AKENG MIH OWM MIUÜA KOWI ALU MATEN (UAN PEK) ¹ Now achima mih vüi kowi akawk lawnguan, Galatia prenchak Thurai maruuüa kowi alow pek iawng enni paw tawi chang büah diah. ² Rinitni ni müng kowi-e enni ia mowr chowmi tangka krümah büah diah, ang nauang mih khin khowk khe akawk takla dowi kownkow. ³ Now, enni alu atan mih dow Jerusalem kua kowi napawla kownkow ang uang ting mih khin khe, lowra maru enni nautaah miiawng sanara cha ün hai na pawla hanow ang mih na kowi na chinah kown. ⁴ Now, atawi takla kown powmiawng na khai hanow amatni ang kung na tawi büah kown. ⁵ Makidawnia pren hownia ang uang plan now enni tut-e ang nauang kown, nahanow Makidawnia pren kowi naka kowi kown mih kamrütiama hown ang uowi khai.
PAWL NACHAM KOWI KHOWRI KOWN MIH KRANG
⁶ Now, Makidawnia pren krawi kilen kung kowi dow enni tut-e ang nauang kown, Makedawnia pren kowi na kowi kown mih kamrüt hown ang uang lawt mih chekhai. ⁷ Enni tut-e ang natawi uowila pre sumni chepaw naia, tekah dowi, ang chamkowi rakowi enni nanowng tawiia sala ang kownkow Chungrau khin paw enni re-e nauowi chepaw naia. ⁸ Nachenganchepaw, pentikaws ni mowr dow Ephisi kua kowi ang nauowi kown. ⁹ Ang vüi kowi-e kimplawt auarma auow-ia uowi khowk, nataratchedow lup naki changah kown mih dow ahuma uowi. ¹⁰ Now, Temawthe mih uang ting khai hanow, aia mih na kramla dowi kownkow pepe ching büah diah, ang chang mih powmiawng dow aia paw CHAKRAMANG lup mih nachang kown. ¹¹ Naiawng mih rakowi amiaiawng mih paw hangka cham-eah lah, aia mih paw ang tut-e nauang ia tingla kownkow, ang hawt chawng mih dow tainauuüa hai ahawm sang ang nakhi kown mih sakowm uowima chekhai rakowi. ¹² Ang tainau Apawla mih dow, tainauuüa ahawm sang nauangla kownkow ang chin chamang chin khowk diah, nachenganchepaw akawmat mih dow aiamat mih mapaw nau uang dowi chekhai, akhin kakhowk khe tarapche dow aia nauang kown. ¹³ Achingma uowi reng büah diah, owmra kowi paw akhawtma uowi büah reng diah, hang ta pusa büah diah, akürma uowi büah diah. ¹⁴ Enni changah mih lup sarui kowi dow tasakraura pacham uowi reng lah. ¹⁵ Now, tainau hai tuamauüa low, enni tut-e lai mak dow, Enni tainau Stiphen kowi enni tuk, aia mih dow Akhaia pren kowikow aiamat kowi rik peah uan powmiawng dow achima mih maruuüa tut-e tape khai. ¹⁶ Naiawng mih maru tut-e hai lupchang kowikow khowng ku hai akümma chang mih sarui miuüa tut-e dow natawi kup kownkow ang lü enni khai. ¹⁷ Now, Stiphen, Phawrtuna, Akika büah uang mih lainowmma ang awmrawm khai, enni tuakah dowi mih chap amatni uangtüng uangsang enni chekhai rakowi. ¹⁸ Amatni ang saktuak hai enni saktuak uang thowr auah büah mih chekhai rakowi, nahanow naiawng mih kowi howrah büah diah. LAIKLOW ACHUR HAI TACHUP TAIARA ¹⁹ Asia pren Thurai maru hawm powchakuüa mih krawi pe enni achup aia büah khai, Akilla hai Priskilla amatchi kim kowi Thurai Maru takua mih hawm hai lawm mih CHAKRAMNG kowi dow achup aiia ahuma krawipe enni büah khai. ²⁰ Tainau maiow mih krawi pe enni achup aiia büah khai, awm nam achim asai ma hai krawi pe enni büah khai. ²¹ Ang Pawl ang matia rut ngengche hai ang ruiah mih chekhai. ²² Lowra maru mih CHAKRAMANG aia sakruah dowi hanow piati hai pacham uowi lah, a-i CHAKRAMANG dow uang thüm chekhai. ²³ CHAKRAMNG Isu Krista sakraura enni tut-e pacham uowi reng lah. ²⁴ Krista Isu kowikow ang sakraura mih enni tut-e pacham uowi reng lah. Amen.