lümla pra kowikow awr rula kown mih paw uowi; Lusa maru pra kow ru mih uowi iawng dow lümla prakowi paw awr ru mih uowi kown. ⁴⁵ Naiawng palawng dow, “Lusa maru rik thawpah mih Adam mih dow maru uang na khai,” pah ruah khowk mih uowi chekhai; Adam akung amowicha rowt mih dow singra pekmi lümla uang na chekhai. ⁴⁶ Nachenganchepaw, lümla ra mih dow rik uowi mih nadowi chekhai, lusa maru prakowi mih dow rik uowi rowt; nami kung kowi dow lümla pra mih uowi khai. ⁴⁷ Auown khowk khe lusa maru rik uowi mih dow dincha hown, pre mih dow mukuang maru hownia chekhai. ⁴⁸ Bawn hown kow maru tarapchedow bawn iawng, Mukuang kowikow maru tarapchedow Mukuang maru iawng chekahi. ⁴⁹ Now, bawn hai kow thawpah mih maru aklüng aklang a-i tawm powmiawng dow, Mukuang maru aklüng aklang tawm powmiawng mih dow na tatu kown chekhai. ⁵⁰ Ang natek enni tainua hai tuamauüa low, Nga hai vi mih Thurai pren kowi tawi ia kup dowi tham; su mih hai su dowi mih paw tawi nowngia uowi dowi tham. ⁵¹ Mü diah, laipet ang natek enni achap; a-i nakowng bowk kown na dowi, Natarapchedow a-i na taklowi bowk kown; ⁵² Pamik klip sang baw dow nauang tün kown, nami khin khowk khe kowng miuüa sula dowi mih hown nauang awr planrü kown, now a-i mih dow nataklowi kown chekhai. ⁵³ Mami su mih su dowi powmiawng nauang phaw kown, nami paw kowng dowi mih na khup kown chekhai. ⁵⁴ Nahanow, mami nowngia su ter mih nowngia su ter dowi mih hai natikling klai khin khe mami nowngia kowng mih nowngia kowng dowi mih hai natakling taklai kown, nami khin khowk khe sang bowk laitawm kowi arui uowi powm iawng dow, nauang tachi iang. ⁵⁵ Aw kowngra en nowngla mih dow matawng kowi chow uowi khowk tak? Aw kowngra, en kow-ru mih dow matawng kowi chow uowi khowk tak mih? ⁵⁶ Kowngra aru mih dow angak chekhai, angak lowra nowngia changla mih dow ari-arow chekhai. ⁵⁷ Nachenganchepaw, CHAKRAMANG Isu Kristara kowi lowra nowngia changla mih pe a-i mih rakowi Thurai tut-e awmrawm lai pacham uowi reng lah. ⁵⁸ Naiawngra kowi ang tainau hai tuamauüa low, akhawtma uowi diah, sakowm ma hai uowi diah, CHAKRAMANG lup kowi tungma akümma uowi diah, CHAKRAMANG lup dow katpaw aiawmma nadowi chekhai.